“Манайхнаас өөр төв талбайгаа гадныханд алдчихсан орон хаана ч байхгүй” гэж бид нэг хэсэг шуугисан. Тэгвэл одоо "төв талбайгаа банкны барьцаанд тавьсан улс манайхаас өөр хаана ч байхгүй" хэмээн шуугицгаах биз.

Талбайн урд тал буюу машины зогсоол, ногоон байгууламж бүхий 2,5 га газар нь 22,5 тэрбум төгрөгний банкны барьцаанд буй. Эзэмшигч нь “Ю Би констракшн” ХХК болохыг монголчууд мэдээд арваад жилийн нүүрийг үзэж байна.

2006 онд тухайн үеийн Нийслэлийн засаг дарга асан Ц.Батбаяр 52 дугаартай захирамжаар Сүхбаатарын талбайн урд талын хэсгийг газар доорх байгууламж барих, усан оргилуур бүхий цогцолборын зориулалттайгаар төсөл сонгон шалгаруулах замаар эзэмшүүлэх тухай шийдвэр гаргасан байдаг.

Төсөл сонгон шалгаруулалт тухайн ондоо хийгдэж “Ю Би констракшн” ХХК гэх компанид 2006 оноос эхлэн 15 жилийн хугацаатайгаар тухайн газрын эзэмших эрх олгосон байдаг. Ийнхүү тус компанийн захирал Ч.Орхон гэгч Нийслэлийн газрын албатай гэрээ байгуулсан цагаас хойш Сүхбаатарын талбайн урд хэсэг хувийн хэвшилд очиж автомашины төлбөртэй зогсоол болсон түүхтэй. Анх төлбөргүй зогсоол болгоно хэмээн иргэдийг хуурч байв. Автозогсоол баригдахаас өмнө Улаанбаатар банкны эзэмшилд байгаа гэсэн мэдээлэл ч байсан.

БНХАУ-ын “Ю Би Констракшн” ХХК уг газраа банкинд барьцаанд тавиад орхисон байсныг Солонгосын нэр бүхий компани барьцаатай нь хамт худалдаж аваад 2015 онд барилга барина хэмээн маргаан дэгдээж улмаар солонгосчууд “бидний авсан газрыг чөлөөлж өгөхгүй бол Олон улсын шүүхэд хандана” хэмээн маргаан үүсгэсэн асуудал бий. Талбайг Худалдаа хөгжлийн банк, Голомт банкны зээлийн барьцаанд тавьсан тухай мэдээллүүд хангалттай хөвөрсөн.

Энэ бүхний эцэст өчигдөр хотын дарга С.Амарсайхан талбайн урд хэсгийг усан оргилуур бүхий цогцолбор болгох зориулалтаар нь ашиглаагүй тул төв талбайнхаа 2,5 га газрыг улс эргүүлэн авч байгааг мэдэгдэв. Тус мэдэгдэл олон нийтэд таалагдсан төдийгүй анхаарал татсан юм. Улмаар газар эзэмших эрхийг цуцлах захирамжийг өчигдөр гаргаж, газраа чөлөөлж авна гэдгээ ч тэрбээр онцолсон. Харин "банкны барьцаанд байгаа асуудлыг компани өөрөө шийдэх байх" гэв.

Энэ тухай Хотын дарга С.Амарсайхан хэлэхдээ, "2006 онд газар олгосон ч төсөл сонгон шалгаруулалттай холбоотой ямар ч материал байхгүй байна. Өнөөдөр хууль ёсны гэхэд ч хэцүү, хууль бус ч гэхэд хэцүү байдалд байна. Аж ахуйн нэгж ч хохирч, зөвшөөрөл олгосон албан тушаалтан нь алга болдог асуудал их байна. Нийслэлийн хөрөнгөөр ногоон байгууламжтай усан оргилуур барих ажлыг хийнэ" гэсэн юм.

Ямартай ч хотын дарга эрх мэдлийнхээ хүрээнд эзэмшлийг нь цуцлах захирамжаа гаргалаа. Гэхдээ банкны барьцаанд тавьсан асуудлыг хэн хэзээ шийдвэрлэх нь одоо хүртэл ойлгомжгүй, учир битүүлэг хэвээр үлдэж байгаа юм. Захирамжаа гаргасан хотын дарга эцсийн шийдлийг нь барьцаанд тавьсан "Ю би констракшн" компанид үлдээчихэв.

Э.Бат-Үүлийг нийслэлийн засаг дарга байх үед тус компанитай шүүхдэлцэж төв талбайгаа авах гээд чадаагүй, ялагдсан асуудал бий. Одоо ийм асуудал дахин давтагдахгүй гэх баталгаа алга. Хотын дарга нь захирамж гаргасан болдог ч, шүүх хуулийн байгууллагын үүдэнд тулж очиход ар томтой компаниуд арга сүвэгчлээд мултрахгүй гэх баталгаа байхгүйн жишээ энэ.

Энэ удаад ч нийслэлийн засаг дарга С.Амарсайхан барьцаанд тавьсан асуудлыг компани өөрөө шийднэ гээд цэг тавилгүй орхиж байгаа юм. Банкны барьцаан дах 22.5 тэрбум төгрөгийг хэн хэнээр, хэзээ, хэрхэн төлүүлж, барагдуулах вэ. Энэхүү асуулт хариултаа олсон цагт асуудал нэг тийш шийдэгдэх байлтай.

Түүнээс өмнө эзэмших эрхийг цуцалсан гээд мянга орилсон ч, нэмэргүй. Хоосон цуурай лугаа адил. 13 жил ашиглачихаад улсад нэг ч зоосны ашиг өгөөгүй асуудлыг хэн хөндөх нь бас л эргэлзээтэй байгааг сануулъя.

"Ю БИ КОНСТРКШН" ГЭЖ ЯМАР КОМПАНИ БЭ?

"Ю Би констракшн" ХХК–г анх Улсын бүртгэлийн ерөнхий газарт 2005 оны долдугаар сарын 20-ны өдөр “ашгийн төлөө байгууллага” бөгөөд үүсгэн байгуулагч хувьцаа эзэмшигчээр Чанцал овогтой Орхон гэх Монгол Улсын иргэний нэр дээр бүртгүүлж байжээ. Барилгын засал чимэглэлийн үйл ажиллагаа явуулах чиглэлтэйгээр бүртгүүлсэн байдаг аж.