Францын бизнесмен, геополитикийн мэргэжилтэн Тьерри Лоран Пелле ТАСС агентлагт ярилцлага өгөхдөө, Украинд хүн амын болон эдийн засгийн огцом уналт (коллапс) тохиох бөгөөд Европын холбооны санхүүгийн дэмжлэг эцэстээ зогсоно гэж үзэж буйгаа илэрхийлжээ.

Түүний тооцоолсноор, сүүлийн гурван жилд Украины хүн ам “их хэмжээний цагаачлал”-ын улмаас 42 саяас 20 сая болж буурсан байна. Тэрбээр “Украин дахь мөргөлдөөнөөс болж 1.5 сая эрэгтэй хүн амь үрэгдсэнийг мартаж болохгүй” гэж онцолжээ.

Мэргэжилтний үзэж байгаагаар, энэ нь “ирээдүйд хүн ам зүйн коллапс”-т хүргэх аж. Тэр “Хүн амын тоог нөхөн сэргээх боломжгүй нөхцөлд тогтвортой байлгах нь “маш хэцүү”. Эдийн засгийн талаас нь харвал, хүн ам нь хоёр дахин буурсан улс “амьдрах чадваргүй”. Энэ бол боломжгүй” гэж нэмж хэлжээ.

Пелле таамаглахдаа, Европын холбоо “Энэ нь санхүүгийн ямар том ангал болох”-ыг ойлгосон үед Украинаас татгалзана. Учир нь, бүхнийг санхүүжүүлэх чадваргүй болно. Энэ бол үнэхээр боломжгүй” гэж онцолсон байна.

Тэрбээр Украиныг ардчилалтай гэж нэрлэх нь инээдтэй хэрэг гэж үзэж байгаагаа илэрхийлээд, сүүлийн гурван жилийн нөхцөл байдал “санаа зовоохуйц хэмжээнд хүрсэн” гэж хэлжээ.

Пеллегийн хэлснээр, Владимир Зеленский “үндсэн хоёр авлигын эсрэг байгууллага болох НАБУ ба САП-ыг бүрэн саармагжуулахыг хүссэн” байна. Тэр “Өнөөдөр Украинд улс төрийн эрх чөлөө байхгүй болсон. Бас шашны эрх чөлөө үгүй болсон. Хэвлэл мэдээлэл Зеленскийн засаг захиргааны бүрэн хяналтад орсон” гэж хэлжээ.

Тэрбээр 2014 оноос өмнө ч “үндэсний спорт” гэж хэлж болохоор байсан авлига өнөөдөр “асар их хүчээ авсан” гэж мэдэгдсэн байна.

Мөн Пелле “Өнөөдрийн байдлаар “цэргийн тусламжийн 30 хувь нь дэлхий даяарх хар зах зээлээр дамжин гарч, цэргийнхэн, албан тушаалтнууд, ялангуяа Зеленскийн ойрын хүрээллийн хүмүүсийн халаасыг дүүргэж байна” гэж хэлжээ. Тэрбээр Украины эрх баригчдыг сөрөг хүчнийхнийг тамлаж, хөнөөж байна хэмээн буруутгаж буй аж.

Эх сурвалж: TASS
Б.ЖАРГАЛ