Ардчилсан намын дарга С.Эрдэнэ цаг үеийн асуудлаар мэдээлэл өглөө.

ОДОО ҮР АШИГГҮЙ БҮТЭЭН БАЙГУУЛАЛТ НЭРИЙН ДОР БАЙШИН БАРЬДАГ ЦАГ БИШ

- УИХ, Засгийн газарт өргөн барьсан тогтоолын төслийн хэрэгжилтийг хагас жилээр тооцоход 417 орчим тэрбум төгрөг зарцуулагдахаар байна. Үүний эх үүсвэрийг хаанаас гаргахаар тооцоолж байгаа вэ? Улсын төсвөөс гаргах уу?

- Коронавирус цар тахалтай холбоотой асуудлыг даван туулахад чиглэсэн нийгэм, эдийн засгийн шаардлагатай санхүүгийн эх үүсвэрийг гаргах боломж 2020 оны улсын төсөвт бүрэн байгаа. Хөрөнгө оруулалтын зардалд 3,1 их наяд төгрөг тусгагдсан. Эрх баригчид эхний зургаан сард багтааж хөрөнгө оруулалтын зардлыг яаралтай зарцуулах сонгуульд чиглэсэн алхмууд хийж байгаа. Үүнийгээ зогсоогооч. Одоо үр ашиггүй бүтээн байгуулалт нэрийн дор байшин барьдаг цаг биш. Зарцуулах гэж байгаа хөрөнгөө коронавирусын цар тахлын аюул, гамшгийг давахад зарцуулах зайлшгүй шаардлага үүсээд байна. Энэ саналыг Ардчилсан нам хүргүүлж байна. Эх үүсвэр хангалттай байгаа. Улсын төсвөөс эх үүсвэрийг гаргана. Аль болох гадаадаас зээл авах, өрөө нэмэгдүүлэхгүй байх байр суурийг баримтлах ёстой. Бидэнд дотоодын нөөц боломж хангалттай байгаа шүү дээ.

БУСАД УЛС ТӨРИЙН НАМУУД САНХҮҮГИЙН ЭХ ҮҮСВЭРЭЭ ИЛ ТОД ЗАРЛАХ ЦАГ НЬ БОЛСОН

-Ардчилсан нам 100 сая төгрөгийн хандивыг ил тод зарласан. Бусад намууд болон эрх баригч нам хандивын талаар ил тод зарлахгүй байна шүү дээ?

-Ардчилсан намыг харлуулах, гутаах , гүтгэх хандлагууд нэлээд ирж байна. Гэхдээ бид байр суурин дээрээ хатуу зогсоно. Улс төрийн намуудын санхүүжилтыг ил тод болгох, гүйцэтгэл, зарцуулалтаа ил тод тайлагнах шаардлагыг олон жилийн турш иргэд болон хэвлэл мэдээллийн байгууллага шаардаж ирсэн. Ардчилсан нам 2020 оны УИХ-ын сонгуульд оролцохдоо анх удаа санхүүгийн эх үүсвэрээ ил тод зарласан. Ингэж зарласныхаа төлөө янз бүрийн гүтгэлэгт орж байна. Түүнчлэн янз бүрийн асуудлуудыг бидэнд хамаатуулах гэж оролдож байна. Үүнд ямар ч хууль зөрчсөн асуудал байхгүй. Монгол Улсын Улс төрийн намуудын тухай хуулийн 18.1, 16.2.1-д заасан заалтыг үндэслээд Ардчилсан намын үндсэн дүрэмд заасан заалтынхаа дагуу төлөөллийн төв байгууллага өөрөө татварынхаа хэмжээг тогтооно. Санхүүжилтын эх үүсвэрээ тогтоогоод явж байна. Үүнд ямар нэгэн хууль бус, дүрэм зөрчсөн зүйл байхгүй гэдгийг хариуцлагатайгаар мэдэгдье. Бусад улс төрийн намууд санхүүгийн эх үүсвэрээ ил тод зарлах цаг нь болсон. Ялангуяа эрх баригч МАН санхүүжилтын эх үүсвэрээ зайлшгүй зарлах шаардлагатай. 2020 оны улсын төсвийн хөрөнгө оруулалтаар батлагдсан 3,1 их наяд төгрөгийн гүйцэтгэлийн хуваарийг хараарай. Эхний зургаан сард багтааж хөрөнгө оруулалт, худалдан авалтын ажлыг дуусгахаар төлөвлөсөн. Энэ бол цэвэр сонгууль руу чиглэсэн төсөв байсан гэдгийн том жишээ.

