-ЗАСГИЙН ГАЗРЫН ТЭРГҮҮЛЭХ ЧИГЛЭЛ, БҮТЭЦ БҮРЭЛДЭХҮҮН ЗӨРЧИХЛӨӨ

УИХ-ын гишүүн О.Цогтгэрэл: Засгийн газрын бүтэц, зохион байгуулалт зорилго түүний тэргүүлэх чиглэлээс ихээхэн хамаарна. Ерөнхий сайд долоон чиглэлд онцгойлон анхаарна гэсэн. Гэтэл бүтэц, зохион байгуулалтын асуудал яригдаж байхад экспорт, үйлдвэрлэл, ажлын байр луу чиглэсэн зүйл бага байна. Бодлого, төлөвлөлтийн асуудалд ач холбогдол бага өгсөн юм уу гэж харж байна. Эдийн засгийн өнөөгийн нөхцөл байдал чухал байна. Эдийн засгийн асуудал нь явсаар бизнесийг дэмжих, Монголын нөхцөлд худалдааг дэмжих асуудал. Тэргүүлэх чиглэлд экспортыг дэмжихэд олон улсын худалдааг хөнгөвчлөх нь чухал. Гэтэл бүтэц, зохион байгуулалт дээр худалдааны асуудал нь ХААЯ-ны сайдын харъяанд байна. Монголоос гарч буй экспортын бараа бүтээгдэхүүн Хятадын зах зээл рүү ороход 40 гаруй хувийн татвартай ордог. Монгол руу буцаад ороход 15.5 хувийн татвартай. Эелдэгээр хэлэхэд хоёр хөрш маань манай улсыг худалдааны хоригт оруулсан. Худалдаа, эдийн засаг, бизнесийн өсөлт, идэвхжлийг боомилж байгаа энэ том асуудал руу шинэ Засгийн газар яагаад анхаарсангүй вэ. Засгийн газрын тэргүүлэх чиглэл, бүтэц бүрэлдэхүүн зөрчихлөө.

-ӨНӨӨГИЙН НӨХЦӨЛ БАЙДАЛ ЭНЭ БҮТЦИЙГ ДААХ УУ-

УИХ-ын гишүүн С.Одонтуяа: Эдийн засгийн асуудал зөвхөн нэг намын асуудал биш. Энэ бол нийтийн зовлон. Жирийн үе байсан бол бүтэц бүрэлдэхүүнийг 100 хувь дэмжинэ. Гэтэл өнөөдөр эдийн засгийн гүн хямралтай үе учраас сэтгэл зовниж байна. Өнөөгийн нөхцөл байдал энэ бүтцийг даах уу. Ард түмний үүрэх ачааг хүндрүүлэхгүйгээр бүтцээ авч явж чадах уу. Төсвийн орлого 1 их наяд 490 тэрбум төгрөгөөр тасарсан, экспортын орлого 40 хувиар, уул уурхайн орлого 30 хувиар буурсан байна. Тендэр зарладаг боловч ААН-үүддээ мөнгийг нь өгөхгүй хэдэн жил дамнуулдаг. ААН-үүд нь дампуурч, банкны өрөнд баригдаад дуусдаг. Энэ бүтцийг батлахдаа зарим шинээр байгуулагдах яамдууд, дэд сайд нар, агентлагийн орлогч дарга нарын орон тоог нь цомхотгож хямралаа давах хэрэгтэй.

УИХ-ын гишүүн С.Амарсайхан: Ерөнхий сайд өөрийнхөө бүрэн эрхийн хүрээнд бүтцээ танилцуулсан. Эдийн засаг, цар тахал гээд олон хүндрэлтэй асуудлыг даван туулахад ямар салбарыг хэнд хариуцуулж, ямар асуудлаа аль яаманд харъяалуулах вэ гэдгийг маш сайн тооцож, бүтцээ оруулж ирсэн байх ёстой.

СОЁЛЫН ЯАМНААС ИЛҮҮ ЭДИЙН ЗАСГИЙН ХҮНДРЭЛ, ХӨГЖЛИЙН БОДЛОГЫН АСУУДАЛ ХАМГИЙН ЧУХАЛ

УИХ-ын гишүүн Ш.Адьшаа: Энэ бол Ерөнхий сайдын бүрэн эрхийн асуудал. Өмнөх УИХ, Засийн газрын үйл ажиллагаа, хуулиуд залгамж чанартай байна гэж хэлсэн. Хоёр сарын өмнө Монгол Улсын хөгжлийн бодлого төлөвлөлт түүний удирдлагын тухай хуулийг УИХ-аар баталсан. Гэтэл хоёр сарын дараа үүнийхээ эсрэг зүйлийг оруулж ирлээ. Өнөөдөр Соёлын яамнаас илүү эдийн засгийн хүндрэл, хөгжлийн бодлогын асуудал энэ цаг үед хамгийн чухал. Монгол Улсын Ерөнхийлөгчөөс ирүүлсэн саналд тусгагдсан дэд бүтэцтэй холбоотой уул уурхай, эрчим хүчний яамаа нэгтгээд явах боломжит хувилбар байсан байх гэж бодож байна. Цаашид яам, тамгын газар, агентлагуудын ажлын уялдаа холбоон дээр маш сайн анхаарч ажиллах хэрэгтэй.

ӨНГӨРСӨН ХУГАЦААНД САЙД ХИЙСЭН ХҮМҮҮС АРД ТҮМНИЙ ЭСРЭГ ТОДОРХОЙ ГЭМТ ХЭРЭГ ҮЙЛДСЭН

УИХ-ын гишүүн Б.Пүрэвдорж: Өнгөрсөн хугацаанд сайд хийсэн хүмүүс ард түмний эсрэг тодорхой гэмт хэрэг үйлдсэн. Сайд нараар нь ярья. Батлан хамгаалахын сайд аа, хэд хэдэн цэрэг нас барсан. Гадаад харилцааны сайд жолоочоороо хар тамхи тээвэрлүүлж, Монгол Улсыг Европын холбооны хар жагсаалтад оруулсан. Сангийн сайд төсвийн үрэлгэн байдалтай эвлэрсэн. Хууль зүйн сайд хуулиар хулгай хийх явдал хэтэрсэн. Хөөн хэлэлцэх хугацаагаар 1500 гэмт хэрэгтэн бидний дунд ял зэмгүй явж байна. Үүнийгээ зассан гэсэн боловч шүүхээр ял авсан нэг ширхэг ч хүн байхгүй. Зөрчлийн тухай хуулиар 1,4 сая Монгол иргэн 500 тэрбум төгрөгөөр торгуулсан. Ийм хатуу хуулиар ард түмнээ гэсгээдэг Хууль зүйн сайдтай байсан. Зам тээврийн сайд нь замаа засах биш хуулдаг. Хуурамч бензины асуудалтай сайд нь тэмцдэггүй. Хөдөө аж ахуйн сайд нь ХАА, малчдын эсрэг ажилласан.