Хоёр хоногийн өмнө л тайз засан, тууз хайчилж сүр дуулиантайгаар нээлтээ хийсэн Замын цагдаагийн гүүрэн гарц хоногийн ойн дээрээ ч хүрэлгүй ар араасаа асуудал дагуулж, иргэдийг бухимдуулж эхэллээ.

Багагүй цагийг замын түгжрэл дунд өнгөрүүлдэг нийслэлийн иргэд бүтээн байгуулалтын томоохон ажил өрнөж, шинэ гүүр ашиглалтад орж замын түгжрэл буурахад ахиц болно хэмээн найдаж байсан ч талаар болох нь энэ. Учир нь гүүрний гол замын хөдөлгөөн нээгдэж, тээврийн хэрэгсэл зорчиж эхэлсэн ч өглөө, оройгүй таг түгжирч иргэдийн бухимдлыг төрүүлж байна.

Нээлтийн үеэр Ерөнхий сайд У.Хүрэлсүх "Анх байгуулагдахдаа 500 мянган хүн амьдрахаар төлөвлөгдсөн Улаанбаатар хотод маань өнөөдөр 1.5 сая хүн амьдарч байна. Үүнээс үүдэлтэй авто замын түгжрэл, агаар орчны бохирдол гээд олон асуудал бидэнд тулгарч байгаа. Түгжрэлийг бууруулахад энэ гүүр том тус нэмэр оруулна гэдэгт би итгэлтэй байна” хэмээн хэлж байсан ч тухайн өдрийнх нь оройноос хойш гүүрэн дээр иргэд машинтайгаа таг гацаанд орж Засгийн газрын тэргүүний хэлсэн үг талаар боллоо.

Дөрвөн эгнээ, 477 метрийн урттай, төмөр бетонон гүүрний ажлын гүйцэтгэгчээр “Хятадын төмөр замын 20-р товчоо корпораци”, зөвлөхөөр “Ростов” ХХК ажилласан байна. Төслийн нийт төсөвт өртөг 42.38 сая ам.доллар бөгөөд Хятад, Монголын 500 гаруй инженер, техникийн ажилчид ажиллаж Ерөнхий гүйцэтгэгчийн зүгээс гүүрэн гарцад 100 жилийн баталгаа өгсөн гэх. Гэвч уг төслийн өртөг чухам яагаад 40 гаруй сая доллар буюу маш өндөр дүнтэй байгаа нь анхнаасаа анхаарал татаж байжээ.

Энэ талаар хэлэлцүүлгийн явцад УИХ-ын зарим гишүүн шинэ гүүр барих тал дээр саналаа хэлж, анхааруулж байсан байх юм.

Тодруулбал, 2018 оны 4 дүгээр сарын 10-нд шинэ гүүрний талаар УИХ-ын гишүүн Ж.Ганбаатар ”Улаанбаатар хотын дундуур явж байгаа төмөр замыг гүүр барихад зарцуулах 40 сая доллар буюу 150 тэрбум төгрөгөөр холдуулчихна. Бараг гүүр барьснаас илүү төмөр замаа холдуулсан нь хамаагүй бага өртөгтэй болох байх шүү. Засгийн газар үүнийг яагаад эргэж харж болдоггүй юм. Улаанбаатар хотын төвд ийм өндөр өртөгтэй гүүр барина гэж яриад байх юм. Зайсан руу явдаг зам цаанаа очоод түгжирдэг. Хэрэв түгжирдэггүй бол зөв шийдвэр. Улаанбаатар хотын төвлөрлийг цааш нь гаргаж байна гэсэн үг. Цаанаа очоод яах вэ. Гүүрэн дээрээ л түгжирнэ. Хайран 150 тэрбум төгрөг” хэмээн хэлж байжээ. Естой л голыг нь олж хэлсэн нь энэ бөгөөд яг энэ асуудал өнөөдөр нийслэлчүүдийг бухимдуулж эхэллээ.

