-ЕРӨНХИЙ САЙД НЬ ШОУ БИЗНЕСТ ХҮЧ ҮЗЭЖ, ИХ ХУРАЛ НЬ ТАТВАРЫН ХИЙДЭЛТЭЙ ХУУЛЬ ХЭЛЭЛЦЭВ-

Өнгөрч буй долоо хоног улс орны амьдрал онцлох содон үйл явдлаар өрнүүн байлаа. Ялангуяа улс төрийн тогоонд олон халуун үйл явдал өрнөсний нэг нь "үүргээ биелүүлээгүй" намрын чуулганы үргэлжлэл “ЭЭЛЖИТ БУС"- чуулган эхэлсэн явдал байв.

Намрын чуулган ажлын 88 өдөр чуулснаас 9 удаагийн хуралдаан ирц бүрдээгүйгээс хойшилсон, нийт хуралдах хугацааныхаа 40 гаруй хоногт гацсан гэж түүхийн шар хуудсанд тодоор тэмдэглэгдсэн. Намрын чуулганы хугацаанд бие даасан 5, хуульд өөрчлөлт оруулах тухай 25, зээлийн хэлэлцээр соёрхон батлах тухай 13, хууль хүчингүй болсонд тооцох тухай 3 хууль, нийт 46 хууль, УИХ-ын 41 тогтоол хэлэлцэн баталсан нь ч энэ нь маш чамлалттай үзүүлэлт.

Ерөнхийдөө өнгөрсөн намрын чуулган төлөвлөсөн асуудлаа хэлэлцэх байтугай үүргээ ч биелүүлээгүй. Шалтгаан нь хангалттай улстөржиж, чамгүй хугацаанд сандал ширээтэй зууралдсан явдал. Тиймээс энэ удаад зарласан ээлжит бус чуулганаараа хоёрхон долоо хоногийн хугацаанд хэд хэдэн өндөр албан тушаалын томилгооноос гадна маш чухал хуулиудыг хэлэлцэн батлахаар "манаргаж" байна.

-Татварын ерөнхий хуулийн шинэчилсэн найруулгын төсөл

-Аж ахуйн нэгжийн орлогын албан татварын тухай хуулийн шинэчилсэн найруулгын төсөл -Хувь хүний орлогын албан татварын тухай хуулийн шинэчилсэн найруулгын төсөл

-Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуулийн төслүүдийг яарч сандран, олон цоорхой хийдэлтэй хууль батлах гэж байна.

Шинээр хэлэлцэн батлагдах хуулиудад учир дутагдалтай, алдаа мадагтай олон зүйл заалтууд байгаа нь эхнээсээ хэл ам, шүүмжлэл, эсэргүүцэл дагуулаад эхэлчихсэн. Ийм байхад "цаг хүрэлцэхгүй, амжихгүй" гэх нэрийдлийн бужигнуулах гээд байгаагийн цаад шалтгаан юу вэ. Их хурлын гишүүд нь асуудал шийдсэн дүр эсгэж хэдхэн хоногт хууль хэлэлцэн баталж байхад ерөнхий сайд нь айлчлал нэрийдлийн дор ажил хийж буй дүр эсгэн ээлжит шоугаа хийсээр явав. Тодруулбал, Ерөнхий сайд У.Хүрэлсүх цэргийн баяраар сэтгүүлчдийг дагуулан Өмнөд Судан улсад сүр дуулиантайгаар айлчилсан. Айлчлалын зорилго нь тэнд үүрэг гүйцэтгэж буй цэнхэр дуулгатнуудаа эргэх байв. Өмнөд судан үүрэг гүйцэтгэж буй цэргийг аавтай нь уулзуулж гэнэтийн бэлэг барьсан нь муухан найруулгатай киноноос дээр зохиолтой үйл явдал боллоо хэмээн шагширцгааж байна.

Цаад учир нь цэргүүдээ эргэх байв уу, эсвэл рекламныхаа шторкны зураг авахуулах байв уу гэх эргэлзээг төрүүлж, дэлхийн хамгийн халуун цэг буюу омог хоорондын мөргөлдөөнтэй байгаа Өмнөд Судан улсад үүрэг гүйцэтгэж буй цэргүүдээ эргээд ирсэн хэмээн дайнд ялалт байгуулсан баатар мэт танк хөлөглөсөн сүртэй зургуудаар Цэргийн баярын өдөр мэндчилгээ дэвшүүлж сүрийг үзүүлсэн.

