Шударга ёсны төлөө, МАНАН бүлэглэлтэй тэмцэж байна гэсэн имиж бүрдүүлж Ерөнхий сайд У.Хүрэлсүх ард түмний дунд нэр хүндээ өсгөж, Монголын номер нэг рейтингтэй улс төрч болсон. Дараа нь дэлхий нийтэд тархсан Корона вирусыг Монголдоо нэвтрүүлээгүй хааж чадсан гэсэн амжилтаар сонгуульд орж, үнэмлэхүй ялалт байгуулсан билээ. Хууль хяналтын байгууллагад тогтсон хонгилыг нураана, авлигач шүүгч, прокурорыг устгана, шударга ёс тогтоох байх гэсэн горьдлого Ард түмний дунд буй хамгийн том хүлээлт. Мэдээж улс орноо зөв удирдаж, эдийн засгаа сайжруулж, иргэдийн амьдралд нэмэр болно гэсэн хүлээлт дараа нь бий. У.Хүрэлсүхийг Ерөнхий сайд болохоос эхлээд хамт яваа хүн бол Сангийн сайд Ч.Хүрэлбаатар. Хүрэлсүх Миеэгийн бүлэглэл, Ж.Эрдэнэбатыг 33-ын бүлгээр сүхдэж унагаад Ерөнхий сайд болохдоо л эдийн засаг санхүү, мөнгөний бодлогоо Хүрэлбаатарт даалгаснаар хоёр Хүрэлийн хоршил эхлэсэн. Цэргийн сургууль төгссөн, шадар сайд гэхчлэн голдуу цэргийн чиглэлийн сайд хийж ирсэн Хүрэлсүхийн эдийн засгийн харах нүд, сонсох чих, бодох уураг тархи нь Хүрэлбаатар гэсэн үг. Улс төрд онь холбон тоглосон нөхрөөсөө ч зөрөн байж Ч.Хүрэлбаатарыг Сангийн сайдаар тавьсан. Бүр өөрийгөө ч сөрсөн гэхэд болно. Нэхэн сануулахад, 2017 оны арваннэгдүгээр сарын 2-нд У.Хүрэлсүхийн Засгийн газрын бүрэлдэхүүнийг УИХ-аар хэлэлцэж байхад Ж.Мөнхбат гишүүн “...Энэ засгийн газрын хамгийн эмзэг цэг нь Сангийн сайд Ч.Хүрэлбаатар боллоо. Ерөнхий сайд та уул уурхайн лицензтэй хүн танхимдаа авахгүй гэсэн мөртлөө яагаад ийм хүнийг зүтгүүлээд байгаа юм бэ” гэж хэлж байв. Мөн Ерөнхийлөгч Хүрэлбаатарыг Сангийн сайдаар томилж болохгүй хэмээн хориг тавьсан ч дийлээгүйг бодоход Сүхэд Баатар их л чухал сайд байсан бололтой. Ковидоос болоод бүтэн жил орчим хугацаанд Монгол Улс хилээ хааж, төсөв бүрдүүлэгч хувийн хэвшлийнхэн, аж ахуйн нэгжүүд хагас дутуу ажилласан болж ирлээ. Шадар сайд Я.Содбаатар, Эрүүл мэндийн сайд Т.Мөнхсайхан нарын өнгөн дээр Корона вирусыг Монголдоо алдснаар байдал бүр ч хэцүүдлээ. Энэ үед л өнөө гал сөрөн байж авсан Баатарын эдийн засгийн бодлого Сүхэд хэрэг болох учиртай. Гэвч их санасан газар есөн шөнө хоосон гэгч болж байна. Өрийг өрөөр дарж шоудаж ирсэн Ч.Хүрэлбаатар сайдыг төсөвтөө илүү үрэлгэн зардлууд, элдэв хөшөө, байшин барилга, тансаг хэрэглэлд зарах мөнгөө танаж, ард иргэд аж ахуйн нэгжүүдээ дэмжсэн бодлого явуулах болов уу гэсэн хүлээлт байсан ч өмнөх шигээ л зардал нь данхайсан, үрэлгэн төсөв оруулж ирж батлуулсан. УИХ дахь сөрөг хүчин, гишүүн Т.