Өмнөд Солонгосын олон ангит кино цувралын ард асар их хэмжээний мөнгө, Ази тивийн үзэгчдийн зах зээл явж байдаг. Тэгвэл саяхан гэр бүлээ цуцлуулах шийдвэрээ зарласан алдарт Сон-Сон хосоос үүдэлтэйгээр Солонгосын олон ангит кино хийдэг томоохон кино компаниуд гэрээндээ шинэ нөхцөл оруулж ирэхээр болжээ. Учир нь 33 настай Сон Жүүн Ки өөрийнхөө гол дүрд нь тоглосон “Arthdal Chronicles” олон ангит уран сайхны кино ид цацагдаж байхтай зэрэгцэн нэрт жүжигчин эхнэрээсээ салах болсноо дуулгасан.

Солонгосын хамгийн үзэсгэлэнтэй бүсгүйчүүдийн нэгд тооцогддог Сон Хие Кио нь улсдаа төдийгүй, бүс нутгийн хэмжээнд шүтэн бишрэгчдийн хүрээлэл ихтэй жүжигчин билээ. Түүнээс салах болсон Сон Жүүн Кигийн шийдвэр нь одоо дэлгэцээр цацагдаж байгаа олон ангит киноны рейтинг эрс унахад нөлөөлсөн байна. Учир нь хайртай жүжигчнээс нь гэр бүлээ цуцлуулах болсон шийдвэрийг нь дэмжихгүй байгаагаа илэрхийлж, олон мянган фенүүд нь Сон Жүүн Кигийн тоглосон цувралыг бойкотлох болжээ.

Ямартай ч хосууд сална гэдэг учир жанцантай, цаг үеэ ч гэсэн айхтар мэдэрдэг мэдрэмжтэй байх ёстой, зөвхөн хувийн амьдрал гэж харж болохгүй, ажил мэргэжлийн хариуцлага ч давхар явдаг гэдгийг уг кейс (тохиолдол) харуулж байна.

Өмнөд Солонгосын эх сурвалжийн мэдээлснээс үзэхэд өөрийнх нь тоглосон олон ангит цуврал гарч байх үед гэр бүл салалттай холбоотойгоор дуулиан шуугиан гаргасан тохиолдолд гэрээний дагуу торгуулийн хэмжээг гурав дахин нэмэгдүүлэхээр шинэ нөхцлийг жүжигчдийн гэрээнд оруулж өгч байгаа аж.

Дашрамд дурдахад Сон Жүүн Ки, Сон Хие Кио нарын гэр бүлээ цуцлуулах болсон шалтгаан нь хүүхэдтэй болох эсэх талаар маргаан, араар тавилт зэрэгтэй холбоотой хэмээн эх сурвалжууд мэдээлсэн юм.

Орчуулагч Д.Жаргалсайхан