Хүчирхэг, гүжирмэг, булчинлаг, зоримог төрх бол түүний имиж гэсэн ойлголтыг тэрбээр болоод түүнийг хүрээлж буй багийнхан бүрдүүлсэн. Гэвч хүчирхэг, булчинлаг байдлаараа улс эх орны ажил, асуудлыг шийдэж болдоггүй нь жишээг харуулаад байгаа. "Би зорьсноо хийж, хэлснээ хэрэгжүүлдэг Ерөнхий сайд байхыг хүсч байна. Би ард түмнээ өмгөөлдөг, авлигачидтай хатуу тэмцдэг Ерөнхий сайд байхыг хүсч байна" хэмээн чанга дуугаар хашгичин гарч ирсэн шигээ л мөрийн хөтөлбөрөө ярьж албан ажил хийх хэрэгтэй байна.

Ямар сайндаа л "Буянг"-ийн Жагаа "У.Хүрэлсүх одоо “рекламны пауз”-аа болих хэрэгтэй. Төмөр өргөдөг, мотоцикль унадаг ч гэл үү. Юу нь сонин байгаа юм. Ерөнхий сайд хүн толгойгоо ажиллуулах хэрэгтэй" хэмээж байхав. У.Хүрэлсүх мэдээж манлайлахыг хүсч буй. Гэхдээ түүнд гэгээн хүслээс өөр зүйл алга. Түүний толгойлж буй нам улс орныг удирдан жолоодож эхэлсэнээс хойш бензиний үнэ, олон төрлийн татвар татаас нэмэгдэж тэр хэрээрээ өргөн хэрэглээний барааны үнэ тэнгэрт хадаж ард түмнийг хэрхэн сөхрүүлснийг хэн хүнгүй мэднэ.

Эцэст нь иргэдийнхээ хөлс дуслуулан байж олсон хэдээсээ төлсөн татвараас хэдэн арваараа хувааж зээлдэн /ЖДҮХС-ийн зээл/ ард түмний хөрөнгөнөөс идсэн гэж цоллууулав. Гэвч үүнд хариуцлага ярьдаг, хариуцлага тооцдог дарга одоо хүртэл алга. Улс орон, ард иргэдийг ядууурал, утаа, татвар гурав сөхрүүлж туйлдуулж байхад шударга ерөнхий сайд нам доторх өшөө авалт, дайралт намын гишүүний халаа солиогоо хийсээр л ирсэн. "Сонгуулийн үед л улс төржицгөөе, бусад үед ажлаа хийе" гэж хэлсэн шигээ сандал ширээнийхээ ард сууж байгаад улс орны өмнө тулгамдаж буй асуудлын гүн рүү өнгийж, өмнөх ажлаа л хий л дээ. Цаг ч бага үлдсэн байна.

Эх нь булингартай бол адаг нь булингартай гэдэг шиг шударга ёс ярьсан, ажил хийсэн дүр эсгэсэн попчин гишүүд ч олон. Өнгөрч буй долоо хоногийн бас нэг поп дуулиан Сангийн сайд асан С.Баярцогтын оффшор дансны мэдээллийг Швейцарын талаас Монголд хүлээлгэн өгсөн гэх мэдээлэл. УИХ-ын гишүүн Т.Аюурсайхан УИХ-ын дарга Г.Занданшатар Швейцарын Холбооны Улсад албан ёсны айлчлал хийсэн бүрэлдэхүүнд багтаж яваад ирэх үеэрээ С.Баярцогтын оффшор дансны хуулгыг өөрөө аваад ирсэн мэтээр попорч онигоонд орсон. Дансны хуулгыг Монголд авч ирэх нь амаргүй ажил байсан мэтээр ярьсан. Үүний дараа С.Баярцогт мэдээлэл хийж Т.Аюурсайхан бус өөрөө сар гаруйн өмнө АТГ-д өгчихсөн байсан гэснээр гал унтраасан.