Ийм мөрөөдөлтэй ээж аавууд хийгээд хүүхдүүд олон байх болжээ. Инээдтэй юм шүү. Цэцэрлэгт хүүхдээ өгөхийн төлөө иргэд нь мөрөөдөн, азтан болоосой хэмээн зальбирч суудаг улс манайхаас өөр байхгүй л болов уу.

“Би азгүй ээ” хэмээн толгой гудайн ярих хүүтэй таарлаа. Учрыг нь лавлавал хоёр нас хүрсэн жилдээ азтан болж цэцэрлэгт орох эрхээ авч чадаагүй учир 5 нас хүртлээ цэцэрлэгийн үүд татаагүй гэнэ. “Цэцэрлэгийн хажуугаар явахаар гоё хоол үнэртээд хүүхдүүд дуулдаг. Би орж чадахгүй байх аа” гэж хээв нэг ярих хүү насандаа баймгүй хэрсүү аж. Азгүй нэгэн болж, гэрийн хүн болсон хүүгийн хийдэг ажил нь ТҮЦ ажиллуулдаг ээждээ туслах. Гар хөлийн үзүүрт нь зарагдан, хашааны хог цэвэрлэж өдрийг өнгөрөөдөг тухайгаа жаргалтай нь аргагүй ярьж байсан юм.

Энэ мэт амьдралын өнгийг бид нийслэлүийнхээ захын дүүргээр очоод л мэдэрч болно. Үе тэнгийнхэнтэйгээ хөгжилдөн наадаж, сургуулийн өмнөх боловсрол эзэмшиж байх ёстой олон хүүхдүүд цоожтой хаалганы цаана дахиад л үлдэх нь6

Жилийн жилд л шинэ сургууль, цэцэрлэг барьж байгаа гэх ч нөгөө л сугалаат арга хэмжээ хэвээр л байна.

Энэ хичээлийн шинэ жилд улсын хэмжээнд 93 цэцэрлэг, 48 сургууль болон өргөтгөл шинээр ашиглалтад орохоор төлөвлөсөн юм билээ.Тэгвэл нийслэлийн хэмжээнд 22 сургууль,64 цэцэрлэгийн барилга ашиглалтад орохоор байгаа гэсэн. Нийслэлийн төрийн өмчийн цэцэрлэгт шинээр элсэх, үргэлжлүүлэн суралцах хүүхдийн бүртгэлийн үйл ажиллагааг долоодугаар сарын 22-ны өдрөөс эхлэн наймдугаар сарын 22-ны өдрийг дуустал цахим хэлбэрээр зохион байгуулж байна. Наймдугаар сарын 02-ны өдрийн 10.00 цагийн байдлаар цахим бүртгэлд 23.546 хүүхэд бүртгэгдсэн байгаа аж. Бүртгүүлж чадаагүй, боломжгүй хүн мянга дөхөж байдаг гэсэн албан бус мэдээлэл байна.

Жилийн жилд энэ мэт олон цэцэрлэг нээж байгаа гэх ч яг бодит байдал дээр ашиглалтанд орж хүүхэд хүлээж авсан эсэхийг тогтоосон газар байна уу. Төрийн эрх мэдэлтний хүнд суртлаас болж царцсан барилгууд цөөнгүй бий. Царцаах, танах ажиллагаанд хамгийн түрүүнд эмнэлэг, сургууль, цэцэрлэгийн барилгын ажил өртдөг аж. Хамгийн ойрын жишээ гэхэд Хан-Уул дүүрэгт баригдаж эхлээд 10 жил болж буй IV төрөх эмнэлэг юм. Баянзүрх дүүргийн 13 хорооны нутаг дэвсгэрт байрлах 14-р сургууль 2013 онд бие засах өрөөнүүдээсээ эхлэн нурснаар тус сургуульд сургалт явуулах боломжгүй болж багш, сурагчдаа дөрвөн сургууль руу тараан, өнөөг хүртэл хүндхэн нөхцөл байдалтай хичээллэж байсан юм. Гурван жил хүлээсний эцэст 2017-2018 оны хичээлийн жилд 9-р сарын 1-нээс даржуй 20 хоногийн дараа хичээл нь эхэлж байсан.

Нийслэлийн Иргэдийн Төлөөлөгчдийн Хурлын Тэргүүлэгчдийн 2017 оны 81 дүгээр тогтоолоор “Нийслэлийн боловсрол-2020” дэд хөтөлбөр батлагдсан. Дээрх дэд хөтөлбөрийг хэрэгжүүлснээр нийслэлд 2020 он гэхэд 50 сургууль, 60 цэцэрлэг барихаар төлөвлөсөн юм билээ. Энэ ажил хэзээ дуусч Монголын ирээдүй болсон бяцхан хүүхэд багачууд тавлаг тохилог орчинд сурч хүмүүжих юм бол.

ЦЭЦЭРЛЭГ ХҮҮХДЭД ЯАГААД ЧУХАЛ ВЭ?

Сургуулийн өмнөх боловсрол олон давуу талтай. Тэр дундаас хамгийн чухлыг нь сэтгэл зүйчид онцолжээ.

-Нийгэмтэй болон үе тэнгийнхэнтэйгээ харилцаж сурна.

-Өөрийгөө хэн болохыг таньж мэддэг. Бие хүн гэдэг ойлголтыг авч нийгэмших үндэс суурь тавигддаг

-Өөрийгөө илэрхийлэх чадварыг эзэмшдэг

-Оюун ухаан нь тэлж, сэтгэн бодох чадвар, ой тогтоолт эрс сайжирдаг

Дуу шүлэг цээжлэх, тоглож наадах, суурь мэдлэг олж авах гээд тоочиж баршгүй олон давуу тал бий. Харин цэцэрлэгт явалгүй гэртээ үлддэг хүүхдүүд чадвар эзэмших нь даруй 50 хувь буурч, ганцаардсан нэгэн болох нь элбэг аж. Түүнээс гадна бага насны хүүхдээ гэрт нь үлдээснээр гэмт хэрэгийн хохирогч болох цаашлаад гал түймрийн аюулд өртөх нь элбэг аж. Статистик мэдээнээс харахад өнгөрсөн 2018 онд гэхэд гал түймрээс болж 77 хүн амиа алдсаны 33 нь хүүхэд байгаа нь юутай харамсалтай.

“Цахим элсэлт”-ийн үйл ажиллагаа энэ сарын 23-ны баасан гаригт нийслэлийн хэмжээнд явагдаж бүртгэлийн тоо нь хяналтын тооноос хэтэрсэн тохиолдолд тухайн цэцэрлэгийн элсэлтийн комис систем дээр санамсаргүй түүврийн аргаар “Цахим элсэлт”-ийн үйл ажиллагааг иргэд, эцэг эхчүүдэд нээлттэйгээр зохион байгуулах юм билээ.

Хурай, хурай, хурай. Цэцэрлэгийн мөрөөсөл болсон хүүхдүүд азтан болоод цэцэрлэгт яваарай.