Нийслэл хотод их багтаамжийн нийтийн тээврийн хэрэгсэл метро барих төслийн барилга угсралтын гүйцэтгэгчийг сонгон шалгаруулах I шатны тендерийг энэ сарын 28-нд нээв.

Уг тендерт долоон улсын 27 аж ахуйн нэгж материалаа ирүүлжээ. Тодруулбал, Монгол, Солонгос, Англи, ОХУ, Франц, Энэтхэг, Хятад улсын компаниуд материалаа ирүүлсэн байна. Хуулийн дагуу дараагийн шатны тендерийг тавдугаар сарын 5-нд зарлана. Их багтаамжийн нийтийн тээврийн хэрэгсэл болох метро нь Толгойтоос Амгалан хүртэл үргэлжлэх аж.

Улаанбаатар метроны шугамын урт нь 19.4 км байх бөгөөд 15 ширхэг өртөөнөөс бүрдэх юм. Цагт 17.206 хүн тээвэрлэх хүчин чадалтай байхаар төлөвлөж байна. Мөн зогсоол хоорондын зай 1.3 км. Толгойтоос Амгалан хүртэл үргэлжлэх аяллын хугацаа 31 минут 25 секунд байхаас гадна төсөл амжилттай хэрэгжсэнээр замын хөдөлгөөний дундаж хурд 40.4 хувиар нэмэгдэх боломжтой.

Улаанбаатар хот 2025-2028 онд 24 мега төсөл хэрэгжүүлэх ажлын нэг нь “Улаанбаатар метро” төсөл юм.