Өчигдөр буюу гуравдугаар сарын 31-нд болсон Украины Ерөнхийлөгчийн сонгуулийн урьдчилсан дүнгээр нэр дэвшигч, шоумен, жүжигчин Владимир Зеленский болон Украины өнөөгийн ерөнхийлөгч Петр Порошенко нар сонгуулийн буухианд тэргүүлж байгаа талаар ИТАР ТАСС мэдээллээ.

Харин гуравдугаар байранд “Батькивщина” намын тэргүүн Юлия Тимощенко 13% саналтайгаар, түүний араас “Сөрөг хүчний тавцан- Амьдралын төлөө” намаас нэр дэвшигч Юрий Бойко 11.3%, тавдугаарт “Иргэний байр суурь” намаас нэр дэвшсэн Анатолий Гриценко 6.9 % -ийн саналтайгаар тус тус жагссан байна.

Өнгөрсөн ням гаригт болсон Украины Ерөнхийлөгчийн сонгуульд 39 нэр дэвшигч өрсөлдөж байгаагаараа энэ улсын түүхэнд дээд амжилт тогтоож байгаа юм. Улмаар эдгээр нэр дэвшигчдээс Владимир Зеленский болон Петр Порошенко нар тунаж үлдснээр тэд дөрөвдүгээр сарын 21-ний өдөр болох хоёр дахь шатны сонгуульд өрсөлдөх юм байна.

Энд дуулгахад ард түмнээсээ 30 орчим хувийн санал авсан Владимир Зеленский 1978 онд төрсөн, Украины шоумен, хошин жүжигчин, найруулагч, продюссер хүн юм.

Түүний эцэг Александр Семёнович Зеленский математикч, программист, техникийн ухааны доктор, мэдээлэл зүйн тэнхимийн профессор хүн байжээ. Тэрбээр 20 жил Монголд ажиллаж амьдран,уулын баяжуулаах Эрдэнэт үйлдвэрийг босголцон, ажиллаж байсан гэнэ. Улмаар Зеленский эцэг эхийн хамтаар Монгол улсын Эрдэнэт хотод дөрвөн жил амьдран, нэгдүгээр ангиа Эрдэнэт хотын сургуульд төгссөн байна.

Б.АНАНД