-ӨНӨӨДӨР НЭГ ХҮНД НОГДОХ ӨРИЙН ХЭМЖЭЭ 23 САЯД ХҮРЭЭД БАЙНА-

Өнөөдөр АН-ын Ерөнхий нарийн бичгийн дарга Ц.Туваан, Нарийн бичгийн дарга О.Магнай, УИХ-ын гишүүн, АН-ын дэд дарга Б.Пүрэвдорж нар цаг үеийн асуудлаар мэдээлэл хийлээ.

-УИХ-ын гишүүн Б.Пүрэвдорж, “МАН өнгөрсөн гурван жилийн хугацаанд хоорондын тэмцэл, зодооноос өөр олигтой ажил хийсэнгүй. Энэ хугацаанд улс эх орны эдийн засаг өсөлттэй байж, азаар ямар нэгэн хохиролгүй байсан. Ийм үед дотоодын зөрчил тэмцэлдээ анхаарлаа хандуулж хугацаа алдсан. Удахгүй зохион байгуулах жагсаалаараа бид,

-МАН-аас 2016 оны сонгуулиар амалж гарч ирсэн амлалтуудаа биелүүлэхийг шаардана.

-ЖДҮХС-ийн зээлийн асуудалд хариуцлага тооцохыг шаардана

-100 жилийн өмнө урваач шарваач ноёдын буруугаас манай улс эрх чөлөөгөө алдаж байсан. Яг энэ 100 жилийн босгон дээр Шанхайн хамтын ажиллагааны байгууллагад элсэх нэрийдлээр бидний тусгаар тогтнол эрх чөлөөг алдах томоохон асуудал үүсэх гэж байна. Эдгээр асуудлаар хариуцлага нэхнэ.

Эдийн засаг өсөлттэй байгаа нь МАН-ын бодлогоос болоогүй. Экспортын нэрийн бүтээгдэхүүний үнэ өссөнтэй холбоотойгоор эдийн засаг өссөн. Эдийн засаг өсөлттэй байх хугацаанд валютын ханшийг 600 төгрөгөөр алдаад байна. Мөн инфляфи 8,1 хувиар өссөн. Үүний үр дүнд иргэдийн өдөр тутмын өргөн хэрэглээний бараа бүтээгдэхүүний үнэ 23 хувиар өссөн. Шатахууны үнэ маш ихээр өссөн. Эдийн засгийн хувьд хор хохиролтой.

МАН 2016 оны сонгуулиар таны төрөөгүй хүүхэд хүртэл 15 сая төгрөгийн өртэй гэж худлаа хэлж ард түмнийг айлгаж байгаад ялж байсан. Гэтэл өнөөдөр нэг ч томоохон бүтээн байгуулалт хийгээгүй ч, нэг хүнд ногдох өр 23 сая төгрөгт хүрээд байна. Татвар нэмэхгүй гэсэн боловч ганцхан удаагийн чуулганаар найман төрлийн татвар нэмсэн. Шат шатандаа иргэдийн халаас руу гараа шургуулж хулгай хийж байна. Одоо ажил хийх үлдсэн цөөхөн хугацаандаа дараагийн сонгуулиа ярьсаар байгаад эдийн засгийн, бодлогын томоохон асуудал ярихгүй байх.

60 тэрбумын асуудал манай намын шүүмжилдэг гол асуудлын нэг. 60 тэрбумын схемийн үр дүнгээр гарч ирсэн хүмүүс Монголын яаж худалдаж идсэн ч болно гэж боддог. Үүний тод жишээ бол ЖДҮХС-ийн зээлийн асуудал. АН бүлэггүй болж цөөхөн гишүүнтэй болсон ч энэ асуудлуудыг байнга эсэргүүцнэ.

АН-ыг дэмждэг гэх шалтгаанаар 35 мянга гаруй төрийн албан хаагчыг ажлаас нь халсан. Энэ нь 60 тэрбумын үр дүн юм. Иймд АН хууль бусаар ажлаасаа халагдсан хүмүүсийн эрх ашгийг хамгаалж тэмцэнэ” гэв.

-АН-ын нарийн бичгийн дарга О.Магнай:

“Дөрөвдүгээр сарын 05-ны өдөр АН жагсаал зохион байгуулах гэж байна. Жагсаалаар хэд хэдэн тодорхой асуудлыг хөндөж, тэмцэнэ. ЖДҮХС-аас зээл авсан асуудлыг эрх баригчид хэрхэн яаж хамгаалж байгааг та бүхэн харж байна. Мөн ШХАБ-д элсэх тухай асуудал яригдаж байгаа. Энэ хоёр асуудал харахад тусдаа юм шиг мөртлөө цаагуураа холбогдоод байгаа нь ажиглагдаж байгаа. ШХАБ-д элсэхийг дэмжиж байгаа гишүүд, ЖДҮХС-аас зээл авсан гишүүд яг таарч байна. ШХАБ-д элсэхийг дэмжиж байр сууриа илэрхийлсэн гишүүдийн нэрс надад бий.

Манай намын зүгээр ЖДҮХС-аас авсан зээл нь бүхэлдээ ЖДҮ-ийг хөгжүүлэхэд зориулагдаагүйг ажигласан. Өөрөөр хэлбэл нэр бүхий тодорхой хүмүүст тус бүрт нь 950 саяар хувааж өгсөн. Үүнийг өгсөн цаад зорилго нь Монгол Улсын ШХАБ-д зарах агуулгатай байж магадгүй гэж үзэж байгаа. Учир нь ШХАБ-д элсэхийг дэмжиж байгаа гишүүд нь ЖДҮХС-аас зээл авсан. 100 жилийн дараа Монголын тусгаар тогтнолыг худалдах хүмүүсээр МАН-ынхан тодорч гарч ирж байна. Засгийн газар нь хүртэл ШХАБ-д орохыг дэмжсэн.

УИХ-ын гишүүн Х.Болорчулуун, УУХҮЯ-ны сайд Д.Сумъяабазар, УИХ-ын гишүүн Л.Болд, УИХ-ын гишүүн Я.Содбаатар, ЗГХЭГ-ын дарга Л.Оюун-Эрдэнэ, МАН-ын Ерөнхий нарийн бчигийн дарга Амарбаясгалан, Гадаад харилцааны сайд Д.Цогтбаатар, УИХ-ын дарга Занданшатар зэрэг хүмүүс ШХАБ-д элсэхийг дэмжиж байр сууриа илэрхийлсэн байдаг” хэмээн ярилаа.