Д.ГАНГАНТӨГС: МАНАЙ ХУРГАНЫ НООСОН ОЙМС, ТААВЧИГИЙГ ӨМССӨН ХҮН ӨӨР ЗҮЙЛ ХӨЛДӨӨ УГЛАЖ ЧАДАХАА БАЙЛАА ЯРЬДАГ.

Өмнөговь аймгийн Ханхонгор сумын харъяат Д.Гангантөгс хэмээх энэ залуу гэр бүлийн хамт 1992 оноос монгол гэрийн эсгий үйлдвэрлэж эхэлжээ. Өмнөговийнхон Ханхонгорын цагаан эсгийн гэхээр бүгд мэддэг. Харин өнгөрсөн жилээс “ХУРГА” нэртэй брэнд гаргаж эхэлжээ. Хурганы ноосыг богино гээд үйлдвэрүүд авдаггүй учраас малчид хурганы ноосоо хаях болдог. Харин үүнийг гар аргаар боловсруулж, оймс, таавчиг хийснээр хөнгөн, бат бөх, нягт сайтай бүтээгдэхүүн хийдэг болжээ.

“ХУРГА” БРЭНДИЙГ ҮҮСГЭН САНААЧЛАГЧ Д.ГАНГАНТӨГС: Хурганы ноосоор хийсэн оймс, улавч, таавчигийг том тэрэгний жолооч нар, уурхайн ажилчид маш их хэрэглэдэг болсон. Танай оймсноос өөр оймс өмсөж чадахаа байсан шүү гэж ярьдаг. Энэ санаа надад яаж төрсөн гэхээр би эхнэрийнхээ хамт Өмнөговь аймгийн бизнесийг дэмждэг “БИГ” төв дээр сургалтанд суусан юм. Тэнд уламжлалт бүтээгдэхүүн дээрээ суурилж хэрхэн шинэ брэнд гаргаж болох тухай доктор Э.Ганбат багшийн хичээлд суугаад “ХУРГА” брэндээ гаргахаар шийдсэн. Манай аймаг Германы Олон улсын хамтын ажиллагааны нийгэмлэг, Оюу толгой компани, Говийн оюу хөгжлийг дэмжих сан хамтраад “Жижиг дунд үйлдвэрлэл эрхлэгчдийг чадавхжуулах” хөтөлбөрийг хэрэгжүүлж байгаа юм билээ. Энэ хөтөлбөрийн үр шимийг над шиг хүмүүс хүртэж үр дүнд хүрч байгаад манай гэр бүл их баярлаж байгаа.

“УДМЫН ӨРГӨӨ” ХХК-ИЙН МЕНЕЖЕР Б.СУГИР: Хурганы ноос хүний биед маш их илчтэй, эрүүл мэндэд тустай гэдгийг олон жил хэрэглэсэн хэрэглэгч нар байнга хэлдэг. Оймс, таавчиг, олбог, малгай гээд хурганы ноосон бүтээгдэхүүнийг маань аймаг орон нутгаас гадна Улаанбаатар хот, Европын зарим орноос захиалж байна. Одоо Герман, Унгар улсаас захиалга аваад бүтээгдэхүүнээ хийж байна. Үүндээ маш их урамшиж байгаа. Үйлдвэрлэл явуулахад технологийн сургалт, зөвлөх үйлчилгээ авсан нь маш их дэмжлэг болж бид бизнес, үйлдвэрлэлээ өргөжүүлсэн. Хурганы ноосоор хийсэн бүтээгдэхүүн эдлэх тусам биед эвтэйхэн болдог.

Хүн бүр байгалийн гаралтай, органик зүйлсийг хэрэглэх хүсэлтэй болсон энэ үед “ХУРГА” брэнд нь тэр шаардлагад нийцнэ гэж энэ “Удмын өргөө” компанийнхан хэллээ. Хурганы ноосыг боловсруулах явцад химийн бодисны ямар ч орц найрлага байхгүй. Цэвэр усаар л шавшиж дагтаршуулдаг байна. Эцэг өвгөдөөс өвлөж ирсэн амьдралын уламжлалт арга ухаан, эрдэм мэдлэг, өв соёлыг тээж, үр хойчдоо уламжуулан үлдээх нь тэдний нэг гол зорилго. Мөн “ХУРГА” брэндээ Өмнөговийн төдийгүй гадны зах зээлд гаргах Монголын том брэнд болгохын төлөө зүтгэнэ гэж ярьж байна.