Сар шинийн баярын үеэр төрөл бүрийн хордлого, ялангуяа хоолны хордлого, архины хордлого, гэдэсний халдварт өвчин, осол гэмтэл, осголт, хөлдөлт, томуу томуу төст өвчлөл нэмэгдэх хандлагатай байдаг.

Үүнтэй холбогдуулан Нийслэлийн эрүүл мэндийн газраас иргэд, олон нийтэд дараах сэрэмжлүүлгийг хүргэж байна.

• Томуу, томуу төст өвчнөөс сэргийлэх, эрсдэлт бүлгийн болон бага насны хүүхэд, жирэмсэн эхчүүд хүндрэх магадлалтай тул олон айлаар зочлохгүй байх,
• Сүүлийн үед салхин цэцэг өвчний тархалт нэмэгдэж байгаа тул өвчилж байгаагүй, бага насны хүүхэд халдвар авахаас сэргийлж, өвчлөл гарсан айлаар орохгүй байх, салхин цэцгийн өвчлөл гарсан бол бага насны хүүхэдтэй хүмүүст урьдчилан сануулах,
• Архи дарс согтууруулах ундааны хэрэглээнд онцгой анхаарах, архи хэтрүүлэн хэрэглэсэн хүнийг заавал гэрт нь хүргэж өгөх.
• Архи согтууруулах ундаа хэрэглэсэн үед тээврийн хэрэгсэл жолоодохгүй байх нь таны болон ойр дотны хүмүүсийн амь нас, эрүүл мэнд, эд хөрөнгө, эдийн засагт эрсдэлгүй юм.
• Хэт өндөр илчлэгтэй хоол унд нэг дор идэж уухаас татгалзах.
• Хоол идэхийн өмнө, бие зассаны дараа, олон нийтийн газраар явах, олны гар дамжсан мөнгөн тэмдэгтийг барьсаны дараа гараа заавал угаах, гар угаах боломжгүй нөхцөлд цэвэрлэх, ариутгах зориулалттай санитол, нойтон сальфетикийг биедээ тогтмол авч явж хэрэглэж хэвших нь баяр наадмын үеэр ихсэх хандлагатай байдаг бохир гараар дамждаг гэдэсний халдварт өвчнөөс сэргийлэх ач холбогдолтой юм.
• Гудамж талбайд ухаангүй буюу биеэ авч явах чадваргүй хүн байгаа бол яаралтай 102, 103 дугаарын утсанд мэдэгдэхийг зөвлөж байна.

-ХООЛНЫ ХОРДЛОГОТ ХАЛДВАРААС УРЬДЧИЛАН СЭРГИЙЛЭХ-

• Хүнсний бүтээгдэхүүн худалдан авахдаа үйлдвэрлэсэн хугацаа, хадгалалт, хамгаалалт, сав баглаа боодлын бүтэн байдлыг шалгаж, баталгаатай газрыг сонгон үйлчлүүлэх,
• Хоол хүнс бэлтгэхийн өмнө гараа заавал угаах хэвших,
• Хоол хүнсэнд хэрэглэгдэх аяга, сав суулга, халбага, сэрээ, хутга, усны сав бусад хэрэгсллийг сайтар угааж цэвэрлэх,
• Бялуу, өндөг, хиам, цөцгий, төрөл бүрийн салад, зууш, сүү, сүүн бүтээгдэхүүнийг зориулалтын дагуу хөргөгчинд 24 цагаас ихгүй хугацаагаар зөв хадгалах, хэмжээг тохируулан бэлтгэж хэрэглэх,
• Жимс, хүнсний ногоог сайтар угааж хэрэглэх,
• Ундаа, айргийг ам дамжуулан 1 аяга саваар уухыг цээрлээрэй.
• Хордлого халдвар болон бусад өвчний шинж тэмдэг илэрсэн үед яаралтай эмчид хандах

-ХҮҮХДИЙН ХООЛНЫ ХОРДЛОГЫН ҮЕД АВАХ АРГА ХЭМЖЭЭ-

Сар шинийн өдрүүдээр бага насны хүүхдүүд хоолны хордлого авах нь ч бий. Хоолны хордлогын үед гэрийн нөхцөлд авч болох аргуудыг хуваалцья. Гэхдээ хоолны хордлогын хурц шинж тэмдэг илэрч буй тохиолдолд түргэн дуудах буюу ойролцоох эмнэлэгтээ яаралтай хүргэж эмчлүүлэх хэрэгтэй.

Хоолны хордлого нь эхүүн үнэртэй хэхрэх, бөөлжих, ойр ойрхон гүйлгэх зэрэг шинж тэмдгээр илэрдэг. Гүйлгэж, бөөлжсөн тохиолдолд хүүхэд маш хурдан шингэнээ алддаг. Тиймээс нэн түрүүнд хүүхдийн шингэнийг нөхөх хэрэгтэй.

ДАВСТАЙ ШИРГЭЭСЭН УС

Зориулалтын саванд ус хийн ширгээж буцалгана. Буцлах үед нь жамц давс хийнэ. Жамц давс байхгүй тохиолдолд энгийн иоджуулсан давс зэргийг орлуулан хэрэглэж болно. Ингээд давстай ширгээсэн усаа халуун бүлээнээр нь бага багаар ойр ойрхон уулгах хэрэгтэй.

ХРОСОЛ БУЮУ ДАВС ЧИХРИЙН УУСМАЛ

Эмийн сангуудаар үйлдвэрийн аргаар найруулсан хросолууд зардаг. Ийм төрлийн хросолыг зааврын дагуу усанд найруулж халуун бүлээнээр нь уулгана. Эсвэл нэг литр буцалсан усанд 8 ц/х элсэн чихэр, 1 ц/х давс хийн сайтар хутгаж хросол бэлдэн хэрэглэж болно. Эдгээр шингэнүүд нь хүүхдийн шингэнийг нөхөхөөс гадна ходоод гэдсийг цэвэрлэх үүргийг давхар гүйцэтгэдэг.

ХЯРАМ

Хөнгөн хордлогын үед багахан давстай шингэн хярам уулгаж болно. Давстай хярам нь гэдэс дотрыг цэвэрлэхийн зэрэгцээ шингэн нөхдөг ачтай.

БАНТАН

Хордлогоны эхэн үед л шингэн бантан өгнө. Хийхдээ махаа угаах, эсвэл эхний буцалсан шөлийг нь солих буюу хоёр дахь удаагаа буцалгасан цагаан шөлөөр бантан хийж өгөөрэй. Хордлого гайгүй болох тусам гурилаа бантагнаж өтгөрүүлэн өгөх нь зүйтэй.

ЦАГААН БУДААНЫ ШҮҮС

Бага зэрэг будааг усанд хийн шүүсийг нь өтгөртөл буцалгана. Цагаан будааны шүүсийг дангаар нь уулгах буюу будааг нь идүүлж болно. Цагаан будааны шүүс нь ходоод гэдсэнд өнгөр тогтоож, гүйлгэлтийг зогсоодог. Гэхдээ 2-оос дээш хоног дан цагаан будааны шүүс өгөх нь хүүхдийг тэжээлийн дутагдалд оруулдаг аюултай.

ХУУРСАН МАХ

Хүүхдийн гэдэсний гүйлгэлт намдахгүй байгаа үед мах хуурч өгөх нь бий. Ингэхдээ дан хар махыг /хүзүүний мах тохиромжтой/ жижиг хэрчиж, ямар ч тос ус хийлгүйгээр махны өөрийнх нь шөлөнд хуурч болгоно. Давсаар амталж болно.

М.АМАРЖАРГАЛ