МоАХ-ны Залуучуудын зөвлөлийн төлөөлөл Х.Эрдэнэбаатар, Д.Баянмөнх, Б.Бат-Энэрэл нар “Капитал” банкны асуудлаар мэдээлэл хийлээ. Тэд Монголбанкнаас Капитал банкийг татан буулгасантай холбогдуулан байр сууриа илэрхийлсэн байна.

Төв банкны энэ шийдвэр Капитал банкинд мөнгөө хадгалуулсан 256 мянган иргэн, аж ахуйн нэгжийн эрхийг бүдүүлгээр зөрчсөн хэмээн үзэж байна. Мөн тэтгэврийн даатгалын сангийн 104 тэрбум, эрүүл мэндийн даатгалын сангийн 136 тэрбум, Хөгжлийн банкны 52 тэрбум, Хөдөлмөр эрхлэлтийг дэмжих сангийн 47 тэрбум зэргээр төрийн 340 тэрбум төгрөг салхинд хийсч байна.

Түүнчлэн, "МАН-ыг эрх барьж байх үед банкууд дампуурдаг. Капитал банк дөрөв дэх нь боллоо. Харин энэ асуудалд АН дуугарахгүй, сөрөг хүчний үүргээ биелүүлэхгүй байна” гэв.

Иймд МоАХ-ноос, "Монголбанк хуулиар заасан хяналтаа тавиагүй, эрүүлжүүлэх арга хэмжээ яаралтай аваагүй, МАНАН бүлэглэл сонгуулийн мөнгөө уг банкны харилцагчдын хөрөнгөөр босгосноос үүдэн дампуурах шалтгаан бий болсон. Капитал банкинд төрийн сангуудын хөрөнгө байршуулах шийдвэр гаргасан албан тушаалтнуудад хууль хяналтын байгууллага хэрэг үүсгэн шалгах ёстой" хэмээн үзэж байгаа юм байна.

Мөн тэд Монголбанкны ерөнхийлөгч Н.Баяртсайханыг огцруулж, хяналт тавьж чадахгүй арилжааны банк дампууруулсан буруутай албан тушаалтнуудад хатуу хариуцлага тооцохыг шаардлаа.