МАН энэ жилийн бүхий л сонгуульд олонх болсон ч ард иргэдээс илүү албан тушаалын төлөө тэмцэлдэж, дотоод зохион байгуулалт, хуваарлилтаа хийсээр байна. Олон нийтийг Ковид-19 цар тахал дотоодод тархсан нэрээр гэрт хорьчхоод өөрсдөөбүх эрх мэдлийг гартаа авсан шигээ албан тушаалын бялуугаа ч хуваан хүртжээ. Зөвхөн НИТХ-д л гэхэл МАН-аас 34 төлөөлөгч сонгогдсон. Тэдний 27 нь албан тушаалд очсон бол бусад нь ажлын хорооны дарга болоод “томорцгоочихож”. Тэдний нэг нь НИТХ-ын сонгуульд Баянгол дүүргээс нэр дэвшсэн Г.Гангамөрөн. Тухайн үедээ замын түгжрэлд машиндаа газ асаан хоол хийж буйгаар олон танигдсан тэрбээр орон нутгийн сонгуулийн сурталчилгааны үеэр нэг үл таних хүнтэй санал тоолох хар хашиныг хакердаж сонгуулийн саналыг өөрчлөх тухай ярилцаж буй бичлэг цацагдаж байсныг олон нийт санаж буй биз ээ.

Тухайн үед олны анхаарлыг татаж байсан тэрхүү үйл явцыг үнэндээ залилах төрлийн гэмт хэрэг гээд өнөөх үл мэдэгдэх хүнд буруу тохоод өнгөрсөн. Уг нь Монгол Улсын Үндсэн хуульд “Төрийн эрх мэдлийг хууль бусаар авах, авахаар завдахыг хориглоно” гэж заасан байдаг. Г.Гангамөрөн энэ заалтыг зөрчин, НИТХ-ын төлөөлөгч болохоор шунаж байсан шүү дээ. Нам нь түүнд хариуцлага огт хүлээлгэсэнгүй. Бүр асуудлыг хуулиар ч шийдвэрлүүлээгүй. Тэр ямар ч байсан санасандаа хүрч НИТХ-ын төлөөлөгч болсон. Гэвч тэгээд ч шунал, хүсэл нь зогсоогүй бололтой юм.

Мань хүн өдгөө НИТХ-ын төлөөлөгчөөс гадна Нийслэлийн Жижиг дунд үйлдвэрийг дэмжих төв ОНӨТҮГ-ын захирал болжээ. Өмнөх парламентын үед ЖДҮХС-г тоногсодын хэрэг, балаг дуусаагүй байхад л МАН дараа, дараагийн бялуу хүртэгсэдээ албан тушаал томилж байгаа нь энэ. Уг нь Нийслэлийн Жижиг дунд үйлдвэрийг дэмжих төвийн захирлаар өмнө нь мөн л МАН-ын томилгооны Ц.Эрдэнэбаатар ажиллаж байсан. Харин одоо НИТХ-ын төлөөлөгч болохоор төрийн эрх мэдлийг хууль бусаар авахаар завдаж явсан Г.Гангамөрөн албыг нь авсан нь нийслэлчүүд ЖДҮ-ийг дэмжих төвийн санхүүжилтээс горьдоод ч нэмэргүйг шулуухан бататгаж буй хэрэг. Угаас хэт шунасан хүнд төрийн жолоо бүү атгуул гэж үг ч бий. Тийм байтал хууль зөрчөөд ч болов төлөөлөгч болохоор зүтгэсэн хүн бүр “давхар дээл”-тэй болоод засарна ч гэж юу байх вэ дээ.'