Тулгар төрийн 2229, Их Монгол Улс байгуулагдсаны 813, Ардын хувьсгалын 98 жилийн ойн Үндэсний их баяр наадмын нээлтийн тоглолт сайхан боллоо. Энэ жил наадмын нээлт, хаалтын тоглолтын төсөвт нийт 600 сая төгрөг төсөвлөсөн бөгөөд төсөв нь хаанаа ч хүрээгүй гэдгийг найруулагч Г.Цоггэрэл хэлж байна. Тиймээс Монголын томоохон үйлдвэр “Эрдэнэт” үйлдвэр, “Эрдэнэс Тавантолгой” компани ерөнхий ивээн тэтгэгчээр ажиллажээ.

Энэ жилийн Баяр наадмын нээлт, хаалтын ёслол, Төрийн хүндэтгэлийн тоглолтын Ерөнхий найруулагчаар Үндэсний урлагийн их театрын захирал, Урлагийн гавьяат зүтгэлтэн Г.Цоггэрэл ажилласан билээ. Тэрбээр наадмын нээлтийн найруулгынхаа талаар ярихдаа “Монголчууд омогшил, бахархал дүүрэн ард түмэн гэдгийг би харуулахыг хичээсэн юм. Үндэсний их баяр наадмыг өмнөх жилүүдэд найруулж, ажилласан бүх найруулагч мундаг. Наадмын найруулагчаар ажиллана гэдэг амар биш. Хүн болгонд зүхүүлнэ. Гэхдээ миний ард түмэн энэ наадмаас ирэх цагийн сайхан ерөөлийг авсан гэдэгт итгэлтэй байна. Монголын ард түмэн маань бие биеэ сайн сайхан үгээр ерөөж байгаасай гэж хүссэн.” Гэв.