Баян-Өлгий аймгийн Цагааннуур тосгоны эхнэр нөхөр 2 тарваганы түүхий бөөр, элэг, хүн мах залгиж тарваган тахал өвчнөөр нас барсан нь шинжилгээгээр батлагдлаа. Тарваганы элэг, цөс, хүн маханд тарваганы бактери нян нь хамгийн их хадгалагддаг нян үүсэх зохимжтой орчин гэж үздэг байна.

Иргэдийн дунд тарваганы эд эрхтэн хэрэглэх нь Шинжлэх ухаанаар нотлогдоогүй зүйл гэлээ. Тарваганы эд зүйлийг хэзээ ч идэж болохгүй гэж ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл хэллээ. Тус гэр бүлийн хувьд бага насны 0-12 насны 4 хүүхэдтэй юм.

Мөн түүнчлэн Баян-Өлгийн аймагт үүссэн нөхцөл байдалтай холбогдуулан Цагааннуур тосгон, Өлгий сум, аймгийн Нэгдсэн эмнэлэгт хорио цээр тогтоож, орж гарах бүх хөдөлгөөнийг зогсоогоод байна.

Баян-Өлгий аймагт тарваган тахалаар хүн нас барсан байж болзошгүй шинж тэмдэг илэрч хорио, цээрийн дэглэм тогтоосон. Үүнтэй холбогдуулан өчигдөр /2019.05.01/ 14:50 цагт Баян-Өлгий-Ховд-Улаанбаатар чиглэлийн M-182 агаарын хөлгийг нийслэлд буусан даруйд тусгаарлан, хөлөгт зорчиж ирсэн зорчигчдыг тусгаарлан үзлэг хийсэн. Тус агаарын хөлөгт Баян-Өлгий аймгаас 11, Ховд аймгаас 47, нийт 58 зорчигч зорчиж ирсэн бөгөөд зорчигчдод Халдварт өвчин судлалын үндэсний төв, Хилийн мэргэжлийн хяналтаас бүрдсэн тусгай баг үзлэг хийн, дараагаар нь эмнэлэгт хүргэсэн юм.

Харин өнөөдөр ХӨСҮТ-өөс хийсэн шинжилгээний хариу гарч 11 хүн бүгд сөрөг буюу халдваргүй гэсэн оноштойгоор эмнэлэгээс гарчээ.