Корона вирус Хятадад бүртгэгдэж бусад орнуудад зөөвөрлөгдөн халдварлагдаж эхлэхэд дэлхийн улсууд цар тахлыг өөр өөрийнхөөрөө хүлээж авсан.

Ихэнх орнууд хилээ, бүс нутгаа нээлттэй хэвээр үлдээж хэсэгчилсэн хөл хорио тогтоох замаар цар тахалтай тэмцсээр бараг хоёр жилийг үдэж байна. Корона гэх ханиаднаас илүүтэйгээр иргэдийнх нь орлого, идэх хоол, өмсөх хувцас цаашлаад улс орны эдийн засаг нэгдүгээрт байх ёстойг тэд мэдэж байж.

Бүх сувгаа бөглөж, улсаа дангинатал түгжих нь гарц, шийдэл биш гэдгийг харсан байна. Харин дэлхий дээр ганцхан Монгол Улс бүх онгорхой цоорхойгоо битүүлж, хаалга үүдээ дангинатал түгжсэн. Монгол оронд юу болов. Корона ирсэн. Бүр дотоод урсгалаа нам хориод улам гаарсан. Үр дүнд нь эдийн засаг нь эмнэлэгт хэвтэж корона гадуур сэлгүүцсэн хэвээрээ. Улс орон дотор хүн гээч бие махбодь байгаад тэр нь нийгмийн харилцаанд орж л байвал ковид тарсаар байх нь ойлгомжтой болчихлоо. Эцсийн найдвар вакцин.

Үнэхээр үр дүнтэй л бол вакцин Коронаг нам дарна. Түүнээс ямар ч дарга, ямар ч сүржин мэдэгдэл, хэдэн жилийн хөл хорио ч коронаг зогсоож чадахгүй нь. Ямар үйлийн үрээр Ковидийн үед улс төрийн попууд Онцгой комиссыг удирдаж, бие бүрэлдэхүүнд нь орж ажиллаад байгаа юм, асуудалд шинжлэх ухаанчаар, эрүүлээр хандаад улс орноо аврах баатар алга уу. Энэ цаг үед Монгол Улсад үндэсний хэмжээний баатар төрөх болоогүй юу гэж асуумаар байна. Уг нь баатар төрөх сэнтий бол Улсын онцгой комиссын даргын суудал. Гэвч Шадар сайд С.Амарсайханыг баатар болохыг хүлээнэ гэдэг нөгөө “бухын доодохыг харж үнэг турж үхэв”-ийн үлгэр болох биз.

С.Амарсайханы юунд дургүйцээд байна вэ гэвэл хамгийн сүүлийн ажил нь. Эдийн засгийн эргэлт түргэсч унасан бол босоод ирэх хэмжээнд ёстой нэг буцалж өгдөг цагаан сараар иргэдээ 12 хоног тарчлаан байж хумьсан голомтын жолоог эмэгтэйчүүдийн баяраар буцаагаад алдчихлаа. Бид л энэ их хөл хорио, сүржин байдалд нь дөжирчихөөд тоохгүй байгаа болохоос Ковид ёстой нэг асгарч байна. 2.23-3.8 гэдэг 15 хоногийн хугацаа. Энэ хугацаанд нийслэл Улаанбаатарынхаа иргэдийг вакцинжуулахгүй юугаа хийж байсан юм.

Энэ бол Шадар сайд Сайнбуянгийн Амарсайханы хариуцлагагүй, мэдлэг дутмаг, сэтгэл нимгэнээс бий болсон алдаа. Огцорсон ч багадах асуудал. Алдааг нь сануулж, асуудлыг нь хөндөхөөр манай улстөрчид хөлсний троллуудаараа “Ажил хийх боломжийг нь олго” гэсэн дэмий юм бичүүлээд байдаг. Ёстой үгүй.

Нэг муу зохион байгуулалтын ажлыг хөнгөхөн хийчихэж дөнгөхгүй юм бол дараа дараагийн бүр хүнд ажлуудыг яаж давж гарах юм. Алдаа дутагдалтай нь албан тушаалаас нь чөлөөлдөг болсон хойно л Монголд ажил хийдэг хүмүүс бий болно. Түүнээс зах дээр, зам дээр камер дагуулчихсан попорч гүйгээд ажил урагшилдаг гэж байхгүй.

С.Амарсайхан гудамжаар явж яах гээд байгаа юм. Ширээнийхээ ард бал цаасаа авч суугаад ажлаа төлөвлө, шилдэг гарц шийдлийг ол. Нэг их иргэдээ энэрч, албан тушаалтнуудаа загнасан дүр исгэсэн камерийн өмнөх жүжигээ одоо зогсоо. Наад тоглоод байгаа ууртай шувууны дүрийг У.Хүрэлсүх дарга чинь ёстой надель болтол эдлээд хаячихсан юм. Хүмүүс ч мэддэг болчихсон. Вакцинаа хурдал. Онцгой комисс улстөрждөггүй, онцгой үед попордоггүй юм.