Үндсэн хуулийн 64.1-т “Монгол Улсын Үндсэн хуулийн Цэц бол Үндсэн хуулийн биелэлтэд дээд хяналт тавих, түүний заалтыг зөрчсөн тухай дүгнэлт гаргах, маргааныг магадлан шийдвэрлэх бүрэн эрх бүхий байгууллага, Үндсэн хуулийг чандлан сахиулах баталгаа мөн” гэж Цэцийн бүтэц, байгуулах журам, эрх хэмжээг хуульчлан тунхагласан байдаг.

Гэтэл Цэцийн дээр зөвхөн мөнх хөх тэнгэр байдаг гэдэг ч одоо хэдийнээ МАН эзэн сууж, мөн тэдний тансаглал хэрээс хэтэрчээ. Өөрөөр хэлбэл, цэцийн шилэн данснаас харахад, 458 сая төгрөгийн үнэтэй 2 машин авсан байна. Үндсэн хуулийн цэцийн гишүүд 458 сая төгрөгийн машинаа “Моннис Моторс” ХХК-иас Ниссан Y-62 маркийн туулах чадвар сайтайг нь сонгон тансаг зэрэглэлийн машин авчээ. Тодруулбал, Захиалагч буюу Үндсэн хуулийн цэцийн тамгын газар барааны нийлүүлэлтийн 458 сая төгрөгийг улсын төсвийн хөрөнгөөр санхүүжүүлэх гэрээг байгуулжээ. Улсын төсвийн хөрөнгөөр тансаглах хэрэгцээ байсан уу гэвэл үгүй.

Учир нь Цэцийн бүх гишүүний албаны автомашиныг төр даадаг. Цэцийн дарга асан Ж.Амарсанаа Lexus-570 машиныг 175 сая төгрөгөөр авсан хэрэг нь 2015 онд ард түмэнд адлуулж байсан бол өнөө цагийн Цэцийнхэн бүр ч тансаг болж 458 саяар машин хүлэглэн хотын гудмаар салхи татуулах болж. КОВИД-19 цар тахлын энэ үед энгийн иргэдийн амьдрал хоосорч, жижиг, дунд үйлдвэрлэл эрхлэгчид, ААН-үүд, иргэдийн дийлэнх нь эдийн засгийн хямралд их, бага хэмжээгээр өртсөөр байна. Гэтэл цэцийн гишүүд алтан бөгстэй юу, тэд 458 саяын машин унах хэрэг байна уу, иргэд нь үгээгүй хоосорч байхад. Өнгөрсөн оны мөн үед танилцуулсан “Ажлын байрны нөлөөллийн судалгаа”-наас харахад ААН-ийн 33 хувь нь ажлын байраа алдаж, компаниудын 57 хувьд нь маш их нөлөөлж байсан гэсэн бол энэ тоо 67.4 хувьд хүрсэн. Гэтэл Үндсэн хуулийг манагч субьектийн эрх мэдэл эрх тэгш бус илтэд давуу байж, энэ мэт тансаглалаа төрөөс тэтгүүлж байгаа нь тэдэнд олгогдсон эрх тэгш байдлын зарчим уу, төрийн нүдээ олсон дэмжлэг байв уу гэдэгт иргэд дүн шинжилгээ хийх цаг нь болжээ.