Монголчууд харь оронд хулгайн хэрэгт холбогдох нь ихссэн. Монголын 40-60 орчим мянган иргэн гадаад улсад гэмт хэрэгт холбогдсоны 75 хувь нь хулгайн гэмт хэрэг эзэлсэн байна. Тухайлбал, Өмнөд Солонгос улсад Монгол Улсын 1021 иргэн хүн гэмт хэрэгт холбогдсоны 67 хувийг хулгайн гэмт хэрэг эзэлжээ. Саяхан Тайландын эзэн хааны ордонд манай улсын гурван иргэн халаасны хулгайн гэмт хэрэгт холбогдож биднийг төдийгүй дэлхийг шуугиулсан.

Мөн албаны хүний яриагаар "Зүүн өмнөд Азид Монголын халаасны хулгайчид бөөнөөрөө очиж, хотоос хот хооронд дамжиж бүлэглэн хулгай хийж, хулгайлсан эд зүйлээ Монгол руу явуулдаг. Сүлжээ үүсчихсэн. Хятадад ч энэ байдал өссөн" гэв.

Үүнээс шалтгаалан иргэдийнхээ паспорт дээр “хулгайч” гэсэн тамга дарж гадаад ертөнцөд сурталчлах, санаа сэдчихээд сууж байна. Тодруулбал, өнгөрөгч долоо хоногт ЦЕГ-ын Гэмт хэргээс урьдчилан сэргийлэх хэлтсийн ахлах мэргэжилтэн, цагдаагийн дэд хурандаа Б.Чулуунтамирын ярилцлага хэвлэлд нийтлэгдсэн нь олны анхаарлыг татсан. Уг ярилцлагад “Дөрөвдүгээр сарын 19-нд Улсын ерөнхий прокурорын газар, Гадаад харилцааны яам, Цагдаагийн ерөнхий газрын төлөөллүүд нийлж, зөвлөгөөн зохион явуулсан. Гадаад улсад иргэдийнхээ гадаад паспорт дээр гэмт хэрэгт холбогдсон гэсэн тэмдэглэгээ хийдэг. Мөн зарим улсад гадаад руу зорчих эрхийг нь хязгаарладаг. Манай улсад зохицуулалт алга. Иймээс хулгайлах гэмт хэрэгт холбогдсон хүмүүсийн гадаад паспорт дээр тэмдэглэгээ хийлгэдэг болъё гэж ярьсан” хэмээн дурдсан байдаг.

Өөрөөр хэлбэл, энэ нь албаны түвшинд яригдаж эхлээд хэзээ мөдгүй албан ёсны шийдвэр гараад хэрэгжиж эхлэнэ ээ гэсэн үг. Үүний шалтгааныг гадаад оронд манай иргэд хулгайн гэмт хэрэг ихээр үйлдэж, улс орны нэр хүнд унаж буйтай холбон тайлбарлаж буй юм. Энэ бол төр нь иргэнийхээ эрх зүйн байдлыг дордуулж хохироох ШИЙДВЭР мөн. Улс орноо хулгайчаар дүүрснийг гадаад дэлхийгээр нэг зарласан. Одоо иргэнээ гадаадад "ХУЛГАЙЧ" гэсэн тамга дарж дэлхийд "сурталчлах" нь. Эх орон дотроо хулгайн асуудлаа хуулиа чангатгаж шийдэж чадахгүй байж, "Монгол хулгайч" гэх нэр томьёог , брэндийг дэлхийд гаргах нь. Уг нь хулгайн гэмт хэргийг бууруулах, хулгайчдын тоог цөөрүүлэх ганц гарц бол хатуу чанга хууль.

Манай урд хөршийнхөн хулгайч авлигач нартайгаа хатуу гараар тэмцдэг талаар бид олонтаа л сонссон . Тэрнээс биш хэдхэн хүнээс болж нийт Монголчуудыг хулгайч гэж дэлхийд зарлах нь дэндүү харамсалтай бас эмгэнэлтэй. Өнөөдөр манай улсад мөрдөгдөж байгаа хууль тогтоомж үнэхээр сул. Эрүүгийн хууль, Зөрчлийн хууль өнгөрсөн оны долоодугаар сарын 1-нээс хэрэгжиж эхэлсэнтэй холбогдуулан хулгайн гэмт хэргийн тоо эрс өссөн. Шалтгаан нь хулгайлах гэмт хэргийг гэмт хэрэг гэж үзэхийн тулд 300 мянган төгрөгийн босго тавьсан байна. Тухайн хулгайч 300 мянган төгрөгөөс доош эд хөрөнгө хулгайлбал Зөрчлийн тухай хуулиар хариуцлага хүлээнэ. Уг нь хулгай л бол хулгай биз дээ. Хүний юмыг нууцаар авч байгаа бол тэр хулгай. Мөрдөж байгаа хууль нь өөрөө хулгайн гэмт хэргийг өсгөх гол эх үүсвэр болж байна.

Энэ бүхний эцэст Монголоор дүүрэн хулгайчид төржээ. Гэвч манай улсын хууль тогтоогчид энэ зарчмыг үл ойлгох. Нөгөө талаар хулгайгаа нуух гээд хууль санаачлаад сууж байдаг хүмүүс. Том хулгайчууд нь хулгайлсан мөнгөөрөө сонгогчдын тархи, нүдийг хуураад төрийн толгойд сандайлаад эцэст эгэл жирийн иргэдээ дэлхийд хулгайчаар нь зарлахаар зэхэж байна. Тэгэхээр дотоодын хууль хяналтаа эхлээд чангатгах асуудлаа яръя. Мөн цагдаагийнхан ажлаа хийе. Их болоод томоохон хэмжээний хулгайг эс тооцвол жирийн иргэд эд зүйл, хөрөнгөө алдсан тохиолдолд хурдан шуурхай олж өгөх, хулгайчийг шийтгэх тийм үйлчилгээ байхгүй болсон нь нууц биш.

Хэрэв иргэдийн пасспортод хулгайч гэж тамга дарах гэж байгаа бол ЖДҮХС-ийн зээлээс хулгайсан хулгайч гишүүдийнх дээр бас дарахаа мартав аа.