Монгол Улсын Засгийн газрын гишүүн, Зам, тээврийн хөгжлийн сайд Сандагийн Бямбацогт албан үүргээ хүлээж авсантай холбогдуулан цаашид хэрхэн ажиллах талаараа мэдээлэл өглөө. Тэрбээр Дарханы замын асуудал олон жил гацаж байгаа. Энэ асуудал дээр хариуцсан яамны зүгээс тодорхой бодлого шийдвэр байгаа байх, тэрэнтэй нь танилцаад ямар гарц шийдэл байж болох вэ гэдэг дээр хурдан шуурхай ажиллаж, энэ жилдээ нэг урсгалыг ашиглалтад оруулахаар анхаарч ажиллах болно. Мөн төмөр зам, боомтуудын хүчин чадлыг нэмэгдүүлэх, Замын-Үүд дээр гацаж байгаа чингэлэг, ачаа тээвэр гэх мэт тулгамдсан асуудал дээр анхаарч ажиллана. Төр хүнд сурталгүй, нээлттэй ажиллах ёстой. Гэхдээ иргэд төрийн хуульд захирагдаж ажиллах ёстой. Халаа сэлгээний хувьд ажлаа хийж чадаж байгаатай нь хамтарч ажиллана, хариуцлагагүй хүмүүстэй нь хариуцлага тооцоод явна.

Ашиг сонирхлын хувьд би УИХ-ын гишүүн болохоосоо өмнө бизнес эрхэлдэг байсан. Миний хамаарал бүхий Алтайн зам компанийн хувьцааг худалдаж аваад, зам гүүрний барилга угсралтын хөрөнгө оруулалт, тендерийн ажилд оролцож байсан нь үнэн. 2012 оноос хойш төрөөс ажил авч хийснээс хойш төсөв, тендерт оролцоогүй учраас зам тээврийн салбарт ашиг сонирхлын зөрчил байхгүй.