Үндсэн хуулийн цэцийн гишүүд өнөөдөр шинэ даргаа сонгоно. Өмнөх дарга Д.Одбаяр нь өөрөө албан тушаалаа өгөх өргөдөл өгсөн учраас уг суудал эзэнгүй байгаа юм. Ингэснээр Цэц дараачийн даргаа тодруулах шаардлагатай болсон. Харин Монгол Улсын Үндсэн хууль дахь Цэцийн тухай хуульд “Цэцийн даргаар сонгох хүний нэрийг Цэцийн гишүүд дотроосоо дэвшүүлэн хуралдаанаараа хэлэлцэж, саналыг нууцаар хурааж нийт гишүүний олонхын санал авсан хүнийг сонгоно” хэмээн заасан байдаг.

Хэдийгээр цэцийн гишүүдийн дотроос хэлэлцэж сонгогдох даргын нэр хараахан тодроогүй ч ажиг сураг гарч, таамаг магадлал хөвөрч эхэллээ. Ер нь, ҮХЦ-ийн есөн гишүүн зургаан жилийн хугацаатай УИХ, ЕТГ, Улсын дээд шүүхээс оруулсан саналын дагуу томилогддог. Тэдний хоёрынх нь буюу Улсын Дээд шүүхээс санал оруулан, томилогдсон Д.Солонго, Ш.Цогтоо нарын гишүүдийн бүрэн эрхийн хугацаа ирэх сарын 26-ны өдөр дуусгавар болох юм. Тэгэхээр ҮХЦ-ийн гишүүн Г. Баясгалан, Ш. Солонго, Б. Буяндэлгэр, Ц. Нанзаддорж, Г. Туулхүү, Н. Чинбат нарын нэг нь ҮХЦ-ийн даргаар сонгогдоно. Тухайлбал, УИХ-ын квотоор цэцийн гишүүн болсон Г.Баясгалан, одоо ҮХЦ-ийн даргын үүрэг гүйцэтгэж байгаа Н.Чинбат нар өндөр магадлалтай гэж яригдаж байна. Мөн ҮХЦ-ийн шинэ даргаар эмэгтэй хүнийг буюу Ш.Солонгыг томилогдох магадлал их бий гэх яриа ч байна.