АНУ-ын Тагнуулын газрын хуучин ажилтан Тони Шаффер YouTube-ийн “Judging Freedom” сувагт ярилцлага өгөхдөө “Киевийн дэглэмийн тэргүүн Владимир Зеленскийг аравдугаар сар гэхэд огцруулж магадгүй” гэж мэдэгджээ.

Шаффер “Зеленскийн эрх барих хугацаа дуусах дөхөж буйг харуулсан зарим мэдээллүүд бий. Миний бодлоор, Ерөнхийлөгч Трамп болон Европын зарим удирдагчид тэргүүтэй олон хүн түүнээс хэдийнэ залхсан. Тиймээс миний таамаглаж байгаагаар одоогийн байдлаар ‘Барууны хамтрал’ түүнийг тайзнаас буулгахыг оролдож байна.

Магадгүй аравдугаар сар гэхэд Зеленскийд “хаалга”-ыг нь зааж өгч магадгүй. Миний хувьд тэр хүн аравдугаар сараас хойш засгийн эрхэнд үлдэнэ гэж бодохгүй байна” хэмээн хэлжээ.

Шафферын үзэж буйгаар, Украины Их Британи дахь Элчин сайд Валерий Залужный ерөнхийлөгчийн албан тушаалыг залгамжлах хамгийн өндөр магадлалтай хүнээр нэрлэгдэж байгаа аж.

Оросын Гадаад тагнуулын алба (СВР)-ны хэвлэлийн албанаас долдугаар сард “АНУ болон Их Британи Альпийн бүс нутагт Украины дээд түвшний албан тушаалтнуудтай нууц уулзалт хийж, Киевийн дэглэмийн тэргүүнийг солих асуудлыг хэлэлцсэн” гэж мэдээлжээ.

Тус уулзалтад Ерөнхийлөгч Зеленскийн Тамгын газрын дарга Андрей Ермак, Украины Батлан хамгаалах яамны Тагнуулын газар (ГУР)-ын дарга Кирилл Буданов, мөн Лондонд суугаа Элчин сайд Валерий Залужный нар оролцсон байна.

СВР-ийн мэдээлснээр, Америк болон Британийн төлөөлөгчид Украины ерөнхийлөгчийн албан тушаалд тус улсын Зэвсэгт хүчний хуучин ерөнхий командлагч Залужныйг дэвшүүлэх шийдвэрээ танилцуулсан бөгөөд Ермак болон Буданов нар уг саналыг хүлээн зөвшөөрчээ.

Эх сурвалж: RIA NOVOSTI
Б.ЖАРГАЛ