Улсын аварга цол хүртсэн малчид, саальчидтай цахимаар холбогдож мэндчилгээ дэвшүүлэв

Л.Батцэнгэл / Улстөр

УИХ-ын дарга Г.Занданшатар, УИХ-ын гишүүн М.Билэгтийн хамт энэ жил Монгол Улсын аварга малчин, аварга саальчин цолоор шагнагдсан Баянхонгор аймгийн Баацагаан, Баянлиг, Баян-Өндөр, Бууцагаан, Галуут, Гурванбулаг, Заг, Өлзийт, Хүрээмарал сумын малчин, саальчидтай албан өрөөнөөсөө онлайнаар холбогдож, баяр хүргэжээ. Онлайн уулзалтад аймгийн Засаг дарга болон дээрх сумдын удирдлагууд, аварга малчдын хамт оролцсон байна. Баянхонгор аймгийн хэмжээнд өвөлжилт хэвийн, цас зуд багатай, цөөн айл зэргэлдээ аймаг, сумдын нутагт отор хийж яваа юм байна.

УИХ-ын дарга Г.Занданшатар:

-Монгол мал, малчин хоёр бол Монголын баялаг юм. Малчдынхаа хөдөлмөр зүтгэлийг төр засгаас үнэлэн хүндэлж, жил бүр аварга малчдыг тодруулдаг сайхан уламжлалтай. УИХ-ын гишүүд нутаг ус, тойргоосоо тодорсон Улсын аваргуудад биеэр очиж хүндлэл үзүүлэн, шагналыг нь гардуулдаг. Энэ жилийн хувьд цаг зуурын хүндрэл үүссэнтэй холбоотойгоор очиж амжихгүй нь. Төрийнхөө шийдвэрийг иргэн бүр даган биелүүлэх үүрэгтэй. Тиймээс та нартайгаа технологийн дэвшлийг ашиглан, онлайнаар уулзаж, мэндчилгээ дэвшүүлж байгаа юм. Хүн төрөлхтний өмнө тулгарсан сорилт, бэрхшээлийг бид даван туулж чадна гэдэгт итгэлтэй байна. Хэдийгээр Монгол Улсад коронавирусийн халдварын тохиолдол бүртгэгдээгүй ч сэрэмж илүүдэхгүй. Хүнсний бараа болон эмнэлгийн шаардлагатай хэрэгслийн хангамжийг нэмэгдүүлэх, зарим бүтээгдэхүүний гаалийн татварыг багасгах, чөлөөлөх асуудлаар дөнгөж сая Үндэсний аюулгүй байдлын зөвлөл хуралдлаа. Удахгүй Засгийн газрын хуралдаанаар хэлэлцэнэ. Энэ долоо хоногт УИХ-ын Аюулгүй байдал, гадаад бодлогын байнгын хороог хуралдуулахаар төлөвлөж байна. Та бүхэн маань өргөн дэлгэр золгуутаас аль болох татгалзаж, гар утас, дүрст холбоогоор ахмадууд, ахан дүүстэйгээ золгож, монгол ёс заншлаараа мөр зүгээ гаргаж, уул ус, хангай дэлхийдээ сүслэн залбирч, сайхан шинэлээрэй. Ахмадууддаа хүндрэл төвөг учруулалгүй, асран хамгаалахад илүү сайн анхаараарай. Ажил хөдөлмөрөөрөө улсдаа тэргүүлсэн та бүхэндээ болон та бүхний гэр бүл, үр хүүхэд, ахан дүүс, нутгийн зон олондоо баяр хүргэж, цагаан сарын мэндчилгээ дэвшүүлье. Удахгүй цаг сайхан болж, хорио хязгаарлалт тавигдсаны дараа учран золгохын ерөөл тавья гэв.

УИХ-ын гишүүн М.Билэгт “Улаанбаатар хотоос 600-1000 км-ын алс байгаа малчидтайгаа цахимаар нүүр тулан уулзаж байгаадаа баяртай байна. 2019 он Баянхонгор аймгийн малчин түмний хувьд амжит бүтээл дүүрэн жил байлаа. Манай аймаг малаа таван төрөл дээр нь өсгөж, нийт малын тоогоороо улсад зургадугаар байрт орж, тэмээний тоогоороо хоёрт, ямаагаараа улсад тэргүүллээ. Арван нэгэн хүн улсын аварга малчин, саальчин боллоо. Малынхаа төлөө цаг наргүй зүтгэдэг, уйгагүй хөдөлмөрч та нараараа бид бахархаж байна. Та бүхэн бол нөхөн сэргээгддэг, өсөн үрждэг баялгийг бүтээгчид. Тиймээс сар шинийн босгон дээр амьдралын аз жаргал, сайн сайхан бүхнийг хүсэн ерөөе" гэлээ.

Энэ жил Баянхонгор аймгийн Баацагаан сумын малчин Ж.Ганзориг, Баянлиг сумын малчин С.Банди, Баян-Өндөр сумын малчин З.Батцоодол, Бууцагаан сумын малчин Б.Магвансүрэн, Галуут сумын малчин Х.Амгаабазар, Гурванбулаг сумын малчин Д.Цэндсүрэн, Заг сумын малчин Б.Лувсанбат, Өлзийт сумын малчин Б.Бат-Олдох, Хүрээмарал сумын малчин А.Батдэлгэр, С.Сумъяабазар нар Улсын аварга малчин, Өлзийт сумын саальчин С.Оюунчимэг Улсын аварга саальчин болсон юм.


Сэтгэгдэл

Batmen [37.201.171.30] 2020-02-19 03:18:46

Shagnaliig ni shuudangaar ybuul tegeel boloo zardal mungu baga tasna.

ИРГЭН [103.212.116.183] 2020-02-18 12:19:12

Онлайн гэдгийн чинь цаана Баянхонгрт өдий олон хүн нэг дор цугларч байгааг мэдэрдэггүй ээ.хамраасаа цааш хардаггүй ээ.Энэ бол өргөн золголтын эх болчих вий.

Зочин [103.57.94.121] 2020-02-18 11:33:14

Эгчийн инээж байгааг, Ёстой гоцойтол инээж байна даа

Зочин [202.126.88.227] 2020-02-18 10:54:45

Дарваагаад болилдоо дараа нь болдогүй юм уу.Гудмаар явж амьдралтай танилц .гэх хороололоор яв л даа. Нэг ч гэсэн хүнийг ажилтай орлоготой болгол доо.

Зочин [103.229.121.214] 2020-02-18 10:48:27

Одоо аврага малчин энэ тэрээ болимоор юм. Дээр үед мал өсгөх зорилго байсан бол одоо тоо толгойг нь багасгахгүй бол бэлчээргүй газар нутаг маань цөлжөөд байгааг мэддэг пм болов уу. Эцсийн эцэст өөрсдийнх нь л амьжиргааны эх үүсвэр шүү дээ. Тэгээд ч одоо малын хөлийн татвар авдаг болох хэрэгтэй. Ялангуяа ямаанаас өндөр татвар авдаг байх ёстой,

Зочин [202.179.31.45] 2020-02-18 11:13:48

байсаар ирсэн байх ч болно, мал малчин хоёр монолыг тээж авчирсан юмаа хуцаж донгосолгүй урагшаа явж сарьсан багваахай гударч амьдар


6 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
6 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.