Өнөөдөр 23:00 цагт Ардчилсан намаас Ерөнхийлөгчийн өргөн барьсан хуультай холбоотойгоор цаг үеийн асуудлаар мэдээлэл хийлээ. Хэвлэлийн хуралд Ардчилсан намын дарга С.Эрдэнэ, УИХ-ын гишүүн асан Х.Тэмүүжин, УИХ-ын гишүүн Б.Пүрэвдорж болон тус намын гишүүд оролцов. Тус намаас Монгол Улсын Ерөнхийлөгчөөс өргөн мэдүүлж, УИХ-аар хэлэлцүүлэхийг дэмжсэн Шүүгчийн эрх зүйн байдлын тухай, Авлигын эсрэг хуульд нэмэлт, өөрчлөлт оруулах тухай хууль болон Прокурорын тухай хуульд нэмэлт өөрчлөлт оруулах хуулийн төслүүдийг дэмжихгүй байгаагаа илэрхийлсэн юм.

Ардчилсан намын дарга С.Эрдэнэ:

-Өнөөдөр Үндсэн хуулийн бус аргаар Монгол төрийн эрх мэдлийг булаан авсан үйлдэл зохион байгууллаа. Үүнийг Ерөнхий сайд, ХЗДХ-ийн сайд нь хүртэл хүлээн зөвшөөрсөн. АН энэ үйл явдалтай эвлэрэхгүй гэдгээ мэдэгдэж орхиж гарч ирсэн. Өнөөдрийг хүртэл МАН-ын явуулж ирсэн хууль бус үйлдлийг хангалттай тэвчиж, ажлыг нь тайван хийлгэж ирсэн. Өнөөдрийн үйл явдал төрийн эрх мэдлийг хоёр дахь удаагаа авах гэсэн оролдлого боллоо гэж харж байна. Бид цаашид ардчиллын үнэт зүйлийг хадгалж үлдэх тэмцэлд нэгдэнэ. Тиймээс тэмцлийн олон хэлбэрт шилжинэ. Монгол Улсын Ерөнхийлөгч Ардчилсан намаас сонгогдсон хэрнээ эрх баригчидтай нэгдэн Үндсэн хуульд халдаж байгаад харамсч байна.

Бид парламент хуулийн, хувь хүний эрх, үнэт зүйл үзэл бодлогыг эрхэмлэсэн нам байна гэж амласан. АН дөрөвдүгээр сарын 04-нд онц их хурлаа зарлахаа мэдэгдэж байна. Бид ардчилсан үндсэн хуулиа хамгаалж, тэмцэхэд бэлэн байна.

УИХ-ын гишүүн Б.Пүрэвдорж:

-МАН 60 тэрбумын схемийг зохиож өнөөдрийн их хурлыг байгуулсан. Төлбөрөө төлж энэ схемийн дагуу гарч ирсэн их хурлын гишүүд нь юу ч хийсэн, яаж ч идсэн болно гэж боддогийн нэг жишээ бол ЖДҮХС-ийн зээлийн асуудал. Өнөөдөр тэр хүмүүс Шүүгчийн эрх зүйн байдлын тухай, Авлигын эсрэг хуульд нэмэлт өөрчлөлт оруулах тухай хууль болон Прокурорын тухай хуульд нэмэлт өөрчлөлт оруулахыг дэмжээд кноп дарж байна. ЖДҮ-чдээ яаж аргалах гэж байгаа юм бол гэж гайхаад байсан чинь өнөөдрийн энэ хууль батлагдсанаар яаж шийдэх гэж байгаа нь тодорхой харагдлаа.

УИХ-ын гишүүн асан Х.Тэмүүжин:

-Үндсэн хуулийн хамгийн амин сүнс нь Иргэний үндсэн эрх, эрх мэдэл хуваарилах зарчим байдаг. Хуульч, судлаачдын дургүйцлийг хүргэж байгаа нэг зүйл нь үзэл эрх мэдлийг хуваарилах зарчмыг Монгол Улсын үндсэн хуулиас бодит байдлаар алга болгох санаачлага гаргасан үйл явдал байлаа.

Ерөнхийлөгчийн дэргэдэх ҮАБЗ нь Засгийн газартай өрсөлддөг. Засгийн газар УИХ-тай өрсөлддөг, УИХ шүүхтэй өрсөлддөг шүүх болж хувирах гэж байна. Үе үеийн ерөнхийлөгчид ҮАБЗ гэдэг байгууллагаараа дамжуулан хаан болох замаа засдаг байсан. Тэр замд садаа болдог нэг хүч нь УИХ байдаг. Үе үеийн гишүүд замд тээг болж зогсдог байсан бол өнөөдөр дэмжчихлээ. Өнөөдөр Занданшатар гэдэг хүн Үндсэн хуулийн хулгайлах боломжийг олгочихлоо. Энэ бол хамгийн том эмгэнэл.

Өнөөдөр матрын нулимс унагаж гэнэт ухаан орсон юм шиг ярьж байна. Дөрвөн жилийн өмнөөс эрүүдэн шүүдэг, хууль бусаар гүйцэтгэх ажиллагаа явуулдаг, айлган сүрдүүлэг, хэрэг зохиодог ажиллагаануудыг таслан зогсоох хуулийн санаачлага гаргаж байсныг эсэргүүцэж байсан. Францаас хүн хулгайлж авч ирээд эрүүдэн шүүгээд алж байсан хүмүүс Монголын нийгэм өнөөдөр ямар аймаар юм бэ, хүнийг эрүүдэн шүүсэн байна гээд хашгираад сууж байна.

Ардчилсан залуучуудын холбооны тэргүүн С.Эрдэнэболд:

Өнөөдөр Монгол Улсад төржилт, ядуурал газар авсан. Хүмүүсийнхээ амьдралыг яаж өөдөн татах вэ гэхээс илүү яаж олон ангит улс төрийн жүжиг зохион байгуулах вэ гэж бодож байна. Хуульчдын нэр хүндийг нийгэмд унагаах компанит ажил явуулж байна. Хуулийн байгууллагад ажилладаг хүмүүсийн нэр хүндийг унагааж, үндсэн хуулийг булаах гэж байна.

Өнөөдөр ардчилсан намыг 49 хувийг хаацайлж байна гэж үлгэр домог шиг зүйл зохиож нийгэмд тараасан. Өнөөдөр орой төв талбайд хэлэлцэж байгаа хуулийн төслүүдийг эсэргүүцэж жагсахад бидний сүлжээг хакердаж унагааж байсан. ШХАБ-д элсэх нэрийдлээр их мөнгөний сураг сонсоод улс эх орноо худалдах гэж байна.

ХЗДХ-ийн сайд Ц.Нямдорж хүнийг эрүүдэн шүүсэн асуудлыг гэнэт мэдээд гаргаж ирж байгаа юм биш. Хуулийн салбарт таван удаа сайд хийхдээ яагаад өмнө нь дуугарч ярьж байгаагүй юм бэ.

Тус намаас дөрөвдүгээр сарын 4-ний өдөр намынхаа онц их хурлыг зарлаж байгаа бөгөөд эрх баригчдын эсрэг бүхий л тэмцлийн хэлбэрт шилжиж, эсэргүүцлээ илэрхийлнэ гэдгийг тодотголоо.