“Машинтай жагсаал холбоо”-ны ерөнхий зохицуулагч Б.Цэгмэдтэй ярилцлаа.

-Ерөнхий Сайд У.Хүрэлсүх Засгийн газрын 296 тогтоолыг хүчингүй болгох чиглэл өгсөн талаар та өөрийн цахим хуудсаараа дамжуулан лайв мэдээлэл хийсэн. Энэ талаар тодруулбал?

-Өчигдөр Ерөнхий сайд У.Хүрэлсүх Сангийн сайд Ч.Хүрэлбаатар, УУХҮ-ийн сайд Д.Сумьяабазар нарт чиглэл өгч, Засгийн газрын 296 дугаар тогтоолыг хүрээнд байгуулагдсан “Эрдэнэс Тавантолгой майнинг”ХХК-ийг татан буулгаж, “Эрдэнэс Тавантолгой “ ХХК-ийг хэвийн ажлаар ханга гэсэн үүрэг, чиглэл өгсөн. Одоогоор цаасан дээр буугаагүй байгаа. Энэ асуудал ирэх долоо хоногийн Засгийн газрын хуралдаанаар орох ёстой. Ингээд Засгийн газрын тогтоол гаргана.

Ерөнхийдөө өөрсдөө дундаас нь ашиг олох гэж охин компани байгуулсан шүү дээ. Өөрсдөдөө зориулж хууль баталсан хүмүүс. Хуулийн дагуу хулгай хийж эхэлсэн. УУХҮ-ийн сайд Д.Сумьяабазар, Сангийн сайд Ч.Хүрэлбаатар, Ерөнхий сайд У.Хүрэлсүх нараас гадна М.Энхболд Засгийн газрын 296 тогтоолыг гаргаж баталсан. Эдгээр хүмүүс ард түмний нүдэн дээр хэрэлдэж байгаа мэт харагдаж байгаа боловч цаагуураа иймэрхүү ажлыг зохион байгуулж байна.

“TTJVCQ” КОМПАНИ “ЭРДЭНЭС ТАВАНТОЛГОЙ” ХК-Д ИРЭХ БАЙСАН ТЕХНИК ХЭРЭГСЛИЙГ БУЛААЖ АВСАН

-“Эрдэнэс Тавантолгой” ХК энэ жил ашигтай ажилласан. Гэтэл “Эрдэнэс Тавантолгой майнинг” охин компани гарснаас хойш орлогогүй боллоо гээд ажилчид нь тэмцэж эхэлсэн. Одоо тэмцэл нь үргэлжилж байгаа юу?

“Эрдэнэс Тавантолгой” ХК-ийн Үйлдвэрчний эвлэлийн гишүүдийг ажлаас нь халснаас болж, ажилчдын тэмцэл эхэлсэн. Биднийг хот руу явсны дараа таван ажилтанд цагдаагийн байгууллагаас зөрчлийн хэрэг үүсгэн шалгаж эхэлсэн. Ажилчдын тэмцэл үргэлжилж байгаа бөгөөд “Эрдэнэс Тавантолгой майнинг” ХХК-г татан буулгаж, ард түмний 1072 хувьцааг баталгаажуулж өгөхийг Засгийг газраас шаардаж байна. Мөн БНХАУ-ын хэд хэдэн компани байгаа. Монгол Улсын Үндэсний аюулгүй байдлын зөвлөлөөс 2019 онд зөвлөмж гаргаж, УУХҮ-ийн сайд Д.Сумьяабазарт “TTJVCQ” компаний гэрээг цуцлах талаар даалгасан байгаа.

Энэ компани нь Монгол Улсын Засгийн газарт хор хөнөөлтэй гэрээ хийсэн байна. Иймээс хууль хяналтын байгууллагаар шалгуулах шаардлагатай. Мөн хохирлыг төлүүлэх шаардлагатай гэсэн байгаа. Монголын “Хишиг арвин” компани хөрс хуулалтыг /нэг м³-ийг/ 5886 төгрөгөөр хийж байсан. Харин “TTJVCQ” компани 4.36 ам доллар буюу 12813 төгрөгөөр хөрс хуулалт хийж байна. Үүнийг Монгол Улсын Үндэсний аюулгүй байдлын зөвлөл болих хэрэгтэй гэсэн. Гэвч одоог хүртэл ажиллаж байна. Энд мөнгөний сонирхол их байна. Бидний ногдол ашиг буурч байна. “TTJVCQ” компани “Эрдэнэс Тавантолгой” ХК-д ирэх байсан техник, хэрэгслийг булааж авсан. Тухайлбал, Хүнд даацын экскаватор, авто ачигч зэрэг олон техник хэрэгслийг нь авсан байна.

