Монголын нийгэмд хурцаар шүүмжлэгдэж байгаа олон асуудлын нэг нь улстөрчид, төрийн албан хаагчид, тэдний хамаарал бүхий этгээдүүд оффшор бүсэд данстай байх явдал.

Төрийн өндөр албан тушаал хашиж байгаа хүмүүс, улстөрч, төрийн албан хаагчид, тэдний хамаарал бүхий этгээдүүд оффшор дансанд мөнгөн хөрөнгөө байршуулах, хууль бусаар олсон хөрөнгө мөнгөө татвараас болон хууль хяналтын байгууллагаас нууж буй нь тухайн хөрөнгийн гарал үүсэл хууль ёсны эсэх, татвараа шударгаар төлсөн эсэх, хөрөнгө орлогын мэдүүлгээ үнэн зөв мэдүүлсэн эсэх зэрэг олон эргэлзээг бий болгож байна. Манай улс оффшортой тэмцээд нэлээдгүй олон жилийг ардаа орхижээ. Энэ хугацаанд Оффшорын тухай хууль хүртэл батлагдав.

Төрийн өндөр албан тушаал тасралтгүй хашиж байсан хүний оффшор бүсэд байгаа мөнгийг олж тогтоосон тохиолдолд:

• Тухайн мөнгийг хөрөнгө орлогын мэдүүлэгтээ огт дурдаагүй, өөрийнх нь хөрөнгийн хэмжээнээс давсан бол энэ мөнгө нь төрийн мөнгө гэдгийг нь батлах ёстой.
• Хэрэв баталж чадвал энэ мөнгийг авах эрх нь нээгддэг зарчим бусад оронд байдаг.

Авлигатай тэмцэх газраас 17 тэрбум төгрөг татваргүй бүсэд эргэлдэж байгаа талаар мэдээлсэн боловч сүүлд хийсэн судалгаагаар 31 их наяд байх магадлалтай гэжээ. Түүнчлэн Монгол Улсын 49 иргэн, аж ахуйн нэгжийн нэр оффшор данстай холбогдсон 29 иргэнээс 23 нь төрийн албанд ажиллаж байсан болон хамааралтай байгааг мэдэгдсэн байдаг. Ийнхүү Монголын оффшорчид нэмэгдэж “тэнд” байгаа мөнгө хэдэн арваар үржигдсээр байна.

Ардчилсан намын даргын ахлах зөвлөх З.Энхболд: “Оффшор бүсэд байршсан мөнгөн хөрөнгийг эргүүлэн татах боломжууд” сэдэвт сургалт хэлэлцүүлгийг нээж хэлсэн үгэндээ “Одоогоор Монгол оронд 80 төрлийн ашигт малтмалын 1170 орд, 8000 шахам илрэл бүртгэгдсэн байна. Бүртгэгдээгүй олон баялаг хөрсөн дор байна. Энэ баялаг сүүлийн 20-30 жил эргэлтэд оржээ. Өнөөдөр Монголын экспортын 94 хувийг уул уурхай дангаар эзэлж байна. Гэтэл гурван сая хүний 40 хувь нь ядуу байна. Хэрэв бид ийм их баялаг экспортолсон юм бол Монгол Улсын Үндсэн хуулийн 6.1-д заасны дагуу энэ баялаг нийт ард түмэнд хүртээлтэй байх ёстой юм. 30 гэр бүл гэдэг нэр томъёо ингэж гарч ирсэн. Оффшорын дансны эздийг сүүлийн хоёр жилд гурав дахь удаагаа зарлалаа. Түүнээс өмнө бид оффшор данстай хүмүүсийнхээ нэрийг мэддэггүй байсан. Одоо бол хэн гэдэг гишүүн, хэн гэдэг сайд, хэн гэдэг бизнесмэн хаана данстай байгааг мэдсэн. Дансан дотор нь хэд байгааг мэдэхгүй байгаа” гэж байв.

Анх Олон улсын эрэн сурвалжлах сэтгүүлчдийн консорциумаас УИХ-ын дэд даргаар ажиллаж асан С.Баярцогтыг оффшор бүсэд ихээхэн хэмжээний мөнгөн хадгаламжтайг илрүүлж, 2013 онд УИХ-ын гишүүн асан С.Баярцогт оффшор данстай гэдгээ өөрөө хүлээн зөвшөөрсөн байдаг.

