Өвөрхангай аймгийн ууган сургуулиудын нэг Арвайхээр сумын “Алтан гадас” одонт Ерөнхий боловсролын нэгдүгээр сургуулийн үе үеийн төгсөгчдийн спортын тэмцээн 8 дахь жилдээ болж байна. Анх 2016 оноос эхэлсэн төгсөгчдийн спортын тэмцээн жил ирэх тусам хүрээгээ тэлжээ. 2023 оны тэмцээнд хамгийн ахмад 60-тай төгсөгч оролцож байгаа аж. Спортын тэмцээнд нийт 60 багийн 500 гаруй тамирчид хурд хүч, авхаалж самбаагаа сорин өрсөлдөж байна.

8 дахь удаагийн Сагсан бөмбөг, Волейболын тэмцээнийг 2008 оны төгсөгчид зохион байгуулж байв. 2008 оны төгсөгчид хамгийн олон хүүхэд буюу 370 гаруй хүүхэд төгссөн. Энэ үеийн залуус аймаг орон нутаг, төрөлх сургуульдаа сүүлийн хоёр жил тасралтгүй үйл ажиллагаа зохион байгуулж ирсэн юм. Төгсөлтөөрөө эвлэлдэн нэгдэж “Хөгжийн Ган Хэлхээ” Төрийн бус байгууллагыг байгуулж, нийгэмд чиглэсэн боловсрол, эрүүл мэнд, байгаль орчин, хүмүүнлэг, хууль эрх зүйн чиглэлээр цуврал үйл ажиллагаануудыг хэрэгжүүлжээ.

Арвайхээр сумын ерөнхий боловсролын нэгдүгээр сургуулийн үе үеийн төгсөгчид, багш, ажилчдын амжилт, ололт нь аймаг, орон нутгийн болоод улс орны хөгжил, дэвшилд үнэтэй хувь нэмэр оруулcныг өндрөөр үнэлж Монгол Улсын Ерөнхийлөгчийн зарлигаар төрийн дээд шагнал "Алтан гадас” одонт сургуулиар 2015 онд өргөмжилсөн.

1926 онд улсын хангамжтай сургууль болон үйл ажиллагаагаа эхэлсэн түүхэн өдрөөс өнөөг хүртэл хугацаанд тус сургуулийн хамт олон улсдаа ямагт үлгэр жишээ болон ажиллаж, манлайлсаар ирсэн түүхтэй. Тус сургуулиас 110 гаруй эрдэмтэд, 20 гаруй гавьяат цолтон төржээ. 2023-2024 оны хичээлийн жилд тус сургууль 130 гаруй багш ажилчид, 2700 суралцагчидтайгаар сургалт, хүмүүжлийнхээ ажлыг явуулж байна.