Төв аймгийн Батсүмбэр сум болон Баянгол дүүргийн харьяат дөрөв болон зургаан насны хоёр хүүхэд цахилгаан менингит өвчнөөр өвчилж энэ сарын 12, 13-ны өдөр Халдварт өвчин судлалын үндэсний төвд иржээ. Яаралтай эмнэлгийн тусламж үйлчилгээг үзүүлсэн учраас хүүхдүүдийн биеийн байдал сайжирсан байна.

Цахилгаан менингит өвчний илрэх шинж тэмдгүүд:

• Гэнэт өндөр халуурах

• Цочромтгой болох /хурц гэрэл, дуу чимээ зэрэгт/

• Хүүхэд уйлагнаж ээжийгээ ноолох, гэдэс нь өвдөх /1-2 удаа шингэн суулгах/

• Толгой өвдөх, хоолонд дургүй болох

• Бөөлжих

• Хүзүү хөших, ухаан санаа самуурах

• Бүх биеэр тууралт гарна /Ихэвчлэн хөл, гуяар гарах ба зарим тууралт нь цусархаг шинжтэй болно./

Ихэвчлэн 0-5 хүртэлх насны хүүхдүүд цахилгаан менингит өвчнөөр өвчлөх эрсдэл өндөр байдаг. Ийм шинж тэмдэг илэрмэгц эмнэлгийн байгууллагад яаралтай хандахыг Халдварт өвчин судлалын үндэсний төвөөс анхааруулж байна.