Төрийн өндөр албан тушаал хашиж байгаа хүмүүс, улстөрч, төрийн албан хаагчид, тэдний хамаарал бүхий этгээдүүд оффшор дансанд мөнгөн хөрөнгөө байршуулан хууль хяналтын байгууллагаас нуусаар байна. “Өнөө цагийн хамгийн адгийн шаар, луйварчдын эцсийн орогнох газар нуугдах үг нь эх орон, ард түмэн болжээ” гэдэг үг хүртэл бий. Эх орончдын дүрд тоглосон эрх мэдэлтнүүдийн дэргэд энгийн ард түмэн улс эх орныхоо аюулгүй байдлын төлөө сэтгэл зүрхнээсээ хандив өргөж эхэллээ.

ФОТО: Оффшорчид биш энгийн иргэд ЭХ ОРОНДОО хандив өргөж байна

Ж.Дашдаваа: Би өөрийнхөө болон гэргийнхээ нэг сарын тэтгэврийг хандивлаж байна

Монгол Улсын иргэн Ж.Дашдаваа өөрийнхөө болон гэргийнхээ тэтгэврийн мөнгийг нэгтгэн нэг сая төгрөгийг ЭМЯ-нд хандивлалаа.

Ж.Дашдаваа “Монгол түмэн маань аливаа бэрхшээлийг давж туулсаар ирсэн. Давж туулах ч болно. Дэлхий дахинд тархаж буй аюулт коронавирусын халдварын эсрэг хүн бүр хүчээ нэгтгэж, сонор сэрэмжтэй байх хэрэгтэй. Би өөрийнхөө болон гэргийнхээ нэг сарын тэтгэвэр болох нэг сая төгрөгийг ЭМЯ-нд хандивлаж байна. Миний хандив бага ч гэсэн дуслыг хураавал далай болдог” гэлээ.

Зусландаа тарьж ургуулсан чацаргана жимсээ 100 мянган төгрөгийн хамт хандивлав

С.Буриад, Л.Цэдэв нарын гэр бүлийн хамт олноос Дэлхий дахинд ирсэн аюулт өвчнийг анагаахад тус дэм болгож 100 мянган төгрөгийг зусландаа тарьж ургуулсан чацаргана жимсний дээжийн хамт хандив өргөв. Тэрээр, “Энэ аюулт өвчнийг эх орондоо оруулахгүй хамгаалж байгаад танай яамны хамт олонд талархаж, амжилт гаргахыг хүсэн ерөөе” гэжээ.

С.Амармандах: Би Монгол Улсын иргэний хувьд ирээдүй хойч үеийнхээ төлөө, эрүүл мэндийн төлөө сэтгэл зүрхнээсээ хандив өргөж байна

“Хар сарнай” хамтлагийн ахлагч, дуучин С.Амармандах коронавирусын халдвар, тархалтаас сэргийлэх ажилд нойр, хоолгүй зүтгэж байгаа эрүүл мэндийн байгууллагын ажилчдын хамгаалах хэрэгсэл, хувцас хэрэглэл авахад зориулж хувиасаа 30 сая төгрөг хандивлалаа.

“Хар сарнай” хамтлагийн ахлагч, дуучин С.Амармандах: "Дэлхий дахинд тархсан аймшигт коронавирусын халдварт өвчин эх гараг дэлхийг минь айлгаж байна. Өдөр шөнөгүй, нойр хоолгүй ажиллаж байгаа манай эрүүл мэндийн ажилтнууд, ОБЕГ, Цагдаагийн байгууллага болон МХЕГ-ын нийт хамт олонд баярлалаа. Би Монгол Улсын иргэний хувьд ирээдүй хойч үеийнхээ төлөө, эрүүл мэндийн төлөө сэтгэл зүрхнээсээ хандив өгөхөөр хүрэлцэн ирлээ. Өөрийнхөө зүгээс 30 сая төгрөг болон 1500 маскыг гардуулан өгч байна" гэлээ.

