Монголын шатрын холбоо болон Азийн шатрын холбоо хамтран тивийн 3.3 бүсийн аварга шалгаруулах тэмцээнийг Улаанбаатарт дөрөвдүгээр сарын 22-оос тавдугаар сарын 2-ны өдрүүдэд зохион байгуулахаар болжээ. Уг тэмцээнд эмэгтэй 1800, эрэгтэй 2000-аас дээш чансаатай шатарчид оролцох ба урьдчилсан мэдүүлэгт Вьетнам, Сингапур, Филиппин зэрэг орны шатарчид оролцохоор бүртгүүлсэн байна. Тэдний дунд Сингапураас 2600 чансаатай супер их мастер Тинг Жинг Яо ирэхээр мэдүүлэгээ өгсөн нь анхаарал татаж байна. Манай улсаас зохион байгуулагчийн давуу эрхийн дагуу олон шатарчин оролцох боломжтой. Ингэхдээ ирэх долоо хоногт сонгон шалгаруулалтын тэмцээнийг нээлтэй хэлбэрээр зохион байгуулж, эхний 20-д багтсан шатарчдад эрх олгох юм байна.

Ази тивийн 3.3 бүсэд харьяалагдах орнуудын шилдэг шатарчид өрсөлдөх уг тэмцээнд Монголын шатарчид оюун ухаанаа сорихоос гадна олон улсын чансаагаа нэмэгдүүлэх, цолны баллын болзол биелүүлэх, мөн цаашлаад Дэлхийн цомд оролцох эрхийг эх орондоо авах гэх мэт олон давуу талтай ажээ. Тэмцээний бүртгэл энэ долоо хаагдсаны дараа оролцох шатарчид бүрэн тодрох юм байна.