Японы засгийн газраас хар салхины талаар олон нийтэд цаг үеийн мэдээллийг өгсөөр байна. Хар салхины улмаас голууд үерлэж, хөрсний нуралт үүсжээ. Одоогийн байдлаар нийт есөн хүн нас барж, арван таван хүн ор сураггүй алга болсон бөгөөд Японы зүүн хойд бүсийн 41,000 өрх гэрэл цахилгаангүй болж Япон улс даяар 90 гаруй хүн бэртэж, гэмтжээ. Усанд автсан газар онцгой байдлын сайд, батлан хамгаалахын сайд нар томилогдон ажиллаж байгаа ба цэрэг, цагдаа, гал унтраах алба гээд нийт 27000 хүн үерийн голомтод ажиллаж байгааг эх сурвалж мэдээллээ.

Шинзо Абэ сайд хэлэхдээ “Цахилгааны тасралт, усны хүрэлцээ, зам тээврийн асуудлыг яаралтай хэвэнд нь оруулахын төлөө бүх хүчээ дайчлан засгийн газар ажиллаж байна” гэв.

ДОЛООН САЯ ОРШИН СУУГЧДАД ОРОН ГЭРЭЭ ОРХИН НҮҮХ ЗӨВЛӨМЖ ХҮРГҮҮЛСЭН

Японы Хоншү арлындолоонсая оршин суугчдад орон гэрээ орхин нүүх зөвлөмж хүргүүлсэн бөгөөд Шизүока мужийн Кикүгава, Гүнма мужийн Үэно, Токио хотын Оошима хотод хүчтэй аадар борооны улмаас аюулын дөрөвдүгээр зэрэглэлийн сэрэмжлүүлэг өгч, 3,000 гаруй айл өрхийн 8,000 гаруй иргэдэд хоргодох байранд шилжин нүүх чиглэлийг өгсөн байна. Мөн бусад хот, дүүрэг, тосгодын 88 мянган айл өрхийн 1 сая 790 мянга гаруй иргэдэд хар салхины үеэр аюулгүй газар, хоргодох байранд шилжин нүүх шаардлагатайг мэдэгдэж, сэрэмжлүүлэг өгөөд байгаа ажээ.

Далайн хар шуургатай холбоотойгоор Японы “Тоокүй” төмөр замын компани өглөөний 10:00 цагаас эхлэн, Одакүй, Сагами, Тама Тоши Монорайл, Тобү, Кэйо, Сэйбү, Токио хотын Цүкүба экспресс, Юрикамомэ, Токио Монорайл зэрэг төмөр замын сүлжээнүүд 12:00 цагаас эхлэн тус тус бүх чиглэлд, JR компани хэсэгчилсэн байдлаар хөдөлгөөнөө зогсоогоод байна.

ХОХИРОЛЫН ТОО, ХЭМЖЭЭ ЦАГ ТУТАМД ӨӨРЧЛӨГДӨЖ БАЙНА

Токио хотын метронууд энэ сарын 12-ны өдрийн үдээс хойш үйл ажиллагаагаа мөн зогсоолоо. Үүнээс гадна томоохон супер маркет, барааны дэлгүүр, 24 цагийн үйлчилгээтэй дэлгүүрийн ихэнх салбарууд 12-ны өдрөөс ажиллахгүйгээ мэдэгдэж, Токио хот болон Канагава мужид “Family Mart” сүлжээ дэлгүүрийн 660 салбар, “Lawson” сүлжээ дэлгүүрийн 435 салбар дэлгүүрүүд хаалгаа барьжээ.

Далайн хар шуургатай холбогдуулан ард иргэдийн зүгээс хоол хүнс, ус, дулаан хувцас, газ, гар чийдэнг урьдчилан бэлтгэх зэрэг байгалийн болзошгүй гамшгийн үеийн бэлэн байдлыг хангаж байгаа бөгөөд зарим бүс нутгуудад иргэд хоол хүнс, усыг их хэмжээгээр худалдан авч байгаатай холбогдуулан бараа бүтээгдэхүүний хомсдол гарч эхэлсэн байна.

Иймээс “Япон Улсад оршин сууж буй манай улсын иргэд анхаарал сэрэмжтэй байж, тухайн орон нутгийн засаг захиргааны байгууллага, онцгой байдал эрхэлсэн нэгжээс олон нийтэд түгээж буй мэдээ, мэдээлэл, зааварчилгаанд анхаарч, аюулгүй байдлаа хангахыг анхааруулж байна” гэж Монгол Улсаас Япон Улсад суугаа элчин сайдын яамнаас мэдэгдлээ.