- Өнгөрсөн долоо хоногт танай Үндэсний бодлогын хорооны гишүүн Д.Мөнх-Эрдэнэ намын дотоод асуудал, санхүүтэй холбоотой мэдээлэл хийсэн. Үүнд албан ёсны тайлбар өгөх боломжтой юу?

-Аль ч байгууллагад дотоод нууц гэж байдаг. Дотоод дүрэм журам гэж байдаг. Айл ч гэсэн өөрийнхөө хөрөнгө орлогын эх үүсвэрийг хэн дуртайд нь зарлаад байдаггүй шүү дээ. Хэдийгээр нууц юм шиг байгаа боловч дотооддоо санхүүжилт, санхүүгийн эх үүсвэр ил тод байгаа гэдгийг хэлмээр байна. 2017 онд энэ ажлыг авснаас хойш гурван жилийн турш санхүүгийн үйл ажиллагаандаа аудит хийлгэж байна. Сангийн яаманд Ардчилсан нам хоёр удаа санхүүгийн үйл ажиллагааны тайлангаа албан ёсоор хүргүүлсэн. Улс төрийн намуудаас хуулийн дагуу Сангийн яаманд санхүү тайлангаа хүргүүлсэн нэг ч нам байдаггүй юм байна лээ. Манай намын хувьд хоёр удаа хүргүүлсэн. Дээрээс нь аудитын байгууллагаар жил бүр аудит хийлгэж, түүнийгээ Үндэсний бодлогын хороонд тайлагнадаг.

- 300-400 сая төгрөг нэхэж байгаа гэдэг мэдээлэл үндэслэлтэй юу?

-Ямар ч мөнгө төгрөг нэхээгүй. Дунд шатны намын байгууллагуудтай хамтарч ажиллах гэрээ байгуулаад явж байна. Жишээ нь, Тухайн гэрээнд дөрөв, тавдугаар сард ямар санхүүжилт гарах вэ, ямар зардал мөнгө санхүүжүүлэх вэ гэдгээ намын удирдлагуудтай хамтраад хэлэлцээд явдаг. Бусад намуудын эсвэл гадны захиалгатайгаар улс төр хийж, шантаажилдаг ийм тал дээр Д.Мөнх-Эрдэнэ шиг залуучууд гаршчихсан. Ийм явуургүй, өдөөн хатгасан үйл ажиллагаанд Ардчилсан нам автахгүй. Бид өөрсдийн дүрэм журмын дагуу ажлаа хийгээд явна.

ЭХНИЙ ЭЭЛЖИНД 50 ОРЧИМ МЯНГАН ИРГЭНД ЯАРАЛТАЙ ТУСЛАМЖ, ДЭМЖЛЭГ ҮЗҮҮЛЭХ ШААРДЛАГАТАЙ

-УИХ, Засгийн газарт өргөн барьсан дөрөв дэх тогтоолын төслийн талаар мэдээлэл өгөөч?

-Гадаад улсад сурч байгаа, эмчилгээгээр зорчсон, түр дамжин өнгөрсөн, ажиллаж амьдарч байгаа нийт 195 орчим мянган иргэн байгаа гэсэн судалгаа байдаг. Үүнээс элчин сайдын яамдууд болон холбогдох газруудаар дамжуулан судалгаа хийсэн. Эхний ээлжинд 50 орчим мянган иргэнд яаралтай тусламж, дэмжлэг үзүүлэх шаардлагатай байна.