Уналт, таталтаас шалтгаалсан хөгжлийн бэрхшээлтэй иргэдэд нэн хэрэгцээтэй эмийн нийлүүлэлт тасраад байгаа талаар “Ээлтэй ертөнц” ТББ-ийн тэргүүн Т.Туяажаргалаас тодрууллаа.

-Хүнд хэлбэрийн саажилт, уналт таталттай хүүхдэд нэн шаардлагатай эмийн хангамж тасарсан байгаа талаар мэдээлэл өгөхгүй юу?

-Ковид19 вирусын улмаас агаарын хил хаагдсантай холбоотойгоор хүнд хэлбэрийн уналт таталттай хүнд хэрэглэдэг гол нэр төрлийн эмийн хомсдол үүсээд байна. Үүн дотроо Солонгос, Герман зэрэг орнуудаас авдаг эмийн нийлүүлэлт тасалдалд орсноос эмгүй болсон 30 орчим хүн өнгөрсөн 2 сараас эхлэн манай ТББ-т хандаад байна. Эмээсээ шууд хамааралтай байдаг эдгээр хүмүүст хэдхэн секундын өвчний хэлбэрүүд өгөхөд л тархин дахь эд эс нь үхжих тэр нь тавирахгүй их удвал амнаас нь хөөс сахраад л цаашлаад амь насанд нь эрсдэл үүсэх нөхцөл үүсдэг учраас эмгүйгүүр удаан хүлээх боломжгүй юм.

-Монгол улсад худалдаалдаг уналт таталтын эмүүд үзүүлэх нөлөөний хувьд шаардлагад нийцэхгүй байгаа талаар та ярьлаа?

-Монгол улсын эмийн зах зээл дээр уналт таталтанд хэрэглэдэг таван төрлийн эмийг зөвшөөрөн худалдаалдаг гэдэг л дээ. Гэвч эдгээр эмүүд нь яг практикт уналт таталт өгч байгаа хүүхдэд үзүүлэх нөлөөлөл муутай нь ажиглагддаг. Өвчин эхэлсэн үед түргэн хугацаанд таталтыг зогсоох, давтамжийг бууруулах зэрэг нөлөөлөл муутай байдаг нь эцэг эхчүүдийг өөрийнхөө хүүхдэд тохирдог эмийг дээрх болон бусад орнуудаас өөрсдөө захиалж зарим тохиолдолд бараг хууль бусаар шахуу олж авч хүүхэддээ хэрэглүүлэх нөхцөл рүү түлхдэг юм. Монгол улс энэ төрлийн эмэнд тавьдаг стандарттай юу гэвэл байна. Гэвч нэрлэж зөвшөөлсөн эмүүд нь бодит үр дүн муутай ийм байдаг. Хэрэглэгчээс нь асуудаггүй, судалгаагүй ажил хийсэн учраас эмийн нэр цаасан дээр бичээстэй үлдэж эцэг эхчүүд шаардлагад нийцдэг эмийн эрэлд гардаг.

-Эмийг хаанаас захиалан авдаг юм бэ?

-Жишээлбэл миний хувьд Солонгост 320 төгрөгийн үнэлгээтэй байдаг карбомазафин эмийг 1000-1500 төгрөгөөр захиалан авдаг.

-Эмийн хөнгөлөлтийн талаар?

-Дээрх зөвшөөрөгдсөн 5 төрлийн эм л хөнгөлөлттэй эмийн жагсаалтанд байдаг. Гэтэл байнгын эм ууж хэрэглэх шаардлагатай болдог хүн, гэр бүлд энэ нь тэгтэл мэдрэгдтэл хөнгөлөлт болж чаддаг уу? гэвэл хэцүү. Дээрээс нь зөвшөөрөгдсөн нэр бүхий эмүүд бодит хэрэгцээ шаардлагаа хангадаггүй учраас үнийн хөнгөлөлт ч утгагүй л болж таарч байгаа юм. Тиймээс нийгмийн зорилтот бүлэгт хамаатай асуудал шийдэж байгаа бол тэр дунд байгаа хүмүүсээс нь асуугаач, санал бодол сонсооч. Тэдэнтэй зөвлөөч. Уналт таталтын эмийг энэ хэлбэрийн хөгжлийн бэрхшээлтэй иргэн, тэдний ар гэр л хэрэглэдэг юм аа. Тэгэхээр тэр хүмүүсээс асуух санал бодол сонсох зайлшгүй хэрэгцээ байна шүү гэдгийг хэлмээр байгаа юм.

-Эмийн хомсдолын талаар салбарын яаманд мэдэгдсэн үү?

-Эмийн тасалдал үүсч эхэлсэнээс эхлээд бид энэ асуудлаар ЭМЯ цаашлаад ЗГ-т хандсан. Бидний асуудалд анхаарал хандуулж өгөөч. Бидний хүүхдүүдэд нэн шаардлагатай байгаа эмнүүдийг тусгай үүргийн нислэгүүдэд багтаах талаар арга хэмжээ авч өгөөч гэж удаа дараалан хүсэлт илгээсээр байсан. Гэвч өдийг хүртэл бидэнд ямар нэгэн хариулт өгөлгүй байж байна. Тиймээс эмгүй байгаа хүмүүс тэдний гэр бүлүүд яах учраа олохгүй “ Улаан гэрэл” ассан байдалтай л байна.

Н.Баярмаа