Төр иргэдийн амьдралд шууд ба шууд бус аюул занал учруулсаар иржээ. Аюул занал үүсэх шалтгаан нь хууль завхрах, албадлагын шинж давамгайлах, хувь хүн, хэсэг бүлгийн эсрэг чиглэсэн захиргааны ба улс төрийн үйл ажиллагаа буюу хэлмэгдүүлэлт, төрийн аппартын хэт их хянах гэсэн чармайлт буюу эрх мэдлийн төлөөх улс төрчдийн тэмцэл, төрийн гадаад, дотоод аюулгүй байдлын бодлого зэрэг болно.
Улс төрийн амьдралд оролцсоныхоо төлөө шорон гянданд хоригдох, тэр ч байтугай амь насаа алдах, зүгээр хөндлөнгийн ажиглагч хүртэл хохирох явдал манайх ч гэлтгүй нилээд улс оронд гарсаар байна.
Төр засаг иргэдээ түрэмгийллээс хамгаалах үүрэгтэй ч эрсдэлд оруулахгүйгээр хамгаалж чаддаггүй.
Дарангуйлал улс төрчдийн явцуу эрх ашиг, авилгалчдын хулгай, худал, гэмт хэргийн зам мөрөө баллах хүсэл сонирхолоос урган гарч цаашид улс орон, ард иргэдээ хэмжээлшгүй зовлонд унагадаг.

Үндэсниий аюулгүй байдал тэр чигээрээ эрсдэлд орох үндсэн шалтгаан нь улс төрчид өөрсдөө төр, ард нийтийн эсрэг хууль хүчний сүрийг далайлган, тэднийг шүүмжлэгчдийг нухчин дарах үзэгдэл юм. Нийгмийн ухралт, албан тушаалын мансуурал, цадах синдром буюу надаас өөр, манай намаас өөр хэн ч чадахгүй гэх хэт хөөрүү үзэлд автах нь улс орныг сүйрүүлэх аюултай. Үндсэн хуулийг үүсгэн бий болгож, чухалчлан дагаж мөрдөх хамгийн энгийн ойлгомжтой, онц чухал шалтгаан нь ердөө л төр завхруулагчид системээ нураахаас хамгаалах.
Төр гэдэг ойлголт анхнаасаа цэцэн мэргэн, эрдэм, ухаантай хүмүүсээр ард түмэн зүг чигээ болгож, төр засгийн албанд өргөн, сонгосноор эргүүлээд захирах, зохицуулах эрх мэдлийг ард түмнийхээ сайн сайхны төлөө зориулдаг төрийн түшмэд түүхэнд нэрээ үлдээх байж. Гэвч түр зуурын эрх мэдэл мөнгө, албан тушаалыг үүрдийн юм шиг ойлгоцгоож, улмаар тэр нь даамжирсаар хэлмэгдүүлэлт, хэрцгийлэл үйлдэх хэмжээнд хүртэл засаглалын дон сууна гэдэг ёс зүйн хувьд ч түүхэн үүрэг хариуцлагаараа ч гэмт хэрэг юм даа.