Булган аймгийн ИТХ хоёр өдөр хуралдаж ирэх дөрвөн жилд Булган аймагт хэрэгжүүлэх Засаг дарга Д.Пүрэв-Очирын дэвшүүлсэн "Булганы сэргэлт хөтөлбөр"-ийг хэлэлцлээ. "Булганы сэргэлт хөтөлбөр" нь Амьд хөгжим, Амар тайван Булган, Эрүүл Булган, Англи хэлтэй Булган, Шинэ хөдөөгийн сэргэлт гэсэн таван дэд бүлгээс бүрдсэн байна. Ийнхүү асуудлыг хэлэлцэхэд Булган аймгийн ИТХ-ын гишүүдийн дийлэнх олонхи нь хөтөлбөрийг буруушааж, Засаг даргыг дөрвөн жилд хэрэгжүүлэх ажлын хөтөлбөрөө боловсруулахдаа хайнга хандсан, байгаа оноогүй, ард иргэдийн амьдралд нийцгүй асуудал дэвшүүлснийг хэлж, шүүмжилж хөтөлбөр батлагдсангүй.

Хөтөлбөр батлагдахгүй байх үндсэн шалтгаан нь Булган аймгийн ИТХ дахь МАН-ын гишүүд буюу бүлгийн дарга З.Батзориг, Д.Мэндсайхан, Т.Баярбат, П.Нэргүй, Э.Мөнх-Очир нар хуралдаандаа ирээгүйгээс болсон бөгөөд Засаг дарга Д.Пүрэв-Очирынхоо дэвшүүлсэн дөрвөн жилийн ажлын төлөвлөгөө, хөтөлбөрийг эс үйлдлээрээ эсэргүүцэв үү гэсэн асуултыг дагуулж байгаа юм. Д.Пүрэв-Очирын хувьд 21 аймгаас үйл ажиллагааны хөтөлбөрөө батлуулж чадаагүй анхны Засаг дарга боллоо. Ийнхүү саяхан огцруулах сануулгыг аваад байсан Засаг дарга Д.Пүрэв-Очир хэрэгжүүлэх хөтөлбөргүй, үйл ажиллагааны мухардалд ороод байгаа ажээ.