-УЛААНБААТАР ХОТ АГААРЫН БОХИРДОЛ ИХТЭЙ-

АНУ-ын Ерөнхийлөгч Дональд Трамп, БНАСАУ-ын удирдагч Ким Чен Ун нарын дээд хэмжээний уулзалт хаана болох нь одоогоор тодорхойгүй байгаа ч дэлхийн хамгийн хүйтэн хотуудын нэг, Монгол Улсын нийслэл Улаанбаатар хотод болох магадлал өндөр байгаа талаар “Business Insider” мэдээлсэн байна.

Түүнд, “CNN” агентлагийн мэдээлснээр, хоёр талын уулзалтын талаар албаныхан нууцаар зөвлөлдөж байгаа бөгөөд Ким Пхеньяныг уулзалт болох тохиромжтой газраар нэрлэсэн ч төвийг сахисан Улаанбаатар хотод хоёр орны удирдагчийн дээд хэмжээний уулзалт болох магадлал өндөр байна гэжээ. Мөн тус нийтлэлд ийн бичсэн байна.

“Монгол Улсын өмнөх болон одоогийн Ерөнхийлөгч нар энэ асуудалд нээлттэй хандаж байгаа юм. Өнгөрсөн хугацаанд Монгол Улс хөрш зэргэлдээ Орос, Хятад, түүнчлэн АНУ, Хойд Солонгос зэрэг улс орнуудтай найрсаг харилцаатай явж ирсэн. Тус улсад Хойд Солонгос, Япон улс хоорондын уулзалт яриа зохион байгуулагдаж байв.

Трамп, Ким нарын удахгүй очиж болзошгүй хоттой танилцана уу.

Монгол орон Техасын газар нутгаас хоёр дахин том, Европын холбооны бараг талтай тэнцэхүйц асар өргөн уудам газар нутагтай ч дөнгөж 3-хан сая хүн амтай. Дэлхийд хүн амын нягтралаараа хамгийн бага улсын тоонд ордог. Улаанбаатар хотод хүн амынх нь 1/3 буюу 1,3 сая хүн амьдардаг. Хотын төвийн эргэн тойрны гэр хорооллуудад ажил хайн нийслэлд нүүн ирсэн хөдөө орон нутгийн иргэд оршин суудаг.

Улаанбаатар хотын Парламентын ордны өмнө Монголын 1921 оны хувьсгалын удирдагч Дамдины Сүхбаатарын хөшөө бий. Хотын төв талбайг Сүхбаатарын нэрээр нэрлэж байсан ч хэсэг хугацаанд Чингис хааны нэрээр нэрлэжээ. Гэвч шүүхээс буцаан хуучнаар нь нэрлэх шийдвэр гаргасан байна.

Энэ бол Монголын Парламентын ордны өмнөх Чингис хааны гайхамшигтай хөшөө юм. Монголчуудын бас нэг бахархал нь Чингис хааны ач хүү Хубилай хаан.

Нүүрс их хэмжээгээр хэрэглэдэг учир Улаанбаатар хот агаарын бохирдол ихтэй. Дэлхийн хамгийн хүйтэн нийслэл учраас Улаанбаатар хотод халаалт нэн чухал. Өвөлдөө -40 хэм хүрч хүйтэрдэг. Зочид буудал, тээврийн хэрэгслийн хувьд бусад хотуудтай харьцуулахад илүү боломжтой.

Энэ бол “Чингис хаан” олон улсын нисэх онгоцны буудал. Кимийн хувьд онгоцоор нисч, эсвэл хуягласан галт тэргээрээ Монгол руу зорчиж болох юм. Тус улс дэлхийн ихэнх оронтой найрсаг харилцаатай байдлаа хадгалахыг хичээдэг.

-МОНГОЛ УЛСЫН ЕРӨНХИЙЛӨГЧ Х.БАТТУЛГА ТУЛААНЫ УРЛАГИЙН МЭРГЭЖИЛТЭН, ЕРӨНХИЙ САЙД НЬ ХАРЛИ-ДЭВИДСОНЫ ФЭН КЛУБЫН ТЭРГҮҮН ЮМ-

Монгол Улс төвийг сахисан гэж үздэг. Энэ жилийн эхээр Их Британитай дипломат харилцаа тогтоосны 55 жилийн ойгоор “The Beatles” хамтлагийн мөсөн баримлыг барьжээ. Өнгөрсөн хугацаанд Улаанбаатар хотод Хойд Солонгос, Япон зэрэг орны хооронд хоёр талын яриа хэлэлцээнүүд зохион байгуулагдаж байв.

Яриа хэлэлцээ Монгол Улсын Ерөнхийлөгчийн оршин суудаг Их тэнгэрийн аманд болж байсан. Монгол Улсын Ерөнхийлөгч Халтмаагийн Баттулга нь тулааны урлагийн мэргэжилтэн, Ерөнхий сайд нь Харли-Дэвидсоны фэн клубын тэргүүн юм.

НҮБ-аас шинэ хориг арга хэмжээ авах хүртэл Монгол Улсад Хойд Солонгосын 1200 орчим иргэн ажиллаж, амьдарч байсан. Өнгөрсөн оны арванхоёрдугаар сард тэдний түрүүчийг нутаг буцаажээ. Хоёр орны харилцааг Монголын коммунист дэглэмтэй холбон авч үздэг. Зарим сурагчид 50 жилийн тэртээ хойд солонгосчуудын барьсан сургуульд сурч байна.

Монгол Улсад хүүхдийн цэцэрлэгийн хүртээмж дутагдалтай. Жил бүр 16 мянган хүүхэд хэдэн зуун морины уралдаанд оролцож морь унадаг. Энэ нь уламжлалтай нь холбоотой боловч хүний эрхийг бүдүүлгээр зөрчдөг тул шүүхээс хүүхдээр морь унуулахыг хоригложээ. Монголд 2015 онд "Google street View" анх нэвтэрсэн.

Улаанбаатарт АНУ-ын Төрийн нарийн бичгийн дарга Жон Керри, Хиллари Клинтон тэргүүтэй хэд хэдэн улс төрч зочилсон. АНУ-ын Ерөнхийлөгч Жорж Буш, дэд Ерөнхийлөгч Жое Байдан нар Монголд айлчилж байв.

Монгол Улс нь дэлхийн хоёр дахь коммунист улс байсан бөгөөд Зөвлөлт Холбоот Улстай нягт харилцаатай байв. Олон оюутан урьдын адил орос хэл сурч байна.

Ерээд онд олон нийтийн жагсаал болж, коммунист засаглалыг түлхэн унагааж, 2012 онд Улаанбаатар дахь Лениний сүүлчийн хөшөөг буулгажээ.

Тус улсад буддын шашин дахин сэргэж, хүн амынх нь тал хувь нь буддын шашинтан гэж тодорхойлогддог. Монголын хамгийн алдартай спортуудын нэг нь бүргэдийн ав. Гэвч цөөн тооны бүргэдийн анчин үлдэж, уламжлал нь үеийн үед бүдгэрсээр байгаа ажээ.

Д.ТУЯА