Өнөөдөр Авлигатай тэмцэх газар гуравдугаар сард хийж гүйцэтгэсэн ажлынхаа тайланг танилцуулж, мэдээлэл хийлээ.

Хэвлэлийн бага хуралд АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү, Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатар нарын холбогдох албан тушаалтнууд оролцов.

-ЭРХ МЭДЛЭЭ УРВУУЛАН АШИГЛАСАН УИХ-ЫН ТАВАН ГИШҮҮНИЙГ ЭРҮҮГИЙН ХЭРЭГТ ЯЛЛАГДАГЧААР ТАТСАН-

Шалгагдаж буй хэргүүдийн талаар мэдээлэл өгөхдөө: АТГ нь төлөвлөгөөг хяналт шалгалтын хүрээнд 67 албан тушаалтны Хөрөнгө орлогын мэдүүлгийг нарийвчлан шалгаж байна.

-Авлигын эсрэг хуульд зааснаар албан тушаалтнуудын хөрөнгө орлогын мэдүүлгийн авсан бөгөөд хураангуйлсан хэлбэрээр дөрөвдүгээр сарын 5-ны өдөр АТГ-ын сайтаар дпамжуулан олон нийтэд мэдээлнэ. Монголбанкны Ерөнхийлөгч зэрэг 67 албан тушаалтны ХОМ-гийг нарийвчлан шалгаж байна гэв.

-ЖДҮХС-гаас зээл авсан улс төрд нөлөөлөл бүхий 60 орчим албан тушаалтан шалгагдаж байгаагаас УИХ-ын таван гишүүн гэм буруутай нь тогтоогдсон учир Эрүүгийн хэрэг үүсгэсэн. Эрх мэдлээ урвуулан ашигласан УИХ-ын таван гишүүнийг эрүүгийн хэрэгт яллагдагчаар татан, шалгаж байна. Хэргийг шалгаж, прокурорт шилжүүлэх дөхөж байна.

-Монголбанкны Ерөнхийлөгч асан Г.Золжаргалтай холбоотой гурван хэргийг шалгаж байна. Австрид их хэмжээний мөнгө шилжүүлж, орон сууц худалдан авсан. Арилжааны зарим банкинд бага хүүтэй зээл олгосон гэх мэт хэргийг мөрдөн шалгаж байна. Хэргийг энэ оны хоёрдугаар улиралд багтаан шийдвэрдлэнэ.

-МОНГОЛБАНКНЫ ЗАХИРАЛ АСАН Н.ЗОЛЖАРГАЛТАЙ ХОЛБООТОЙ ГУРВАН БАГЦ АСУУДЛЫГ ШАЛГАЖ БАЙНА-

-С.Зоригийн амийг хөнөөсөн хэргийг гурван шатны шүүхээр шийдвэрлэсэн. Энэ хэргийг шүүсэнтэй холбоотой олон төрлийн баримтыг бүрдүүлж авсан. Хэргийг шүүх явцад зарим хууль зөрчсөн нотлох баримтууд олдсон учир эрүүгийн хэрэг үүсгэн шалгаж байна. Хэрэгтэй холбоотой хоёр хүнийг цагдан хориод мөрдөн шалгах ажиллагаа явагдаж байна.

-Шүүгч Л.Бямбаагийн амиа алдсан хэргийг мөрдөн шалгах ажиллагаа явагдаж байна. Энэ хэрэгтэй холбоотой нэлээд олон асуудлыг шалгаж байна. Амиа алдсан тухай шүүхийн шинжилгээний дүгнэлт хэрхэн гарсныг цагдаагийн байгууллага шалгаж байна.

-С.Баярцогтын дансны хуулгатай холбоотой асуудлаар Швейцарь улсын мөрдөн шалгах байгууллагатай хамтарсан мөрдөн шалгах ажиллагаа явагдаж байна. Энэ тухай материал УЕПГ-т хянагдаад, хоёр хоногийн өмнө АТГ-т хүргэгдсэн.

-Монголбанкны захирал асан Н.Золжаргалтай холбоотой хэрэг юу болсон бэ. Улаанбаатар банкнаас их хэмжээний мөнгө гарсан гэдэг зүйл дуулдаад байгаа. Энэ хэр үндэслэлтэй вэ?

-Монголбанкны захирал асан Н.Золжаргалтай холбоотойгоор гурван багц асуудлыг шалгаж байна. Нэгдүгээрх нь, хүү багатай зээл олгосон, Австри улс руу их хэмжээний мөнгө шилжүүлж, орон сууц худалдан авсан зэрэг асуудлаар мөрдөн шалгах ажиллагаа явагдаж байна. Арилжааны банкинд зээл олгохдоо тогтоосон хэмжээнээс бага хүүтэй зээл олгосон байгаа учраас эргэж хянаж үзээч ээ гэдэг мөрдөгчийн мэдүүлэг Монголбанкинд хүргэсэн.

Австри улс руу санхүүгийн хамтарсан мөрдөн шалгах ажиллагаа явуулах даалгавар хүсэлтээ өгөөд, тодорхой нотлох баримтууд ирсэн. Хоёрдугаар улиралд багтаагаад хэргийн шийдвэрлэх боломжтой гэж үзэж байна.

-Хууль зүйн сайд асан Д.Дорлигжавтай холбоотой хэргийн талаар мэдээлэл өгөхгүй юу?

-Д.Дорлигжавтай холбоотой мөрдөн шалгах ажиллагаа явагдаж байна. Хэргийн мөрдөн шалгалтын үр дүнгээсээ хамаараад хэргийн явц байдлын талаар дэлгэрэнгүй мэдээлэл өгөх байх.

-С.Зориг агсны амиа алдсан хэрэгтэй холбоотой асуудал танай дээр шалгагдах болсон мэдээлэл бий?

-С.Зориг агсны амь насыг хөнөөсөн хэрэгт зарим нэг хүмүүсийг эрүүдэн шүүсэн, гүйцэтгэх ажиллагааны хууль тогтоомж зөрчсөн гэсэн мэдээлэл ирсэн. Нотлох баримтууд олдсон, үнэлэх, бэхжүүлэх ажил хийгдэж байна. Нууцад хамаарах асуудал учраас дэлгэрэнгүй мэдээлэл өгөх боломжгүй. Дөрвөн хүн цагдан хорьсон асуудал яригдаж байгаа. Ажлын хэсэгт орсон хүмүүсийг 15 хоногийн хугацаатай саатуулсан, мөрдөн шалгах ажиллагаа явагдаж байна.