2015 онд Засгийн газраас Тавантолгойн нүүрсний ордыг ашиглах консорциумтай гэрээ байгуулахаар төлөвлөж байв. Тухайн үед УИХ-ын дарга байсан З.Энхболд “Тавантолгойн ордыг ашиглах гэрээ, хэлэлцээрийг Улсын Их Хурлаар хэлэлцүүлэхгүйгээр өнөөдөр гарын үсэг зурах шийдвэр гаргасан, гарын үсэг зурахаар оролдсон сайд нарт хариуцлага тооцон огцруулах болно” хэмээн хатуу мэдэгдэж байсан. Ийнхүү Тавантолгойн хэлэлцээрийг зогсоож, тус ордыг аварч монголчуудад үлдээсэн. Өөрөөр хэлбэл УИХ-ын дарга асан Зандаахүүгийн Энхболд тэр үед Таван толгойн ордыг авч үлдэх шийдэмгий үг УИХ-ын чуулганы танхимд хэлээгүй бол ард түмний Тавантолгойн орд өрийн барьцаанд орж, Хятадын компанид шилжих байжээ. Одоо энэ ордыг эзэмшигч нь жилд нэг тэрбум долларын борлуулалт хийдэг үндэсний, төрийн өмчит “Эрдэнэс Тавантолгой” ХК юм.

“Эрдэнэс Тавантолгой” компани энэ оны хоёрдугаар сарын 17-ны өдөр хийсэн мэдээлэлдээ хувьцаа эзэмшигч хүн бүрт ногдол ашиг тараах болсноо зарлаж, компанийн үйл ажиллагаа ногдол ашиг хуваарилах хэмжээнд зүй ёсоор хүрсэн гэв. Гэвч 1072 хувьцаанд ногдох 96 гаруй мянган төгрөг ард иргэдэд бодит хөрөнгө оруулалт болж чадах уу гэдэг асуултыг тэдэнд тавья.

1072 хувьцааг нийт нэг сая 80 мянга гаруй иргэд эзэмшдэг. Хэдийгээр үүнийг бэлэн мөнгө тараалт биш хэмээн мэдэгдсэн ч бодит байдалд хий хоосон зарлага, бэлэн мөнгө тараалт болохыг юу гэж тайлбарлах вэ?

Таван толгойн ногдол ашиг тараах нэрийдлээр сонгуулийн өмнөх “шоу” хийхийн оронд Монгол орны хамгийн эмзэг сэдэв болсон эрүүл мэндийн салбартаа хөрөнгө оруулалт хийж эхэлбэл ард иргэдэд чиглэсэн бодитой хөрөнгө оруулалт болох биш үү.

Ханиад томууны улирал хэдийнэ эхэлж, үр хүүхдэддээ санаа зовнисон, тэднийгээ тэврээд эмчид үзүүлэх оочир дараалалд зогсож буй эцэг эхчүүдийн танил дүр зургийг өнөөдөр аль ч эмнэлгээс ороод харж болохоор байгаа. Эх хүүхдийн ганц эмнэлэг, гарын таван хуруунд тоологдох хүүхдийн эмчтэй дүүргийн хэдэн эмнэлэгт эцэг эхчүүд өвчтэй хүүхдээ эмчид үзүүлэхээр “царайчилдаг” дүр зураг олон жил явж ирлээ. Дахин асууя,

Арван жил барьж байгаа хүүхдийн эмнэлэг хэзээ ашиглалтанд орох вэ?

Хан-Уул дүүргийн 10 дугаар хорооны нутаг дэвсгэрт баригдаж байгаа 300 ортой хүүхдийн эмнэлгийн барилга арван жил баригдаж байна. Тус эмнэлгийг барих шийдвэр одоогоос есөн жилийн өмнө гарч, Засгийн газар,“Нийслэл өргөө” компани, “Пума” консерциумтай гэрээ байгуулан улсын төсвөөс 17.7 тэрбум төгрөгөөр санхүүжүүлж барилгыг эхлүүлж байжээ. Гэтэл нэмэлт санхүүжилт шаардлагатай болсноор 2013 онд барилгын ажил зогссон. Нөхцөл байдалд бодитоор хандаж, иргэдэд “жинхэнэ” хөрөнгө оруулалт хийх Монголын төр хаана байна? Тавантолгойн ногдол ашгаар хийж буй амьгүй албатуудын шоуг зогсоож өгөөч Ерөнхий сайд аа.