Засгийн газар сар гаруйн өмнө нэг кг ноолуурыг 100 мянган төгрөгөөр авна. Хөгжлийн банкнаас 300 тэрбум төгрөг гаргана гэдэг мэдэгдлийг хийсэн. Гэтэл өнөөдөр ноолуур зарим аймгуудад 40-50 төгрөгийн үнэтэй байна. Харин Сүхбаатарт 100 мянган төгрөгийн ханштай байгаа. Өмнөх жилүүдэд ноолуурын ханш аймгуудад ийм зөрүүтэй тогтож байсан удаагүй.

ЗАРИМ АЙМАГТ НЭГ КГ НООЛУУР ШУУДАЙ ГУРИЛЫН ҮНЭД Ч ХҮРЭХГҮЙ БОЛОЛТОЙ

Манай улс оны эцэст 70.9 сая мал тоолуулсан бөгөөд энэ жил 10.2 мянган тонн ноолуур бэлтгэх тооцоолол байгаа. Гэвч үүссэн нөхцөл байдлаас үүдээд ноолуурын салбарт эрсдэл үүсч эхэлсэн бөгөөд малчид ноолуураа өгөхгүй 100 мянга хүрэхийг нь хүлээсээр байгаа. Монгол улсын хэмжээнд 300 мянган малчин өрх орлогоо нэмэгдүүлэх боломжгүй болчихсон бөгөөд банкныхаа зээлийг төлж чадахгүйд хүрчээ. Салбарын сайд нь “Ноолуураа хадгалж бай, нэг кг нь 100 мянган төгрөгт хүрнэ.” гэж горьдоосоор байсан ч зарим аймагт нэг кг ноолуур шуудай гурилын үнэд ч хүрэхгүй бололтой. Ноолуураа дэлхийн зах зээлд гаргахад хүндрэлтэй болсон гэдгээ эхнээсээ мэдэгдэж, хадгал гэж хэлээгүй бол нэг кг ноолуур 45-50 мянган төгрөгийн үнэтэй байхад нь тушааж, өрөө хагаслах байсан талаараа малчид ярьж байна. Малчид банкныхаа зээлийг жил бүр ноолуурынхаа мөнгөөр төлдөг. Гэвч энэ жилийн хувьд тэд зээлээ төлж чадахгүй байдалд хүрчээ.

МАЛЧДАД БАС НЭГЭН ХООСОН ГОРЬДЛОГЫГ БИЙ БОЛГОЛОО

Энэ цар тахлын үеэр хэн Монголд орж ирж, нэг кг ноолуурыг 100 мянган төгрөгөөр авах вэ. Малчдад хоосон горьдлого төрүүлж байхаар эртхэн үнэнээ хэлээд, бодит үнэнтэй нь нүүр тулгасан нь дээр биш үү. УИХ дахь МАН-ын бүлгийн хэсэг гишүүд нэг кг ноолуур тутамд 20 мянган төгрөгийн урамшуулал олгох хуулийн төсөл санаачилснаа бас зарласан. Эдийн засаг хүнд байгаа үед энэ амлалт хэрхэн хэрэгжихийг бид таашгүй. Тэд малчдад бас нэгэн хоосон горьдлогыг бий болголоо.

Ноолуурын үнэ болон нэг кг ноолуур тутамд 20 мянган төгрөгийн урамшуулал олгох асуудлын талаар УИХ-ын гишүүдийн байр суурийг хүргэж байна.