Алдарт эхийн одонгийн мөнгөө хандивлалаа

Алдарт эхийн одонт дөрвөн хүүгийн ээж Ч.Байгалмаа, Монгол хэлний сургалтын төвийн багш Ц.Цэрэнчимэг нар ЭМЯ-нд Алдарт эхийн одонгийн мөнгөө хандивлалаа.

Д.Дагвадорж: Иргэний үүргээ биелүүлэх эх орноо гэх сэтгэл гэгэлзээд сайхан байна аа

Монгол Улсын хөдөлмөрийн баатар, гавьяат тамирчин, мэргэжлийн сүмогийн 68 дахь их аварга, Асашёорюү Д.Дагвадорж онц ноцтой тахлын үед хэрэглэх 400 хувцас, хэрэглэлийг Эрүүл мэндийн яаманд хандивлалаа.

Тэрбээр өөрийн цахим хуудаснаа "Аса нь чадлаараа л гүйлээ. Олон улсын чанарт нийцсэн онц ноцтой тахлын үед хэрэглэх битүү хувцас 400 ширхэг бэлдлээ! Энэхүү битүү хувцсыг Эрүүл мэндийн яаманд өгөхөөр боллоо. Хэрэгтэй газартаа үтэр түргэн хүргэж өгөөрэй. Иргэний үүргээ биелүүлэх эх орноо гэх сэтгэл гэгэлзээд сайхан байна аа" гэжээ.

Улаан загалмай нийгэмлэг 3000 ширхэг маск хандивлажээ

Улаан загалмай нийгэмлэг дэлхий дахинд ид дэгдээд буй коронавирусын халдварын энэ үед эрүүл мэндийн салбарт ажиллаж байгаа эмч, сувилагч болон нийт ажилтнуудын аюулгүй байдлыг хангахад дэмжлэг болгон 3000 ширхэг нэг удаагийн маскны тусламж үзүүлж, ЭМЯ-ны удирдлагуудад гардуулан өглөө.

Б.Баярмагнай: Муу муухай бүхэн Монголоос минь холуур байг

МУГЖ Б.Баярмагнай хандивын аянд нэгдэж Япон улсад үйлдвэрлэсэн, халдвар хамгаалалтын 10 мянган бээлийг ЭМЯ-нд хандивлалаа.

Тэрээр "Иргэний үүргээ биелүүлж энэ хүнд үед аюулын голомтод ажиллаж байгаа эмнэлгийн ажилчдаа хамгаалах үүднээс Япон улсад үйлдвэрлэсэн нэг удаагийн бээлий 10,000 ш -ийг ЭМЯ - ндаа бэлэглэлээ. Муу муухай бүхэн Монголоос минь холуур байг" хэмээн өөрийн цахим хуудаснаа нийтэлжээ.

"Нандин эрдэнэ" сувиллаа үнэ төлбөргүй ашиглуулахаар боллоо

Хөгжлийн бэрхшээлтэй иргэн н.Оюунцэцэг хөл хорионы хүнд үед өөрийн эзэмшлийн таван давхар "Нандин эрдэнэ" сувиллаа үнэ төлбөргүй ашиглуулахаар ЭМЯ-нд ханджээ.

10 сая төгрөгийн контентыг бэлтгэн олон нийтэд түгээнэ

“Аймар санаа” контентын хамт олноос COVID-19-ийн аюултай нөхцөл байдал үүсээд буй өдрүүдэд уг тахлын эсрэг тэмцэхэд Монгол Улсын эрүүл мэндийн яаманд COVID-19-ийн эсрэг 10 сая төгрөгийн контентыг бэлтгэн, мэдээ мэдээллийг өөрийн олон нийтийн цахим сувгуудаар түгээж дэмжлэг үзүүлэхээр боллоо.

Г.Өсөхбаяр 5000 ширхэг амны хаалт хандивлав

МУГТ, Далай даян, дархан аварга иргэн Г.Өсөхбаяр ЭМЯ-нд 5000 ширхэг амны хаалт өглөө.

