Энэ сарын 19-ний өдөр Сүхбаатар дүүргийн нэгдүгээр хороо Хүүхдийн ордны ард байрлалтай “Глобал хурд” барилга дээрээс 13.30 цагийн орчимд цементэн блок барилгын дор байсан машин дээр унасан хэрэг гарсан талаар бид мэдээлсэн.

Цемент унах үед машин дотор гурван хүн байсан бөгөөд жолоочийн зүүн хөл болон гарын шуу нь шилэнд зүсэгдэж эмнэлэгт хүргэгдсэн байдаг.

Уг мэдээллийг өгсөн иргэн өөрийн фэйсбүүктээ “Хүүхдийн ордны чанх хойно баригдах өндөр барилга дээрээс том чулуу асар хүчтэйгээр унаж ирлээ. Бид гурвуулаа явсан. Тэр том чулуу бид гурвын голд тэсрэх бөмбөг шиг л ороод ирсэн. Урд шилээр орж ирээд, машины салон болон урд хайрцагт байсан юм эвдэрсэн" хэмээн бичжээ.

Иймээс “Глобал хурд” компанийн захиалгаар баригдаж байгаа оффис үйлчилгээний зориулалтын барилгын үйл ажиллагааг зогсоосон талаар Нийслэлийн Мэргэжлийн хяналтын газраас мэдээлсэн юм. Мөн иргэний эд хөрөнгө, эрүүл мэндийн хохирсон асуудлыг тус дүүргийн цагдаагийн байгууллага шалгаж байна.