Доржханд нарын зөв үгийг чихнийхээ хажуугаар өнгөрөөн байж батласан төсөв нь хэрэгжиж эхлээд хэдхэн хонож байхад тодотгох асуудлыг зарим гишүүд, эдийн засагчид яриад эхэллээ. Ямар төсөв батласан бэ гэдгийн ганцхан жишээ энэ. Өөрөө тэр талын мэдлэг муу болохоор бүхнийг Баатартаа найдаад даатгаж орхисон Сүх ч үгээр нь явсаар өнөөдрийг хүрэв. Үр дүнд нь төсөв нь сох дутаж, сая оны төгсгөлд Эрдэнэт, Эрдэнэс-Таван толгой хоёроос тус бүр 300 тэрбум төгрөг татвартаа урьдчилан зээлж авч байж төсвийн цоорхойгоо нөхсөн сураг сошиалд харагдсан. Карантинаас болж үйл ажиллагаа нь зогссон ААН-үүд эхнээсээ үүд хаалгаа барьж, гэртээ хоригдсон иргэд цалингүй, орлогогүй, Коронагаар биш өсгөлөнгөөр үхэхдээ тулж ирлээ. MCS-ийн барьсан тансаг хотхонд амьдардаг, амралтын өдрүүдээр агаар салхинд зуслангийн хаусандаа архи уун алжаалаа тайлчихдаг, гадаадад, “Ганнамд Хаустай” эрхмүүд ард түмний амьдралыг яаж ч ойлгохов дээ. Тэднийг ойлгоно гэж итгэж сонгосон ард түмэн л хөөрхий. Энэ янзаараа явбал У.Хүрэлсүхийн нэр хүнд байнга унасаар Ерөнхийлөгчийн сонгуультай золгох нь. Өрсөлдөөд ялагдах, эсвэл ялагдахаас айн хулчийж, өөр хэн нэгнийг дэвшүүлэх сонголт Сүхэд үлдэж байна. Харин Баатар бүхний ард нэр цэвэр үлдэж, Сүхийг өөрөөр нь сүхдүүлчихээд, дараагийн Ерөнхий сайд, намын даргын суудалд суух боломжийг бүрдүүлсээр. Увс хүний тэвчээртэй, дотуур зан гэж энэ л дээ! Өдрөөс өдөрт унаж буй нэр хүндээ аврахын тулд У.Хүрэлсүх сайд танхим дотроосоо ганц нэг сайд явуулах хэрэгтэй болж байх шиг. Соёлын сайд С.Чулуун, Эрүүл мэндийн сайд Т.Мөнхсайхан нарын нэр цавчуулах сайд нарын тэргүүн эгнээнд дуулдаж эхэллээ. Байгаа оноогүй цавчилт гэж энийг хэлнэ. Эрүүл мэндийн сайд Т.Мөнхсайхан мэргэжлийн залуу хүн, цар тахлын энэ үед боломжийн ажиллаж байна гэж иргэд үзэж байгаа нь сошиал дээрх комментоос харагдаж буй бол Соёлын сайд С.Чулуун сая Хүүхдийн төлөө фонд байгуулах ажил санаачилж, хэдэн тэрбумын хандив цуглуулж чадсан. Тэд өмнөө тавигдсан үүрэгт ажлаа сайн хийж байна. Ард түмний амьдрал доройтож, ААН-үүд хаалгаа барьж буй нь Соёлын сайдтай, Эрүүл мэдийн сайдтай ямар ч хамаагүй. Энд зөв бодлого гаргаж, улс орон, ард иргэдийн санхүү, эдийн засгийн хамгаалж үлдэх үүрэгтэй хүн нь Сангийн сайд Ч.Хүрэлбаатар. Хоёр Хүрэлийн хоршил хэзээ нэгэн цагт салж л таарна. Тэр цаг нь иржээ. “Баатар”-ыг сүхдэх цаг ирсэн бололтой. Сэлэмээ сугал Ерөнхий сайд аа! Ажлаа мэддэггүй, хэдэн жил өөрийн чинь тархийг угааж, буруу мэдээллээр ханган, буруу бодлого явуулж ирсэн Сангийн сайдаасаа салж, эдийн засгийн бодлого явуулах хэмжээний хүн томил. Ингэж байж МАН 100 жилийнхээ ойгоор явагдах сонгуульд амжилт үзүүлэх боломж бүрдэнэ.