Авлига, албан тушаалын гэмт хэрэг Монгол Улсад гаарсаар. Нийгэмд шударга ёсыг алагдуулж, улс орны тусгаар тогтнолд заналхийлж байна. Ард түмнийг туйлдуулж, тэдний амьдралын үндсийг доройтуулж байгаа энэ ялзрал авлигачдыг ял завшуулдаг, ялаас чөлөөлдөг сул ялын бодлогыг бий болголоо. Энгийн нэг жишээ татъя. Энгийн гэхээсээ илүү ял завшсан хамгийн том кэйсийн талаар юм л даа. ХХААХҮ-ийн сайд асан Б.Батзориг эрх мэдэл албан тушаалаа урвуулан ашиглаж, бусдад давуу эрх олгосон нь тогтоогдсон. Тэр ч атугай буруутгагдсан хэдий ч ердөө 40 сая төгрөгийн торгууль төлөөд шүдээ чигчлээд, гэдсээ илээд хэвтэж байна.

Тэрээр сайдын эрх мэдлээ урвуулан ашиглаж өөртөө 3.6 тэрбум төгрөгийн зээл авч бусад намын нөхөддөө 8.6 тэрбум төгрөгийн зээл олгож, жижиг дунд бизнес эрхлэгчдийн боломжийг хулгайлж, тэр хэрээрээ иргэдийн амьдралыг доройтуулж, улс орны тусгаар тогтнолд заналхийлсан. Учруулсан хохирлынхоо хэрээр ял оноодог шударга тогтолцоо Монголд бий бол энэ хүн лав нар үзэхгүй. Гэтэл авлига албан тушаалын хэрэг үйлдсэн этгээдэд Монголын хууль торгох санкцыг санал болгож байгаа нь байж боломгүй балмад, ард иргэдээ доромжилсон зохицуулалт. "ЖДҮ"-чдийг бид уучлах ёсгүй. Торгуулаад л бүхнийг цайруулах гэж байгаа бол уучлаарай. Нийслэлийн прокурорыг "найрсан" нь тэндээ байдаг юм байгаа биз. Ард иргэд "найраагүй" шүү, Б.Батзориг оо. Та бол ЖДҮХС-г цөлмөсөн хэргийн гол буруутан. Монгол Улсад их хэмжээний хохирол учруулсан гэмт хэргийг зохион байгуулагч. Ийм л эрүүгийн элемэнт. Монголын шүүх Б.Батзориг гэх хүнтэй ял тохиролцсон нь үндсэн чиг үүргээ хэрэгжүүлж чадахгүй байгаагийн тод илрэл боллоо. Дэлхийн улс орнуудын ихэнх нь ял тохиролцох санкцыг хориглосон. Гэтэл 2017 оны Эрүүгийн хуулийн өөрчлөлтөөр энэ заалтыг оруулж ирсэн нь хэний эрх ашгийг хамгаалахын төлөө вэ.

2017 оны Эрүүгийн хуулийн өөрчлөлт https://www.legalinfo.mn/law/details/11634?lawid=11634