Яг одоо Сүхбаатар дүүргийн анхан шатны шүүхэд үүрэгт ажлаа гүйцэтгэж явсан цагдаагийн алба хаагчийн амь насыг бүрэлгэсэн Б.Энхбаяр, Т.Лундаа нарын хэргийн урьдчилсан хэлэлцүүлгийн хурал болж байна. Уг хурал өнөөдөр 13:30 цагаас эхэлсэн бөгөөд шүүх бүрэлдэхүүн завсарлаагүй хурал явагдсаар байна.

Хэргийг эргэн сануулбал, Залилах гэмт хэрэгт холбогдон эрэн сурвалжлагдаж байсан Б.Энхбаяр, түүнтэй хамт явсан Т.Лундаа нар “Тоёота прадо” машинаар ахлах ахлагч Д.Батсайханыг чирч биед нь хүнд гэмтэл учруулан, улмаар цагдаагийн алба хаагч тархиндаа хүнд гэмтэл авсаны улмаас нас барсан.

Б.Энхбаяр, Т.Лундаа нарыг Эрүүгийн хэрэг хянан шийдвэрлэх тухай хуулийн 14.9 дүгээр зүйлийн хоёр дахь хэсэгт заасан Эрүүгийн хуулийн тусгай ангид хорих ялын доод хэмжээг найман жил, түүнээс дээш хугацаагаар оногдуулахаар заасан гэмт хэргийн яллагдагчийн хувийн байдал, үйлдэгдсэн гэмт хэргийн шинжийг харгалзан яллагдагчаар цагдан хорих тухай прокурорын саналыг хүлээн авсан байдаг.