Нийслэлийн Засаг даргын захирамж гарч Улаанбаатар хотын Ерөнхий менежерээр ажиллаж байсан Тогмидын Гантөмөрийг чөлөөлж, түүний оронд Даваагийн Ганболдыг томиллоо.

Даваагийн Ганболд өмнө нь Нийслэлийн төрийн сангийн даргаар 8 жил, Чингэлтэй дүүргийн Засаг даргаар 8 жил ажиллаж, 2016-2020 оны парламентад Чингэлтэй дүүргээс сонгогдон УИХ-ын гишүүнээр ажиллаж байсан. Санхүүч, эдийн засагч, хуульч мэргэжилтэй.

БАРИМТ 1

-Даваагийн Ганболд нь 1987 онд ОХУ-ын Тюмень хотын Улсын их сургуулийг Нягтлан бодогч, Эдийн засагч мэргэжлээр төгссөн. 1997 онд Удирдлагын академийг төрийн удирдлагын менежер, 1998 онд МУИС-ийг хуульч, эрх зүйч мэргэжлээр тус тус төгссөн.

БАРИМТ 2

-Тэрбээр ажлын гараагаа Налайх дүүргийн АДХГЗ-ны санхүүгийн хэлтэст зааварлагч нягтлан бодогчоор эхэлж ажиллаж байгаад өөрийн хүсэлтээр 1988-1989 онд Дорнод аймагт гурван улсын хил дээр цэргийн алба хаасан байна.

БАРИМТ 3

-Чингэлтэй дүүргийн Засаг даргаар ажиллаж байхдаа гэр хорооллын авто зам, дэд бүтцийн сүлжээг хийж, төвийн хороо, гэр хорооллын хөгжлийг жишиг болгож хөгжүүлсэн гэдгээр нь Чингэлтэйчүүд бахархал дүүрэн байдаг. Жишээ нь Чингэлтэй Хайлааст, Хайлаас Дэнжийн 1000, Дэнжийн 1000-ыг Баянхошууны хөтөлтэй холбосон Улаанбаатарын “Алсын их тойруу”-гийн замыг барьж байгууллуулсан.

БАРИМТ 4

-Чингэлтэй дүүрэгт Дорнын их яруу найрагч Б.Явуухулангийн нэрэмжит цэцэрлэг, Эх үрсийн цэцэрлэг, Анкара, Самбуугийн гудамжны ногоон байгууламж, тохижилтын ажлыг хатуу, зөөлөн ландшафтын цогц шийдэл бүхий байдлаар жишиг болгон хийж, мөн дүүрэгтээ 50 гаруй бичил цэцэрлэг байгуулсан.

БАРИМТ 5

-Чингэлтэй хайрхан уулын ойжуулалтын ажлыг дүүргийн Засаг даргаар ажиллаж байх үеэсээ системтэй хийж 100 гаруй мянган мод, бут сөөгийг тарьж ургуулах ажлыг гардан зохион байгуулж ажилласан нь үр дүнд хүрсэн.

БАРИМТ 6

-УИХ-ын гишүүнээр ажиллаж байх хугацааандаа Чингэлтэй дүүргийн Дээд салхитын аманд олон улсын стандартад нийцсэн гүйлтийн зам бүхий Хөл бөмбөгийн талбайг барьж байгуулах ажлыг хийж гүйцэтгүүлсэн.

БАРИМТ 7

-УИХ-ын гишүүнээр ажиллаж байхдаа санаачлан Чингэлтэй дүүргийн 19-р хороонд эх орны байгалийн гантиг чулуугаар урласан, хагас дугуй саран хэлбэр бүхий иргэд, хүүхэд залуучуудад зориулсан “Эрдмийн задгай театр”-ыг барьж байгууллуулсан.

БАРИМТ 8

- Дүүргийн Засаг даргаар ажиллаж байх үеэсээ санаачлан уйгагүй хөөцөлдөж, тус дүүргийн 10-р хороо, 39-р сургуулийн ард байрлах “Чингэлтэй дүүргийн спорт цогцолбор”-ыг барьж байгуулах ажлыг эхлүүлсэн. Монголд анхны гэж хэлж болохуйц битүү дээвэр бүхий хокейн талбай, бусад спортын 10 гаруй төрлийг багтаасан уг ордныг УИХ-ын гишүүнээр ажиллаж байх хугацаандаа ашиглалтад оруулуулж дуусгасан.

БАРИМТ 9

-2000-2008 онд Нийслэлийн төрийн сангийн даргаар ажиллаж байх хугацаандаа Улаанбаатар хотыг өмнөх үеэс хуримтлагдаж үүссэн олон давхар өрийн сүлжээнээс гаргаж, хот шинэ эдийн засгийн утгаар хөгжих бололцоог нээж өгсөн нь түүний мэргэжлийнх нь чадавхийг илтгэдэг.

БАРИМТ 10

-Хуучирч шороо нь гарсан барилгачдын талбайг “Тусгаар тогтнолын талбай” болгож, төв талбайн дараа орох чанар бүхий 2 дахь талбайг тэрбээр мөн Чингэлтэй дүүргийн Засаг даргаар ажиллаж байх хугацаандаа барьж байгуулуулсан.

БАРИМТ 11

Тэрбээр УИХ-ын гишүүнээр ажиллаж байх хугацаандаа 20 гаруй хууль, хуулийн нэмэлт өөрчлөлтийг гишүүдийн хамт санаачлан батлуулсан. Оюунтолгой, Эрдэнэтэд үйлдвэртэй холбоотой томоохон дүгнэлт гаргах ажлын хэсгүүдэд орж ажилласан. Байр сууриа мэргэжлийн үүднээс даацтай, тод илэрхийлж, түүн дээрээ хатуу зогсдог.

БАРИМТ 12

-Хэвлэлд өгсөн ярилцлагуудаас нь үзэхэд эрхэлсэн ажилдаа санхүүгийн сахилга бат, дэгж журмыг нэн тэргүүнд тавьдаг. Удирдах, удирдуулах ёсыг эрхэмлэдэг. Хаана сахилга бат байна тэнд хөгжил дэвшил байна гэж үздэг.