Өөрөөр хэлбэл өглөө, оройгүй үнэхээр л шинэ гүүрийг дагаж ойр орчмын замууд маш ихээр ачаалж, түгжрэл үүсч нам гацаж байна. Энэ нь “Home plaza” буюу хууль бусаар баригдсан гэх байгууламж нь замын тэх дунд байрлаж буй нь замын түгжрэл бий болох үндсэн суурийг тавьсан нь гарцаагүй. Иргэд ч үүнийг эсэргүүцэж “Home plaza”-г нураан, дөрвөн замын уулзвар болгож, гэрлэн дохиотой болгох саналыг цахим орчноор дамжуулан илэрхийлсээр байна.

Сануулахад замын түгжрэлийн гол үндэс болоод буй “Home plaza”-д байрлах “Минт” бар нь та бидний мэдэх 60 тэрбумын схемийн асуудалд нэр холбогддог Нийслэлийн ИТХ-ын дарга асан Ц.Сандуйн болон Э.Нандинзүрх нарын хамтын эзэмшлийнх гэгддэг. Шөнийн цэнгээний газар тул оройноос эхлэн тэр хавьд бум бужигнан, замын түгжрэл үүсэхээс авхуулаад ойр орчмын иргэдийн тав тухыг алдагдуулах бол энүүхэнд. Иргэд ч энэ талаар гомдол саналаа багагүй хэлдэг ч авч хэлэлцэж, арга хэмжээ авалгүй байсаар өдий хүрсэн. Ийн хууль бус үйл ажиллагаанд үргэлж нэр нь явж л байдаг эрхмийн энэхүү байгууламжид тодорхой арга хэмжээ авснаар нийслэлийн иргэдийн өглөө, оройгүй зөрчигдөж буй эрх ашиг сэргэж, ажил, хичээлдээ амар тайван, хурдан шуурхай саадгүй ирж, очих нөхцөл бүрдэх нь.

Анхнаасаа холбогдох албан тушаалтнууд нь гүүрний бүтээн байгуулалтын ажил эхлэхэд энэ талаар судалж, мэдсэн л байлтай. Гэхдээ судлаад байх зүйлгүй нүдэн дээр нь ил харагддаг замын түгжрэл энэ хэмжээнд хүрнэ гэдгийг яагаад тооцоолоогүй вэ. Аль эсвэл тооцоолж, мэдсэн ч дургүйд хүчгүй гэгчээр зөвхөн өөрсдийн эрх ашгийг урьтал болгож энэ гүүрийг 42 сая доллараар барив уу.

Тэгвэл энэ талаар нэгэн анхаарал татсан баримтыг МХАҮТ-ын дарга О.Амартүвшин өөрийн цахим хуудаснаа нийтэлжээ. Тэрбээр “Хурдны замын гүүр барих дундаж өртгийн тооцоо. Манай ЗЭЭЛИЙН ГҮҮР хурдных биш. Манайд өртөг хямд. Хамгийн ихээр бодоод 20 саяын өртөгтэй л болох байж. 42 сая доллар нь хүүгийн зардал гэсэн үг мөн үү? Гүүр барих нь сайн хэдий ч бүгдийг тооцож байхгүй бол хэцүү. Энэ 45 саяын ЗЭЭЛИЙН ГҮҮРНИЙ зөвхөн хүүгийн зардалд өдөрт 30 орчим сая төгрөг” хэмээжээ.

Тэгэхээр хурдны зам барих дундаж өртөгийн тооцоогоор жирийн гүүр барих нэрийдлээр хоёр дахин өртөг гаргасан болж таарлаа. Төсөв, өртөг нь ч илүүдсэн, тооцоо судалгаа ч дорвитой хийгээгүй, явган хүний замгүй Замын цагдаагийн гүүрэн гарцыг тойрсон энэ мэт асуудлыг Засгийн газар, Нийслэлийн удирдлагууд яаралтай анхааралдаа авч, шийдвэрлэхийг хүсч байна.

Бид цаашид гүүрний тээврийн хэрэгслийн зорчих хэсгийн нөхцөл байдал ямар байгаа талаар газар дээрээс нь эргэн сурвалжлах болно.