Их эзэн Чингис хааны өдөр, Үндэсний эрх чөлөө, тусгаар тогтнолоо сэргээсний баярыг тохиолдуулан Монгол Улсын Ерөнхийлөгчийн Тамгын газар, Монгол Улсын Их сургууль хамтран “Монголын түүх-Монгол бахархал” сэдэвт эсээ бичлэгийн уралдаан зарласан билээ.

Ерөнхий боловсролын сургуулийн 12дугаар ангийн сурагчид оролцсон эсээ бичлэгийн тэмцээн 2019 оны арваннэгдүгээр сарын 15-ны өдрөөс арванхоёрдугаар сарын 29-ний өдөр хүртэл гурван үе шаттай явагдсан юм. Гурав дахь шатны шалгаруултад 21 аймаг, есөн дүүргээс шалгарсан 36 сурагч “Түүхээс авах бидний сургамж” сэдвээр өөрсдийн оюуны хүч, мэдлэгийн цараагаа сорьж, уралдаанд шалгарсан шилдэг есөн сурагч шагналаа Монгол Улсын Ерөнхийлөгч Х.Баттулгаас гардаж авсан.

Түүхээс авах сургамж бол өнгөрсөн ололтыг батжуулах, алдаанаас дүгнэлт хийх, өнөө үеийнхээ байдлыг тодорхойлох явдал

Монгол Улсын Төрийн соёрхолт түүхч Д.Өлзийбаатар: “Энэ жил ЕБС-ийн 12дугаар ангийн 29 мянган хүүхэд уралдаанд оролцлоо. Эдгээр хүүхдүүдээс хоёрдугаар шатанд найман мянга гаруй хүүхэд шалгарсан. Үүнээс гуравдугаар шатны шалгаруулалтад 36 сурагч шалгарч, Төрийн ордны Иргэний танхимд “Түүхээс авах бидний сургамж” сэдвээр өөрсдийн оюуны хүч, мэдлэгийн цараагаа сорилоо. Эрдэмтэн багш нар шүүж, дүн гаргалаа. Хүүхдүүдийн түүхийн мэдлэг харьцангуй сайн байна. Мөн өөрийгөө илэрхийлэх чадвар сайн болсон байна. Эсээ бичихдээ санал дэвшүүлэх, шүүмжлэлт байдлаар хандсан нь харагдлаа.

Үүнээс гадна нэг зүйл байна. Шагналт байранд нийт есөн хүүхэд шалгарахад нэг ч эрэгтэй хүүхэд байсангүй. Шүүгчдийн бүрэлдэхүүн зөвхөн бичлэг уншсан учир тэрийг мэдэх боломжгүй байсан. Үүнийг анхаарууштай байна. Ерөнхий боловсролын сургалтын явцад эрэгтэй хүүхдүүдийн нийгмийн идэвх оролцоог нэмэгдүүлэх, эцэг эх, багш, сурган хүмүүжүүлэгч нарын зүгээс тавих анхаарлыг сайжруулах хэрэгтэй байна. Шагнал гардуулж байхад Ерөнхийлөгч “Эрэгтэй хүүхдүүд нь хаачсан бэ” гэж асууж байна. Энэ нэг зүйлийг хэлж байна л даа. Эрэгтэй хүүхдүүдэд тавих анхаарал халамжийн чиглэлээр тодорхой ажил боловсруулах болчихсон юм болов уу гэж багш нар болон эрдэмтэд ярьж байна. Түүхээс авах сургамж бол өнгөрсөн ололтыг батжуулах, алдаанаас дүгнэлт хийх, өнөө үеийнээ байдлыг тодорхойлох явдал байдаг. Энэ чиглэлээр түүхийн сургалтын хөтөлбөрийг шинэчлэх, түүхийн хичээлийн нэгдсэн хөтөлбөртэй болох, нэгдсэн сурах бичигтэй болох зэрэг зүйлс яригдаж байна” гэлээ.

Монгол бахархал болсон хүүхдүүдийн төлөөлөл ярьж байна.

Тэргүүн байр, Увс аймгийн Баруунтуруун сумын Ерөнхий боловсролын сургуулийн 12а ангийн сурагч Батцэцэгийн Зүнжиймаа:

“Монголын түүх-Монголын бахархал” сэдэвт эсээ бичлэгийн уралдааны гуравдугаар шатны шалгаруулалт “Түүхээс авах бидний сургамж” нэртэй байсан. Сургамж гэдэг бол өнгөрсөнд болж одоо үр дүн нь гарсан зүйлээс алдаа оноог нь дэнсэлж сургамж авах зүйл. Манай улсын хувьд тарж бутарсан, хоорондоо эв түнжин муу байсан үедээ салж сарниж, бусдын эрхшээлд орсон байдаг. Иймд хамгийн гол зүйл бол эв нэгдлийг сахих ёстой талаар эсээндээ тусгахыг зорьсон”

Дэд байр, Баянхонгор аймгийн “Номундалай” цогцолбор сургуулийн 12ё ангийн сурагч Сэджавын Гантуяа:

“Эх түүхээ багаасаа сурч мэдвэл Монгол хүн болж төрснийхөө хэргийг гаргаж, хаана ч явсан “Би Чингисийн Монгол” гэж омогших үндэс гэж бодож байна. Нөгөөтэйгүүр, эцэг эхчүүд үр хүүхдээ сургааль үгээр хүмүүжүүлэхгүй байгаа юм шиг санагддаг. Дээр үед үр хүүхдээ сургааль, онч үгээр хүмүүжүүлж байсан гэдэг шүү дээ. Харин одоогийн эцэг эхчүүд гар утсаа оролдож, солонгос цуврал үздэг болсон. Хүүхдээ оройтож ирж байна гэхээсээ илүүтэй сургааль үгээр хүмүүжүүлвэл зохистой гэдэг талаас нь эсээгээ бичихийг зорьсон. Манай үеийнхэн түүхээ мэдэж байгаа азтай хүүхдүүд. Энэ жил 12дугаар ангиа төгсөж байгаа хүүхдүүд ЕБС-д зургаан насандаа орсон байгаа. Бусад үеийнхнээ бодвол түүхийн хичээлийг арай илүү мэдэж байгаа гэж бодож байна”