Сонгуулийн тухай хуулиараа элдэв золголт цугларалт хурал уулзалт бэлэг, одон медаль тараах нь сонгуулийн сурталчилгаа албан ёсоор эхлэхээс өмнө хориотой байгаа. Гэтэл эрх баригч голдуу цагаан сарын баярыг тохиолдуулан энд тэндгүй бэлэг сэлт тарааж, уулзалт золголт хийжээ. Ерөнхийлөгчийн зөвлөх гэх зарим хүмүүс нэр дэвшихээр горилж буйгаа нуулгүй ч хуулийн заалтуудыг харин ч тоодоггүй бололтой. Мөн эрх баригч намын элдэв статустай хүмүүс ч ялгаагүй аймаг сум дүүргүүдэд бэлэг сэлт мэндчилгээ тараасаар. Тэгш бусаар үйлчилдэг, түүнээ дагаж мөрдөх хүн ч олдохгүй бол хууль батлах шаардлага алга.

Томсгосон тойргийн зохион байгуулалт, олон тооны гишүүд сонгогдох энэ удаагийн УИХ-ын сонгууль өмнөхөөс өөр болох нь дамжиггүй гэвч мөнгө эрх мэдэлтнүүдийн хувьд илүү давуу тал болчих ч магадлал бий. Мөрийн хөтөлбөрт бодлого зорилт гэхээсээ илүү танил тал хамаатан саданг, эд зүйл тарааж, мөнгө төгрөг ихээр хандивласанд нь давуу тал бий болдог.

Өнгөрсөн сонгуулиудад нэг нэр дэвшигчээс 5 тэрбум төгрөг дор хаяж сонгуулийн зардалд зарцуулагддаг гэсэн тооцоо гарсан. Эдийн засгийн хямрал арилгаж амжаагүй ийм цаг үед төсвийн хулгайгаар баяжигсад л тийм их хэмжээний мөнгө гаргах чадвартай. Эрх баригчид шударга нэрийн дор өөрсдөдөө ашигтай тогтолцоо бий болгосон.

Д.ЭНХБАТ