Хойд Америк тивд өнгөрсөн амралтын өдрүүдэд их хэмжээний цас орж цасан шуурга шууран огцом хүйтэрлээ. АНУ-ын 30 орчим муж, Канад улсын дийлэнх нутгаар цасаар шуурч байгаа тул цаг агаарын сэрэмжлүүлэг гаргаад байна.

АНУ-ын нийт нутгаар цасны зузаан дунджаар 15-30 см-т хүрсэн бол цасан шуурганы хурд 80 км/цаг-тай байна. Цаг агаар муудсанаас агаарын тээврийн үйл ажиллагаа саатаж, олон мянган нислэг цуцлагдлаа. Мөн цахилгаан эрчим хүч тасраад байна.

Кентакки, Баруун Виржиниа, Канзас, Арканзас, Миссури, Флорида, Нью Жерси зэрэг долоон мужид бүхэлд нь болоод хэсэгчилсэн байдлаар цаг агаарын онц байдал зарлажээ. Өчигдөр оройн байдлаар АНУ-ын төвийн болон зүүн бүс бүхэлдээ цасанд хучигдсан байна.

AccuWeather цаг уурын газраас 2011 оноос хойш арав гаруй жилийн хугацаанд АНУ-д тохиолдож буй хамгийн хүйтэн нэгдүгээр сар болж байна гэдгийг мэдээлжээ. Агаарын температур түүхэн дундаж хэмжээнээс бага буюу цельсийн 7 хэмээс хүйтэн байх төлөвтэй байгаа юм.

FlightAware.com сайтад бичсэнээр одоогоор АНУ даяар цаг агаарын байдлаас шалтгаалж 2,200 нислэгийг цуцалж, 25,000 нислэгийг хойшлуулсан байна. Американ, Дельта, Саутуэст, Юнайтед зэрэг нислэгийн компаниуд нислэг саатах болох цуцлагдсанаас болж зорчигчдын тасалбарын үнийн дүнд өөрчлөлт оруулжээ.

Агаарын тээврээс гадна галт тэрэгний тээвэр ч мөн саатсан байна. Цуцлагдсан болон хойшлогдсон нислэгүүдийн тоо өнөөдөр ч нэмэгдэж болзошгүй байгаа юм. Хэдийгээр цаг уурын газраас даваа гарагт буюу өнөөдөр байдал дээрдэнэ гэж мэдээлсэн боловч Кентакки, Индиана, Мэриланд, Вашингтон, Виржиниа мужуудад сургуулиуд хаалгаа барихаар болжээ.

PowerOutage.us сайтад төв Америкт 120,000 хэрэглэгч цахилгааны эх үүсвэрээс салсан тухай мэдээлсэн. Миссурид 30,400, Канзаст 3,000, Кентаккид 45,000, Иллинойст 32,000, Инданиад 7,200, Охайод 2,700 хэрэглэгч эрчим хүчгүй болжээ.

АНУ-аас гадна Канад улсад цаг агаарын онц байдал нүүрлэсэн. Канадын төвийн бүсийн Манитоба мужид агаарын температур цельсийн -40 хэмд хүрсэн байна. Мөн Онтарио мужийн зарим хэсэгт цасны зузаан 38 см-т хүрчээ. Их хэмжээний цаснаас болж автозамын хөдөлгөөн саатсан, олон тооны машин ачааны машинууд мөргөлджээ.