ЗАСГИЙН ГАЗРЫН 296 ТОГТООЛ ДЭЭР Ч.ХҮРЭЛБААТАР, Д.СУМЬЯАБАЗАР, У.ХҮРЭЛСҮХ НАР ГАРЫН ҮСЭГ ЗУРСАН

-Хичнээн техник хэрэгсэл авсан юм бол?

-Надад байгаа баримтаар 32 авто машин байгаа. Цаана нь хэдэн машин байгааг таашгүй. Засгийн газрын 296 тогтоол дээр Ч.Хүрэлбаатар, Д.Сумьяабазар, У.Хүрэлсүх нар гарын үсэг зурсан байгаа. Харин УИХ-ын тогтоол дээр М.Энхболд гарын үсэг зурсан. Жирийн иргэд ойлгоход хэцүү. Охин компани байгуулж, 30 хувийг нь гадаад, дотоодын хөрөнгийн биржээр арилжаална гэсэн мөртлөө одоо өөрчилсөн байна шүү дээ.

Одоо нэг хувийн угаах үйлдвэр дээр хэрүүл маргаан болж байна. Хувийн компани угаах үйлдвэр бариад ажиллаад эхлэхээр “Энэ болохгүй. Үйлдвэр барина” гээд байгаа. 1072 хувьцаа гээд яваад байсан Л.Наранбаатар өнөөдрийг хүртэл юу ч дуугарахгүй байна.

-Ашигтай ажиллаж байсан компанийхаа бүх эрх мэдлийг охин компанид шилжүүлж “Эрдэнэс Тавантолгой” ХК цаасан дээр нэр төдий үлдэж байгаа юм биш үү?

-“Эрдэнэс Тавантолгой” ХК нүүрсээ зараад болж байсан. Хажууд нь охин компани заавал байх шаардлага байхгүй. Одоо нүүрс ачиж буулгах, хөрс хуулах гээд бөөн луйвар болж байна. УИХ болон Засгийн газрын тогтоол гаргаад нэг компани байгуулж, үндсэн компанийнхаа орлого болгож байна. Юу ч байхгүй байсан “Эрдэнэс Тавантолгой Майнинг” ХХК нүүрс зарж эхэлсэн. Хөрс хуулалт хийхгүй байгаа. “Эрдэнэс Тавантолгой” компанийн таван жил хөрсийг нь хуулсан газрыг шууд ашиглаж байна.

“ЭРДЭНЭС ТАВАНТОЛГОЙ МАЙНИНГ” ХХК ҮЙЛ АЖИЛЛАГААГАА ЯВУУЛСААР БАЙВАЛ БИД НОГДОЛ АШИГ АВАХГҮЙ

-Монголын ард түмний дийлэнх нь буюу 2.5 сая хүн хувьцаа эзэмшиж байгаа “Эрдэнэс Тавантолгой” ХК одоогоор ямар байдалтай байна вэ?

“Эрдэнэс Тавантолгой” нэг тэрбум ам.долларын ашигтай ажилласан. Ард түмэнд хувьцаа тараах гэж байгаа. Уг нь хувьцаагаа эрт тараах ёстой байсан юм. Гэтэл зориуд сонгуулийн үеэр тараах гэж байна. Одоо Засгийн газрын 296 дугаар тогтоол хүчингүй болчихвол “Эрдэнэс Тавантолгой” компанийн үйл ажиллагаа хэвийн явагдана. Мөн энэ жил ашигтай ажилласан юм чинь дараа жил ашиг нь нэмэгдээд явна. Хэрэв “Эрдэнэс Тавантолгой Майнинг” ХХК үйл ажиллагаагаа явуулсаар байх юм бол бидэнд ногдол ашиг ирэхгүй. Бидний 1072 хувьцаа байхгүй болно.

-Одоо бүх орлого нь охин компани руу орж байгаа болохоор хувьцаа тараахад хүндрэлтэй болох юм биш үү?

-Охин компани гээд байгаа нь “Эрдэнэс Тавантолгой Майнинг” ХХК болчихсон. “Эрдэнэс Тавантолгой” ХК –нд орлого орохгүй байгаа. Гэхдээ уурхайчид 16 хоног тэмцэл хийсний үр дүнд Засгийн газрын 296 тогтоолыг хүчингүй болгох асуудал яригдаж эхэлсэн. Бид уурхайчдаа дэмжиж тэмцэж байна.

-Баярлалаа.