Монгол Улсын Ерөнхий сайд У.Хүрэлсүх өчигдөр нэлээд шидрүүхэн мэдэгдэл хийв. Тэрээр “Одоо засаглах цаг иржээ. Ерөөс хаана, хорино, шийтгэнэ гэдэг арга хэмжээ рүү орцгооно. Ингэж гэмээнэ үүсээд буй хүнд нөхцөл байдлыг бид давахаар байна. Иргэн хүн иргэнийхээ үүргийг биелүүлэх ёстой. Тогтоол шийдвэр, захирамжуудыг хэрэгжүүлэхгүй бол хатуу хариуцлага тооц. Улс үндэстний аюулгүй байдлын асуудал яригдаж байгаа тул дүрэм журмыг чанд сахиул. Тиймээс хорио цээрийн дэглэмийг ирэх даваа гараг хүртэл сунгах нь зүйтэй. Эс тэгвэл хорио цээр тавигдмагц хөдөө, орон нутаг руу золголтоо хийх гээд явцгаана, эмх замбараагүй байдал үүсгэнэ. Ард түмэн бухимдана, дургүйцнэ гэж айх хэрэггүй. Энэ бол нэг хоёр хүний эрх ашгийн асуудал биш. Хэл ам гарах юм байна, олон түмэн бухимдах юм байна гэсэн асуудал байхгүй. Энэ бол улсын аюулгүй байдалтай холбоотой асуудал” гэлээ.

Коронавирусийн халдварын тохиолдол 80 гаруй мянга болж, нас барагсдын тоо гурван мянгад дөхөж буй үед шийдвэр гаргах түвшний хүн ийм шийдвэр гаргахаас өөр яахав. Тэр аюулт цар тахлаар БНХАУ-аас гадна гуч дөчин улсад халдварлаад байна. Энэ бол гамшиг. ЭМЯ-ны Тандалт шуурхай удирдлагын хэлтсийн дарга Д.Нарангэрэл “Цагаан сарын баярыг Монгол Улсын Ерөнхийлөгч, Засгийн газар болон Улсын онцгой комиссын шийдвэрээр зөвхөн гэр бүлийн хүрээнд тэмдэглэхээр шийдвэрлэсэн. Шинэ төрлийн вирус нь агаар, дуслын замаар халдварладаг. БНХАУ-ын Хубэй мужийн Ухань хотод анх халдвар гарсан боловч одоогийн байдлаар дэлхийн олон оронд тархаад байна. Энэ нь БНХАУ-ын хаврын баярын үеэр олон сая хүн шилжилт хөдөлгөөн хийсэнтэй холбоотой гэж үзэж байгаа. Эрдэмтэн судлаачдын үзсэнээр олон хүн нэг дор цугларч, ахмад настнуудтай уулзсантай холбоотой. Нэг тавагтай хоолноос олноороо хувааж идсэн нь уг вирусийн халдвар тархах хамгийн том хүчин зүйл болсон” гэсэн.

Ерөнхий сайдын хаана, хорино, шийтгэнэ гэснийг буруутгах хүмүүс олон байх шиг байна. Гэвч өнөөгийн нөхцөлд бол түүний эл шийдвэр нүдээ олсон шийдэл. Өөр яах ёстой байв. “Та нар тавтай сайхан зугаал. Тахлын вирус тараа” гээд хил гаалиа нээж, хөдөө гадаагүй хөл хөс болох ёстой байв уу. Түүний энэ хатуухан шийдвэр харин ч цөөхөн монголчууд бидэнд чухам авралын од болно. Төөрсөн хүн алтан гадсаар баримжаалж газрын байдал, зүг чиг, тэнгэрийн байц, цаг хугацааны баримжаа авдаг. Төөрсөн хүнд тэгвэл зөв чиг болох үг хэдий хатуу байвч тус болдог. Иймээс ч “Эм хэдий гашуун ч өвчинд тустай, үг хэдий хатуу ч явдалд тустай” гэдэг. Өвчлөл их байгаа Япон, Солонгосын нислэгийг зогсоох чиг өгсөн нь бас л зөв алхам болсон. Хэрвээ тэр коронавирус хэмээх аймшигт нян ороод ирвэл гуравхан сая хүнтэй Монгол Улсад ёстой сүйрэл болох нь дамжиггүй. Тахалтай газраас хүн бүхэн, улс бүхэн цээрлэж цэрвэж буйг анхаарч анзаарч л байх хэрэгтэй. Ер нь ч байгалийн жам тийм. Ёс бус бүхнээс дайждаг.

Улс үндэстнийхээ аюулгүй байдлын төлөө улсын Ерөнхий сайд хүн зоригтойхон дуугарч байх нь зөв. Өмнөд хөрш, Өмнөд Солонгос бүгд л аядуу намдуу бодлого баримталж байж өвчин тахлын аюулын цар хүрээг анхаарлынхаа төвөөс тавиад туучих шиг боллоо. Манайд ч бас зуурсан гурил шиг нялцгай аашилбал цөөхөн хүн гэлгүй өвчний дэгдэлтийг тавиад туучих магадлал өндөр. Цар тахал агаар дуслын замаар, амьсгалаар халддаг болохоор тун аюултай. Амны хаалт зүүгээгүй нөхдийг ч одоо торгож эхлэх хэрэгтэй. Амиа хайрлаагүйн төлөө биш бусдын үнэ цэнтэй амьдралыг булаах гэснийх төлөө нийгмийн ийм шахалт зайлшгүй хэрэгтэй. Хүний нийгэм юун төлөө “нэг нь нийтийн төлөө, нийт нь нэгийн төлөө” гэсэн алтан сайхан уриатай билээ дээ. Анзаарч байхад манай төр засгийнхан харин энэ өвчнийг улс эх орныхоо үүдээр оруулчихгүй сан гэж нэг жолоо цулбуурын дор санаа зүтгэл нэгдэж байгаа нь сайшаалтай. Цаашид ч эвтэй нэгдэлтэй, нэгэн удирдлагатай байхад аюулт өвчнийг хазаарлан хязгаарлах эрчис эрчимтэй байх нь тодорхой юм. Хорин хүн эвгүй байваас эвдэрхий балгас мэт хэврэг, хоёр хүн эвтэй байвал төмөр хэрэм адил дийлдэшгүй бат гэдэг үгийн үнэ цэн ч үүнд байгаа нь тодорхой. Хүрэлсүхийн чангахан шийдвэрийн цаана ард түмнээ гэсэн зөөлөн эмзэглэл нуугдаж байгаа нь харагдаж байна аа.