Үндэсний их баяр наадмыг зохион байгуулах хорооны ээлжит хуралдаан боллоо. Хуралдаанаар Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн Үндэсний их баяр наадмыг зохион байгуулах салбар хороодын бэлтгэл ажлын явцын талаарх мэдээллийг сонслоо.

Энэ үеэр Монгол Улсын Шадар сайд, Үндэсний их баяр наадмыг зохион байгуулах хорооны дарга С.Амарсайхан "Монгол төрийн наадам бол ард түмний оюун санааны дархлаа, үндэстний нэгдмэл байдлыг илтгэх, төрт ёсны их утга учрыг тээсэн монголчуудын итгэл үнэмшил юм. Тиймээс энэ утга агуулга, үнэ цэнийг алдагдуулахгүй, ёс заншил, соёл уламжлалаа нягт хадгалахад онцгойлон анхаарах шаардлагатай.

Үндэсний их баяр наадмыг зохион байгуулахдаа сүүлийн үеийн техник, технологийн дэвшил дрон зэргийг ашиглана. Өөрөөр хэлбэл, олон үндэстэн, ястны түүх уламжлал, өв соёл, төрт ёсны үнэт зүйлээ олон талаас нь харуулахыг зорьж байна" хэмээн онцоллоо.

Үндэсний их баяр наадмын нээлт, хаалтын бэлтгэл ажил болоод Хүй долоон худагт морин уралдааны зам, бусад тохижилтын ажил хэвийн үргэлжилж байгаа гэдгийг холбогдох салбар хороодын дарга нар танилцуулсан. Энэ жил Японы эзэн хаан манай улсад төрийн айлчлал хийхтэй холбогдуулан наадмын нээлт болон Төрийн хүндэтгэлийн тоглолтын утга агуулгад онцгой ач холбогдол өгч, зохион байгуулалт, аюулгүй байдалд өндөржүүлсэн бэлэн байдлыг хангаж ажиллахыг Шадар сайд үүрэг болголоо.

НҮБ-ын Ерөнхий Ассамблейн 79 дүгээр чуулганаар Монгол Улсын Ерөнхийлөгчийн санаачилгаар жил бүрийн 7 дугаар сарын 11-ний өдрийг “Дэлхийн адууны өдөр” болгон тэмдэглэх шийдвэрийг баталсан. Иймд баяр наадмын хөтөлбөрт морьтой үзүүлбэр, адууны хийморь сүлдийг илэрхийлсэн агуулгыг түлхүү тусгахыг холбогдох салбар хорооны удирдлагуудад анхааруулж захилаа. Мөн Үндэсний их баяр наадмын нээлтийн арга хэмжээг 21 аймгийн иргэд төв талбайгаасаа үзэх боломжоор хангах, баярын уур амьсгалыг орон даяар нэгэн зэрэг түгээх бэлтгэлийг хангаж ажиллахыг холбогдох салбар хорооны дарга нарт үүрэг болголоо.

Баяр наадмын нээлтийн тасалбарыг гадаад дотоодын жуулчдад хүртээмжтэй зохион байгуулах зорилгоор наадмын нээлт, хаалтын арга хэмжээний тасалбарыг www.enaadam.mn, нээлтийн арга хэмжээг орой дахин үзүүлэх тасалбарыг www.ticket.mn цахим хаягаар дамжуулан захиалан авах боломж бүрдүүлэн ажиллаж байгааг холбогдох салбар хорооны дарга танилцууллаа.