Ч.УЛААН САЙД ҮНЭ ТОГТООГООД ЗАХ ЗЭЭЛИЙН ЗАРЧМААР ЯВЖ БАЙСАН НООЛУУРЫН ҮНИЙГ УНАГААЧИХСАН

УИХ-ын гишүүн Д.Эрдэнэбат: МАН-ын гишүүд ноолуур кг тутамд 20 мянган төгрөгийн нэмэгдэл өгнө гээд байна. Засгийн газраас кг ноолуурыг 100 мянган төгрөгөөс буулгахгүй гээд зарлачихсан шүү дээ. Ноолуур үйлдвэрлэгчдэд 300 тэрбум төгрөгийн хөнгөлөлттэй зээл олгоно гээд шийдчихсэнийг Ч.Улаан сайд үнэ тогтоогоод зах зээлийн зарчмаар явж байсан ноолуурын үнийг унагаачихсан. Одоо тэгээд 20 мянган төгрөг өгнө гэж юу яриад байгаа юм бэ. Энэ чинь ноолуурын үнийг нэг мөсөн унагааж, шалан дээр хаячихлаа. Ингэж ард түмнээр тоглож болохгүй. Бид энийг одоо батлах уу. Шинэ коронавирусын халдварын үед иргэдийг ялгаварлахгүйгээр дэмжих бодлого барих ёстой. Энд эмч, тариаланч, малчин байна уу ялгаагүй шүү дээ. Ийм улс төр хийхээ боль. Төрийн зохицуулалт хийж болдог, болохгүй зүйл бий. Энэ тогтоолын төслөө татаж ав.

НҮГЛИЙН НҮДИЙГ ГУРИЛААР ХУУРСАН ТОГТООЛЫН ТӨСӨЛ ЗАСГИЙН ГАЗАРТ ХҮРГҮҮЛСЭН БАЙНА

УИХ-ын гишүүн Б.Пүрэвдорж: Нэг кг ноолууранд 20 мянган төгрөг олгох хуулийн төслийг өргөн барьсан. Тэгэхээр Дорнод, Сүхбаатар аймгийнхан дунджаар 73 мянган төгрөгөөр бүх ноолуураа зараад дууссан. 20 мянган төгрөгийн урамшуулал ноолуураа зарсан, падаангүй хүмүүст очихгүй. Ингэж хүмүүсийг хуурч болохгүй. 20 мянган төгрөгийн тогтоолын төслийг өргөн барьж, кг тутамд өгнө гэж байдаг. Гэтэл падаангүй хүмүүс үүнийг чинь авахгүй шүү дээ. Нүглийн нүдийг гурилаар хуурсан тогтоолын төсөл Засгийн газарт хүргүүлсэн байна.

МАЛЧДЫН ГОЛ ОРЛОГОО ОЛДОГ ЮМААР НЬ УЛС ТӨР ХИЙЖ, ТОГЛОЖ, АЖ АХУЙГ НЬ СҮЙРҮҮЛЖ БОЛОХГҮЙ

УИХ-ын гишүүн Д.Хаянхярваа: Ч.Улаан сайд аа одоо та болно. Одоо бид шударга ярих ёстой. Өнөөдөр дэлхий нийтийн хэмжээнд ноос ноолуурын үнийг өсгөх нь бүү хэл яаж хүн амаа хоолтой байлгах вэ гэдэг нь чухал асуудал болоод байна. Гэтэл та ноос, ноолуурынхаа үнийг дэлхийн зах зээлд өсгөж зарна гэдэг шал худал зүйл яриад байна. Ингэж болохгүй. Энэ чинь ноолуураараа амьдарлаа залгуулдаг малчдад гай болно. Үүнийг Монголчууд ч ойлгох хэрэгтэй.

Ч.Улаан сайдын яриад байгаа энэ асуудал бүтэхгүй. Ерөнхий сайдад та буруу мэдээлэл өгөөд байна. Ингэж болохгүй. Ноолуур бэлтгэдэг ААН-үүдийн 30-хан хувьд нь 300 тэрбум төгрөгийн зээл гаргахад үндэсний үйлдвэрлэгчид чинь үүнийг авч чадахгүй гэж байна. Гэтэл цөөхөн хэдхэн аймагт ноолуурын дундаж үнэ 105 мянга хүрч байна гэдэг үлгэр яриад сууж байна. Энэ чинь Монголчуудыг хуурч байгаа хэрэг. Хуучин цагийн төвлөрсөн, төлөвлөгөөт эдийн засгийн бодлогоосоо сал сайд аа. Таны удирдлагад ажиллаж байсан хүний хувьд ингэж хэлж байна. Та хоцрогдож. Та малчдын гол орлого олдог юмаар нь улс төр хийж, тоглож, аж ахуйг нь сүйрүүлж болохгүй. Зах зээл явдаг зарчмаараа явах ёстой. Малчдад хамгийн үнэтэй байгаа зах зээлээ л барь! гэж хэлмээр байна.