-Хэнтий аймаг яахаараа улсын төсвийн хөрөнгө оруулалтын 17 хувийг хүртээд бусад аймагт халбага долоох төдий хувь оногддог юм бэ?-

Монгол Улсын 2020 оны төсөвт суусан хөрөнгө оруулалтын эрэмбийн жагсаалтыг харахад Хэнтий аймаг нэг номерт эрэмбэлэгдсэн байна. Энэ нь нийт 1.5 их наяд төгрөгийн 17.6 хувийг эзэлж байгаа. Харин Дундговь аймаг хамгийн сүүлийн байрт буюу 21-т эрэмбэлэгдэж 0.3 хувийг хүртэх эрхтэй болсон байх юм. Нийт хэрэгжүүлэх төсөл Хэнтий аймагт 94 байхад Дундговьд 21-хэн байх жишээтэй. Энэ хоёр аймгийн байдлыг статистикээс жишин ажиглахад л Дундговь аймаг нь Монгол улсын нутгийн төв хэсэгт талархаг нутагт говь хээрийн бүсийн зааг дээр оршдог, Онгийн голоос өөр том гол, нуур байхгүй, хамгийн их салхины урсгал цохьдог газар бол Хэнтий аймгийн хувьд олон сайхан голтой, ой модтой дэд бүтцийн хувьд сайн ийм орон нутаг болж таарч байна.

2016 оны байдлаар Дундговь 45 мянган хүн амтай бол Хэнтий 73 мянган хүн амтай. Хорин хэдэн мянган хүнээр илүү байлаа гэхэд Хэнтийн 17.6 хувийг Дундговийн 0.3 хувьтай харьцуулахад мөн ч их зөрүү байна аа даа. Малын тооны хувьд Дундговь 3.8 сая, Хэнтий 4.6 сая мал тоолуулж. Дээд, доод хоёр эрэмбийн туйл болсон энэ хоёр аймгийн жишээнээс харахад аймгуудыг үнэхээр алаг үзэж хөрөнгө оруулалт хуваарилжээ. Бусад 19 аймагт 2.1-6.4 хувийг л ноогдуулсан байгаа нь Дээд тэнгэрээс заяат төрсөн их эзэн Чингис хааны төрсөн нутаг Хэнтий аймгийн хөрөнгө оруулалт авах хэмжээний чигчий хуруунд ч хүрэхгүй байгаа гэсэн үг юм. Хэнтий аймаг УИХ-д даяар дуурсагдах далай даян дархан аваргатай гэж ингэж том хөрөнгө оруулалт авах хувьтай төрсөн нутаг юм уу? Парламентын түүхэнд “дотоожны” хэрэгтэн төрүүлсэн анхдагч аймаг гэдгээрээ түрээ барьж ийм их хувь хүртэв үү гэдэг олон асуултыг Монголын бусад олон аймгийнхан гайхшран байгаа нь нууц биш. Юутай ч аймгуудад оногдох хөрөнгө оруулалт төсөвт хэрхэн тусгагдсан эрэмбээс хэн бүхэн харчих учраас үүгээр жишилтээ зогсооё.