УИХ-ын гишүүн асан С.Эрдэнийн хэлсэн онцлох ишлэлүүдийг хүргэж байна.

ҮНДСЭН ДҮРМИЙН БУС АЛИВАА ҮЙЛ АЖИЛЛАГААГ БИД ХҮЛЭЭН ЗӨВШӨӨРӨХГҮЙ

Ишлэл 1. Монгол Улсын Их Хурлын найм дахь удаагийн сонгууль болж өндөрлөлөө. УИХ бүтэц, бүрэлдэхүүнээ томилон үйл ажиллагаагаа эхлүүлж байна. Гэхдээ 2020 оны УИХ-ын сонгуулийн будлиан, маргаан дуусаагүй байгаа. Энэ удаагийн сонгуульд явагдсан байж болох хууль зөрчсөн, эс зөрчсөн үйлдлийг улс төрийн намууд хамтран шалгаж байна. Цаашид ч энэ ажил үргэлжилнэ.

Ишлэл 2. Ардчилсан нам улс төрийн хариуцлагатай хүчний хувьд УИХ-ын сонгууль түүнтэй холбогдох аливаа нийгмийн болон улс төрийн тогтвортой байдлыг эрхэмлэж асуудалд хүндэтгэлтэй хандаж байна. Ардчилсан нам өөрийн Үндсэн дүрмээ Улсын дээд шүүхэд бүртгүүлж, хуулийн хүрээнд үйл ажиллагаагаа явуулж байгаа улс төрийн нам. Дотоод үйл ажиллагаагаа Үндсэн дүрмийнхээ хүрээнд зохион байгуулан ажиллаж байгааг хэлэх нь зүйтэй.

Ишлэл 3. Үндсэн дүрмийн бус аливаа үйл ажиллагааг бид хүлээн зөвшөөрөхгүй. Намын дотоод үйл ажиллагаатай холбоогүй, намд хамааралгүй хүмүүсийн хандлага, дүрмийн бус үйлдлүүд гарч байна. Ардчилсан нам өөрийн гэсэн дүрэмтэй нам. Дүрэм, журамгүй аливаа үйлдлийг хүлээж авахгүй.

Ишлэл 4. Ардчилсан намын дотоод үйл ажиллагаанд эрээ цээргүй оролцож, эв нэгдлийг бусниулах гэж оролдож буй, Ардчилсан намын даргыг дүрмийн бус аргаар авахыг санаархаж байгаа аливаа этгээдэд хатуу сануулж хэлэхэд тийм боломж байхгүй. Ардчилсан нам эв нэгдэлтэй, сахилга хариуцлагатай, нэгдмэл улс төрийн хүчин гэдгийг хариуцлагатайгаар хэлье. Тийм учраас дүрмийн бус, Ардчилсан намын гишүүнд огт хамааралгүй, улс төрийн зорилгоор намыг “самрах” гэсэн аливаа үйлдэлтэй бид эвлэрэхгүй.

Ишлэл 5. Ардчилсан намын удирдлагаас салахгүй, өгөхгүй гэж байгаа юм шиг уур амьсгалыг нийгэмд бий болгохоор оролдож буй нөхдүүдийн явуургүй үйл ажиллагаа цаашид явахгүй. Ардчилсан нам дүрэм, журмынхаа хүрээнд үйл ажиллагаагаа явуулна. Дүрэм, журам зөрчсөн аливаа үйлдэл, ажиллагааг хүлээж авахгүй болохыг хатуу анхааруулж байна.

НЭМЭЛТ: АРДЧИЛСАН НАМААС ГАРГАСАН ТОГТООЛ, ШИЙДВЭРҮҮД

Ардчилсан нам дүрмийн дагуу намын их хурлыг зарлан хуралдуулах ёстой. Үндсэн дүрмийн тавдугаар зүйлийн 5.17.1 дэх заалт, 5.12.2 дахь заалтыг үндэслэн АН-ын дарга өөрийнхөө бүрийн эрхийн хүрээнд энэ оны долоодугаар сарын 2-нд тушаал гаргасан. Тушаалын дэлгэрэнгүйг хүргэж байна.

НЭГ: Намын их хурлыг хуралдуулах тухай

Ардчилсан намын Үндсэн дүрмийн тавдугаар зүйлийн 5.17.1 дэх заалт 5.12.2 дахь заалтыг тус тус үндэслэн тушаах нь:

1. Намын 10 дугаар их хурлыг 2020 оны наймдугаар сарын 2,3-ны өдөр зарлан хуралдуулсугай.
2. Намын 10 дугаар их хурлын хэлэлцэх асуудлыг дор дурдсан дарааллаар тогтоосугай. Үүнд:

• Бүх гишүүдийн саналаар сонгогдсон шинэ намын даргыг батламжлах, ёсчлох.
• Бусад

3. Намын 10 дугаар их хурлын бэлтгэл ажлыг хангаж ажиллахыг Хэрэг эрхлэх газарт даалгасугай.

ХОЁР: Ардчилсан намын Үндсэн дүрмийн хорооны дүгнэлт гаргах тухай 15 дугаар тогтоол

Уг тогтоолд:

Ардчилсан намын Үндсэн дүрмийн тавдугаар бүлгийн 5.21.17 дахь заалт, АН-ын дарга С.Эрдэнээс ирүүлсэн хүсэлтийг үндэслэн Үндсэн дүрмийн хорооны хурлаас тогтоох нь:

1. 2020 оны УИХ-ын ээлжит сонгуулийн дүн эцэслэн шийдвэрлэгдсэн байх тул Үндсэн дүрмийн 3.10.1-д заасан нөхцөл байдал үүссэн гэж дүгнэсүгэй.
2. Ийм хүсэлт хүлээн авч шийдвэрлэсэн болохыг АН-ын дарга С.Эрдэнэд хүргүүлсүгэй.

Үндсэн дүрмийн хорооны тогтоол гарсантай холбоотой дотоод дүрэм, журмын дагуу намын шинэ даргыг сонгох, сонгуулийн сунгааг зарлах асуудал Дотоод сонгуулийн хорооны бүрэн эрхийн хүрээнд явагдана.

ГУРАВ: Дотоод сонгуулийн хорооны албан ёсны тогтоол, шийдвэр

АН-ын дарга Үндсэн дүрмийн хороонд хүсэлт гаргасантай холбогдуулан Ардчилсан намын даргын орон гарсан гэж үзэн намын даргын сонгуулийг товлон зарлаж байна.

• Долоодугаар сарын 6-9-ний хооронд шинээр намын даргад дэвших хүсэлтэй хүмүүсийг бүртгэнэ.
• Долоодугаар сарын 16-наас наймдугаар сарын 14-ний хооронд намын даргын сонгуулийн сурталчилгааг хийж, наймдугаар сарын 16-ны өдөр сонгуулийн санал хураалтыг зохион байгуулна.
• Энэ сонгуульд Ардчилсан намын 200 гаруй мянган гишүүн саналаа өгөх эрхтэй.
• Ардчилсан намын даргад нэр дэвшигчээс дэнчин, хураамж авахгүй. Зөвхөн аудитын байгууллагаар хянагдсан сонгуулийн зардлыг хувь тэнцүүлэн гаргуулна.