Тэрээр, “Аюулт өвчин гараад нэлээд хугацаа өнгөрлөө. Ийм үед иргэн бүр хариуцлагатай байж, мөн өөрийн боломж бүхнээр аюулт тахлаас урьдчилан сэргийлэхэд оролцох ёстой гэж би бодож байна. Тиймээс өнөөдөр гэрийн бүлийнхээ өмнөөс монголчууддаа эрүүл энхийг хүсэж, 5000 ширхэг амны хаалтыг хэрэгцээтэй газар нь хүргэж өгөөрэй гэж нэмэр болж байна. Аюулт өвчин холуур тойрч, Монгол түмний минь хийморь золбоо өөдөө байхын ерөөл өргөе!” гэжээ.

Д.Доржпүрэв: Миний гэр бүл, хамт олноос 20 сая төгрөг хандивлалаа. Шаардлагатай бол унаа тэргээр дэм болъё

Иргэн Д.Доржпүрэв, түүний гэр бүл, хамт олноос 20 сая төгрөг хандивлаж, ЭМЯ-ны удирдлагуудад гардуулан өглөө. Тэрээр, “Монголчууд хөнөөлт вирусын халдвараас хүчээ нэгтгэвэл урьдчилан сэргийлж чадна. Монголчуудын эрүүл мэндийн төлөө олон мянган хүн алба хаагч цаг наргүй ажиллаж байна. Хамгийн эрсдэлтэй нөхцөлд ажиллаж байгаа эмч, эмнэлгийн ажилчдын аюулгүй байдлыг нэн тэргүүнд хангах шаардлагатай. Үүнд чадлынхаа хэрээр дэм болох ёстой гэж бид үзсэн юм. Эрсдэлтэй бүсэд ажиллаж байгаа алба хаагч нарын аюулгүй байдлыг хангах, зориулалтын хувцас хэрэглэлээр хангахад зориулж миний гэр бүл, хамт олноос 20 сая төгрөг хандивлалаа. Шаардлагатай бол унаа тэргээр дэм болъё” гэлээ.

1000 лам нэгдэж нийт 10 сая төгрөг хандивлалаа

“Монгол лам нарын бүлгэм групп”-ээс өрнүүлсэн “Асралын аян”-д 1000 лам нэгдэж нийт 10 сая төгрөг, 500 ширхэг хамгаалалтын бээлийг Улсын онцгой комисст гардууллаа.

52 дугаар сургуулийн хамт олон нэг өдрийн унааны зардлын мөнгөө хандивлав

Нийслэлийн EБС-ийн 52 дугаар сургуулийн хамт олон нэг өдрийн унааны зардлын мөнгө болох нэг сая нэг зуун дөчин мянган төгрөг цугласныг ЭМЯ-нд гардууллаа.

"Ажилтны 10 мянган төгрөг” сайн дурын аяныг өрнүүлжээ

Үндэсний хөрөнгө оруулалтын банкнаас "Ажилтны 10 мянган төгрөг” сайн дурын аян зарлаж, нэг сая нэг зуун тавин мянган төгрөг цугласныг ЭМЯ-нд гардуулсан байна. Түүнчлэн "Монхимо" ХХК- Санитоль 70% 30гр 1000 ширхэг, Ам зайлах 07% 1000 ширхэг, Санитол 70% 300гр 1000 ширхэг, нэг удаагийн амны хаалт 3000 ширхэг, Белизна 1л 48 ширхэг

Монголын үндэсний хүүхдийн кино академи- Даавуун маск 200 ширхэг

"Тотодентал" ХХК- Спирттэй ариутгагч сальфетка 480 ширхэг

Herbalife nutrition tab team багаас- 41,7 сая төгрөг

Монголын Гастроэнтрологийн холбоо, Монголын Интервеншналь Эндоскопын нийгэмлэг- Хоёр сая төгрөг

БГД-ийн IY хорооны иргэн Д.Гочоо, Д.Долзодмаа – Нэг сая төгрөг

"Сэлбэ плаза" ХХК– Нэг сая төгрөг

"Хөх шугам" ХХК – Нэг сая төгрөг тус тус хандивлалаа.

Улс орон даяар шинэ төрлийн коронавирусын халдвараас сэргийлэх хандивын аян эрчимтэй өрнөж байна. Харин улс төрчид сонгуульдаа бэлдэж байна.